Left arrow Go Back

TNEDIJA TA' L-IMDINA MASTER PLAN

pr0641
Date Icon 02/05/2006

Il-Belt storika ta' l-Imdina għandha storja li prattikament tkopri kull epoka ta' żminijiet li pajjiżna għadda minnhom. Għaldaqstant inħass il-bżonn li din il-Belt antika jkollha pjan komprensiv li filwaqt li jindirizza l-problemi, joffri soluzzjonijiet li jtejbu l-ambjent uniku ta' l-Imdina. Il-Ministru Ninu Zammit qal dan meta kien qed jippreżenta l-Master Plan ta' l-Imdina lill-President ta' Malta Dr. Edward Fenech Adami.

It-twaqqif tal-Kumitat tar-Riabilitazzjoni tal-Kottonera, Valletta u l-Imdina kien l-ewwel pass sabiex dawn l-ibliet ta' pajjiżna jkunu mħarsa u kull intervent li jsir ikun maħsub u mfassal fuq parametri stabbiliti li jikkumplimentaw ma' l-istorja u l-wirt kulturali li jinsab f'dawn l-ibliet. Il-Ministru fakkar li l-ewwel Master Plan ta' din ix-xorta kien sar fil-Birgu u llum il-Ministeru diġa’ qed jimplementa proġetti li kienu ndirizzati f'dan id-dokument fosthom ir-riabilitazzjoni u l-bini mill-ġdid tat-Torri ta' l-Arloġġ u l-Pjazza. Fl-Imdina anke qabel it-tfassil tal-Master Plan, ukoll kienu saru xi xogħlijiet ta' restawr fosthom il-Bieb tal-Griegi, it-Torri ta' l-Istandardo, il-paviment tal-Palazz ta' Vilhena u l-proġett estensiv ta' l-pavimentar ta' l-Imdina kollha li kien jinkludi l-bdil ta' servizzi u t-tneħħija tal-wires kollha minn mal-bini.

It-tnedija ta' l-Master Plan hi pass ieħor importanti favur il-konservazzjoni ta' l-Imdina. Fost affarijiet oħra l-Master Plan jinkludi studji fuq l-arkitettura ta' l-Imdina, il-wirt storiku li jeżisti fl-Imdina fosthom Kapelli, Knejjes, il-Katidral u d-dawra tal-fortifikazzjonijiet. Il-Ministru tenna li l-Master Plan iħares ukoll lejn l-aspett residenzjali u jindirizza wkoll l-aspett soċjo-ekonomiku. Dan il-Master Plan seta’ jitfassal wara l-istudji li kienu saru fil-passat mill-Universita’, taħt id-direzzjoni tal-Professur De Lucca servew bħala l-pedament li fuqu nbena l-pjan strateġiku.

Abbażi ta' dan il-Master Plan, kompla l-Ministru, il-Gvern se jkollu linji ta' gwida ċari li fuqhom ikun jista jimplimenta d-diversi proġetti ta' restawr, konservazzjoni u riabilitazzjoni ta’ din il-Belt antika li hija wiehed mill-gojjelli ewlenin tal-wirt storiku taghna.

Il-Ministru stqarr li proġetti oħra li se jkunu qed jitwettqu fis-snin li ġejjin se jkunu ffokati l-aktar fuq ir-restawr u l-konservazzjoni tal-monumenti u l-fortifikazzjonijiet. Fil-fatt matul din is-sena se jibda r-restawr tal-Bieb prinċipali u se jitlestew il-pjanijiet sabiex parti mis-sur ta' taħt il-Vilhena tiġi kkonservata. Proġett ieħor li huwa ppjanat għall-Imdina huwa r-restawr u l-konsolidament tas-swar u l-fortifikazzjonijiet ta' l-Imdina. Dan il-proġett tressaq quddiem il-Gvern sabiex ikun ikkunsidrat bħala wieħed mill-proġett ta' finanzjament mill-Fondi Strutturali ta' l-Unjoni Ewropea.

Il-Gvern hu mpenjat bis-sħiħ li l-wirt storiku ta' pajjiżna jingħata d-dehra li tixraqlu u jkun restawrat kif jixraq.

Fl-aħħarnett il-Ministru qal li l-Master Plan se jgħin ukoll u se jkun il-ġustifikazzjoni sabiex l-Imdina tkun fil-lista bħala World Heritage Site, liema titlu jgħin mhux biss lill-Imdina iżda anke lil pajjiżna f'dak li għandu x'jaqsam ma' l-istorja, u li jagħmel lil pajjiżna fuq quddiem nett f’dak li ghandu x’jaqsam mal-konservazzjoni tal-wirt storiku Ewropew.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow