Left arrow Go Back

L-AĦĦAR PREPARAMENTI GĦALL-FESTIVAL INTERNAZZJONALI TAL-LOGĦOB TAN-NAR

pr0634
Date Icon 28/04/2006

Bħala parti miċ-ċelebrazzjonijiet li jfakkru it-tieni anniversarju tas-sħubija ta’ Malta fl-Unjoni Ewropea din is-sena qed ikun organizzat għall-ewwel darba l-Festival Internazzjonali ta’ Malta tal-Logħob tan-Nar. Dan il-festival qed jieħu post il-festival li kien ikun organizzat mill-Awtorità tat-Turiżmu ta’ Malta qabel jiftaħ l-istaġun tal-festi parrokkjali fil-bliet u l-irħula kollha ta’ Malta u Għawdex. 

Il-festival ta’ din is-sena ser jinżamm fil-Port il-Kbir nhar is-Sibt u nhar il-Ħadd, 29 u 30 ta’ April. Fil-Festival ta’ din is-sena, organizzat mit-Taqsima ta’ l-Events tal-Ministeru għat-Turiżmu u Kultura –  li ġabret flimkien taqsimiet fi ħdan l-Awtorità tat-Turiżmu ta’ Malta u tal-Kunsill Malti għall-Kultura u l-Arti – se jipparteċipaw tliet kmamar tan-nar Maltin u tnejn barranin. Il-kmamar tan-nar Maltin huma l-15 ta’ Awissu tal-Mosta; Santa Marija ta’ l-Imqabba u San Mikiel ta’ Ħal-Lija. It-tnejn barranin huma ‘Jubilee Fireworks Company’ tar-Renju Unit u ‘Luso Pirotecnia Fireworks Company’ tal-Portugall. Matul il-jumejn tal-festival seba’ kmamar oħra tan-nar lokali se jipparteċipaw b’logħob tan-nar tradizzjonali Malti. Dawn jinkludu logħob tan-nar mekkaniku ta’ l-art. Wirja spettakulari ta’ piro-mużikali minn  ‘Orzella Fireworks’ ta’ l-Italja ser iġġib fit-tmiem dan il-festival. 

Il-Ministru għat-Turiżmu u Kultura Francis Zammit Dimech kien il-Valletta Waterfront fejn segwa l-aħħar preparazzjonijiet għall-Festival tal-Logħob tan-Nar. Il-Ministru Zammit Dimech qal li dan il-festival, li din is-sena ser jingħata bixra internazzjonali, daħal fil-kalendarju ta’ attivitajiet organizzati mill-Ministeru għat-Turiżmu u Kultura flimkien ma’ l-Awtorità tat-Turiżmu ta’ Malta. Hu qal li dan hu festival popolari sew mal-Maltin kif ukoll mat-turisti. Hu qal li għall-Maltin dan il-Festival jiġi ftit qabel il-festi parrokkjali li jsiru fil-bliet u l-irħula ta’ pajjiżna fejn il-logħob tan-nar hu ingredjent ewlieni taċ-ċelebrazzjonijiet. Għat-turisti din hi wirja li toffri dik il-qabża ta’ kwalità li qed naħdmu biex ikollna fil-prodott Malti. 

Il-Ministru Zammit Dimech qal li din is-sena wkoll il-Festival Internazzjonali tal-Logħob tan-Nar qed jiġi organizzat bħala parti mill-attivitajiet li jfakkru s-sħubija ta’ Malta fl-Unjoni Ewropea. Hu qal li attività oħra organizzata mill-Ministeru għat-Turiżmu u Kultura biex tfakkar dan l-anniversarju kien kunċert imtella’ mill-Orkestra Nazzjonali fit-Teatru Manoel. 

Il-Ministru għat-Turiżmu u Kultura qal li f’għeluq it-tieni sena mis-sħubija ta’ pajjiżna fl-Unjoni Ewropea llum nifhmu aħjar x’inhuma l-vantaġġi ta’ din is-sħubija. Hu qal li tul dawn is-sentejn  pajjiżna se jkun irċieva Lm150 miljun ta’ għotjiet mill-UE filwaqt li fis-seba’ snin li ġejjin se jingħata 805 miljun Euro oħra. Hu qal li permezz ta’ dawn il-fondi pajjiżna seta’ jwettaq, u ser ikompli jwettaq, proġetti fl-oqsma ambjentali, edukattivi, turistiċi, kulturali u f’tant oqsma oħra li kieku ma kenux jitwettqu. 

Il-Ministru Zammit Dimech qal li s-sħubija ta’ Malta fl-Unjoni Ewropea ser tkompli tħalli riżultati pożittivi kemm fuq l-ekonomija ta’ pajjiżna, kif ukoll fuq il-finanzi tal-Gvern, il-livell tal-għajxien tal-poplu Malti u l-impjiegi. 

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow