Left arrow Go Back

DISKORS TA’ L-ONOR LAWRENCE GONZI, PRIM MINISTRU, WAQT L-GĦELUQ TAL-KONFERENZA NAZZJONALI ‘ADDRESSING THE PAIN: CHILDREN AND YOUNG PEOPLE WITH VERY CHALLENGING BEHAVIOUR’ ORGANIZZATA MILL-KUMMISSARJU GĦAT-TFAL - ĊENTRU PAPA ĠWANNI PAWLU II, Ħ’ATTARD

pr0633
Date Icon 28/04/2006
L-ewwelreazzjoni tiegħi għax-xogħol li ppreżentajtu llum hi grazzi!  Grazzi ovvjament lill-Kummissarju tat-Tfal li xprunat u kkoordinat din l-inizjattiva. Grazzi lil professjonisti u esperti li taw il-ħin, l-enerġija u l-esperjenza tagħhom.  Grazzi speċjali lit-tfal u ż-żgħżagħ li aċċettaw li għamlu għażla mhix faċli li jaqsmu l-esperjenzi tagħhom.  Naħseb li nista’ nitkellem għan-nom tal-Gvern u tal-komunità Maltija meta ngħid li dokument li għandu valur bħal dan huwa rigal li żgur ser jiġi apprezzat, imgawdi u utilizzat matul is-snin li ġejjin.
Jienau nisma’ l-osservazzjonijiet, l-informazzjoni li nġabret u r-riċerka li saret erġajt ikkonfermajt kemm is-serjetà u l-professjonalità fis-soċjetà Maltija qiegħda dejjem tiżdied.  Wieħed japprezza wkoll il-mod kif l-iżvilupp tal-professjonijiet ġodda, li wħud minnhom kelli x-xorti nippilota l-liġi tagħhom, qiegħed joħloq xeħtha iżjed sħiħa u integrata fil-mod kif naffaċċjaw is-sitwazzjoni tan-nies li jużaw is-servizzi tagħna.
Dinil-kultura ta’ viżjoni integrata tidher ċara kemm fil-partijiet diversi tax-xogħol li sar biex ingħaqdet il-pubblikazzjoni finali kif ukoll fil-proposti finali.  Jidher ċar li fil-każ tat-tfal u żgħażagħ b’imġieba diffiċli ħafna wieħed ma jistax jieqaf biss fuq l-imġieba iżda jeħtieġ li s-sitwazzjoni kollha tiġi indirizzata.
Il-bżonnli x-xibka ta’ kollaborazzjoni bejn Ministeri varji u atturi diversi għandha tissaħħaħ u titkabbar m’ huwiex biss bżonn għal dan il-qasam iżda huwa mod ġdid ta’ kif naħsbu u nindirizzaw il-progress u l-iżvilupp in ġenerali.  Nhar is-Sibt li għadda attendejt konferenza dwar l-iżvilupp sostenibbli, jiġifieri li l-iżvilupp tal-pajjiż jeħtieġ viżjoni u strateġija li tikkunsidra l-aspetti kollha - l-aspett ekonomiku, dak uman, soċjali u ambjentali.  Għalkemm ngħaraf li dawn huma kunċetti li jitolbu ċertu bidliet fil-kultura li ma jsirux mil-lum għal għada, l-esperjenza tal-lum u ta’ nhar is-Sibt iqawwuli qalbi.
Kifjuri ċar dan ir-rapport, f’din ix-xibka, hemm vuċi esperta li ma tistax titħalla barra.  Din hija l-vuċi tat-tfal li qiegħdin fil-varji programmi u servizzi li qed insemmu llum.  Din il-vuċi għandha valur imprezzabbli għax titkellem fuq esperjenzi personali li setgħu kienu diffiċli u xi kultant ta’ tbatija, li mhux la kemm wieħed jiddeċiedi li jaqsam ma’ l-oħrajn.  Hu tassew ta’ min ifaħħar din id-deċiżjoni tagħkom, tfal preżenti llum u oħrajn li forsi ma setgħux ikunu preżenti, li taqsmu l-esperjenzi tagħkom u b’hekk tatu kontribut siewi għat-tfassil ta’ dawn il-proposti.  Ta’ dan nerġa’ nirringrazzjakom għan-nom ta’ kulħadd.  Il-maturità u l-kreattività tal-kontribut tagħkom, qed juru kemm hu importanti li l-vuċi tagħkom tinstema’ minn min għandu d-dmir u r-responsabbiltà li jieħu d-deċiżjonijiet  dwar dak kollu li għandu x’jaqsam mal-ħajja tagħkom.
L-artikolu12 tal-Konvenzjoni dwar id-Drittijiet tat-Tfal, jitkellem ċar fuq il-parteċipazzjoni tat-tfal.  Nixtieq nifraħ lill-Kummissarju li għażlet dan l-artikolu bħala l-ewwel wieħed li għandha tisħaq fuqu u tqajjem iżjed għarfien dwaru fis-soċjetà.  Kif nafu kollha kemm aħna, kull dritt jimxi id f’id mar-responsabbiltà u l-għażla.  Hija ħaġa affaxxinanti li tara l-ideat ta’ kif irid jinsab bilanċ bejn id-dixxiplina u r-relazzjoni, bejn id-drittijiet u d-dmirijiet, bejn il-kontroll u l-awtonomija, joħorġu kemm mill-konvenzjoni tad-drittijiet, mill-professjonisti, kif ukoll mit-tfal stess.  B’dan il-mod ħarġet ċertu konsistenza li diġà tindika il-validità tal-proposti.
Tulis-snin rajna ħafna żviluppi, kif ukoll iltqajna ma’ sfidi ġodda.  Nifhem ukoll li kull ġurnata li tgħaddi fuq tifel jew tifla li qegħdin ibatu, tfisser li l-ġenituri, social workers, psikologi, għalliema, tobba, nurses, carers u dawk kollha li qed jieħdu ħsieb il-progress ta’ dik it-tifla jew tifel, jesperjenzaw sens ta’ urġenza biex ikomplu jagħmlu aktar u aktar għal dawn it-tfal.
Għalkemmforsi għad jonqosna, id-direzzjoni hemm qiegħda.  L-esperjenzi pożittivi li ġejjin minn servizzi li nħolqu matul l-aħħar snin bħaċ-Ċentru Aċċessli fih hemm il-Homestart Programme, iċ-Childcare and Family Centre u l-Adolescent Outreach.  Dawn is-servizzi qed juru liema huma dawk il-prattiċi li wieħed għandu jkompli jippjana u jiżviluppa fuqhom.
Nixtieqinsemmi żvilupp reċenti fejn il-Ministeri tal-Familja u s-Solidarjetà Soċjali, tas-Saħħa u tal-Finanzi qegħdin fil-proċess li jagħmlu evalwazzjoni tas-servizzi attwali tal-YPU u l-High Support Services biex jaraw kif ir-riżorsi marbuta ma’ dawn is-servizzi jistgħu jindirizzaw aħjar il-bżonnijiet partikolari tat-tfal li qed jirċievu s-servizz.  Nixtieq nenfasizza l-punt li din l-evalwazzjoni għandha l-iskop li jiżdiedu l-opportunitajiet ta’ għajnuna għal dawn it-tfal.
Fis-setturta’ l-edukazzjoni għadu kif tfassal dokument siewi, “Biex Uliedna Jirnexxu Lkoll” li jintroduċi strateġija għall-bżonnijiet ta’ tfal b’imġieba diffiċli li jmorru lil hinn mill-bżonnijiet edukazzjonali.  Insibu, per eżempju, proċess sabiex nindunaw bid-diffikultajiet emozzjonali jew fl-imġieba tat-tfal sa minn etajiet żgħar, taħriġ professjonali u kontinwu għall-istaff ta’ l-iskejjel biex ikunu jistgħu jifhmu t-tfal iżjed u jaħdmu aħjar magħhom, ristrutturar tas-servizzi psiko-soċjali fl-iskejjel, it-twaqqif Team li jkun jista’ isegwi u jiggwida lill-istudenti u li joffri sapport anke lill-iskola fejn dawn it-tfal għal xi raġuni jew oħra qiegħdin iġibu ruħhom b’dan il-mod daqshekk diffiċli u iżjed opportunitajiet u sapport biex studenti jiġu integrati fil-klassijiet mainstream.  Dan ifisser li minkejja id-diffikultajiet, hemm żviluppi għaddejjin fid-direzzjoni t-tajba, li resqin lejn servizzi iżjed flessibli, iżjed adattati għal bżonn individwali u li għandhom viżjoni iktar sħiħa tas-sitwazzjoni.
BħalaPrim Ministru u ex-Ministru tal-Politika Soċjali, nagħraf li fil-waqt li sar ħafna, xorta waħda għad fadal ħafna xi jsir.  Konvint ukoll kif qalet il Kummissarju li t-tfal ma jistgħux u m’għandhomx jistennew.
Għalhekk,illum nixtieq inħabbar li nkarigajt il-Ministru Dolores Cristina biex il-Ministeru tal-Familja u Solidarjetà Soċjali jikkoordina working group ta’ rappreżentanti mill-Ministeri tal-Ġustizzja, l-Edukazzjoni u tas-Saħħa biex, flimkien mal-Kummissarju, janalizzaw dawn il-proposti u jidentifikaw liema azzjonijiet jistgħu jittieħdu bla dewmien u liema azzjonijiet għandhom jiġu ppjanati għas-snin li ġejjin.  L-ewwel indikazzjonijiet huma li r-rakkomandazzjoni li għandu jinħoloq spazju fejn rappreżentanti ta’ l-oqsma kollha involuti jistgħu jiżviluppaw strateġija sħiħa u integrata għal dawn it-tfal, hija l-iktar waħda essenzjali.  Hija essenzjali għaliex nemmen li mingħajr din ma nistgħux naslu għal dik l-istampa ta’ servizzi li verament jaqdu l-bżonnijiet tan-nies b’mod sħiħ.  L-idea għandha tkun li din l-istampa ta’ servizzi ma tibqax waħda statika, qisha biex ngħidu aħna bħal ritratt ġo frame, iżda ssir iżjed tixbaħ film, fejn kull tifel u tifla jistgħu jsibu dik il-parti li iżjed tgħodd għalihom, fejn, kif qalu t-tfal stess, ikunu jistgħu jiġu ndirizzati il-bżonnijiet individwali tagħhom, bħal bżonn li jibnu relazzjoni sinnifikanti ma’ xi ħadd jew li jibqgħu fil-komunità.
Mill-preżentazzjonili għamiltu llum, jidher li dan ix-xogħol għandu proprja dawn il-kwalitajiet essenzjali.  Filwaqt li nerġa’ nieħu l-okkażjoni biex nirringrazzjakom ta’ dan l-eżempju tajjeb ta’ kollaborazzjoni u viżjoni sħiħa li ġġor magħha din il-pubblikazzjoni, ngħalaq billi nirringrazzja l-Kummissarju tat-Tfal talli bil-ħidma tagħha wasslitilna b’mod ċar u organizzat il-vuċi tat-tfal.
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow