Left arrow Go Back

Previsti riżultati pożittivi fil-qasam turistiku fl-ewwel erba’ xhur tas-sena

pr0620
Date Icon 27/04/2006

Biex ma jkunx hemm spekulazzjoni bla bżonn dwar il-qagħda tas-settur turistiku f’pajjiżna, il-Ministeru għat-Turiżmu u Kultura jfakkar li din is-sena l-festa ta’ l-Għid il-Kbir ġiet ċelebrata f’April, filwaqt li s-sena l-oħra ħabtet f’Marzu. Id-data ta’ meta jiġi l-Għid il-Kbir jkollha mpatt fuq in-numru ta’ turisti li jżuru Malta f’dan ix-xahar partikolari u anke fil-perijodu tas-sena li jinkludi l-istess festa. Għalhekk ikun ferm aħjar jekk għal skop ta’ statistika Marzu u April jittieħdu flimkien u li r-riżultat staġjonali, flok jingħata għall-ewwel tliet xhur ikun għall-ewwel erba’ xhur. 

Skond ċifri li ħarġu llum mill-Uffiċċju Nazzjonali ta’ l-Istatistika, in-numru ta’ turisti li ħallew Malta bl-ajru f’Marzu 2006 kien ta’ 64,018 jew 9.3 fil-mija inqas minn Marzu 2005. L-istess ċifri juru li fl-ewwel tliet xhur it-turisti li ħallew pajjiżna bl-ajru naqsu bi 3.4 fil-mija. Ċifri maħruġa mill-Ajruport Internazzjonali ta’ Malta min-naħa l-oħra juru li fl-ewwel tliet xhur tas-sena, il-passiġġieri li telqu minn Malta kienu 5.3 fil-mija inqas milli kienu fl-istess perijodu tas-sena l-oħra. Dawn iċ-ċifri jinkludu Maltin li siefru u għalhekk, minħabba li jirriżulta li n-numru ta’ Maltin li siefru naqas, l-ammont fit-tnaqqis ta’ turisti li żaru pajjiżna hu inqas minn dak indikat mill-MIA.  

Ċifri maħruġa mill-MIA għall-ewwel tliet ġimgħat ta’ April (1 sa 21 ta’ April) jindikaw żieda ta’ 14.5 fil-mija fil-movimenti ta’ passiġġieri mill-Ajruport Internazzjonali ta’ Malta. Dawn iċ-ċifri jekk magħduda ma’ dawk ta’ l-ewwel tliet xhur mistennija jagħtu żieda inkoraġġanti fin-numru ta’ passiġġieri li żaru pajjiżna fl-ewwel erba’ xhur tas-sena. 

Il-Ministeru għat-Turiżmu u Kultura jfakkar li sa mill-bidu tas-sena kien indika li fl-ewwel kwart tal-2006 kien se jkun hemm tnaqqis fin-numru ta’ turisti li jżuru pajjiżna. Kien indika wkoll li s-settur turistiku għandu jieħu xejra pożittiva minn April ’l quddiem. 

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow