MALTA TIPPARTEĊIPA F’LAQGĦA TA’ L-UNJONI EWROPEA DWAR IL-KO-EŻISTENZA TA’ GMO’S
Ministri, uffiċjali għoljin, esperti u rappreżentanti ta’ għaqdiet mhux governattivi (NGO’s) mill-Unjoni Ewropea ltaqghu fi Vjenna biex jiddiskutu l-ko-eżistenza ta’ prodotti ġenetikament modifikati (GMO’s) ma’ oħrajn magħmulin b’metodi konvenzjonali u organiċi.
Malta kienet rappreżentata f’din il-konferenza mill-Ministru għall-Affarijiet Rurali u l-Ambjent George Pullicino. Fil-konferenza, li saret fuq inizjattiva ta’ l-Awstrija li bħalissa għandha f’idejha l-Presidenza ta’ l-Unjoni Ewropea, ipparteċipaw ukoll il-Kummissarju ta’ l-Unjoni Ewropea għall-Agrikoltura Marian Fischer-Boel u l-Kummissarju ta’ l-Unjoni Ewropea għall-Ambjent Stavros Dimas.
Bosta mill-kelliema saħqu li filwaqt li għandhom jittieħdu l-miżuri kollha neċessarji, partikolarment dawk li għandhom il-forza tal-liġi, il-produtturi kif ukoll il-konsumaturi għandhom dritt għall-għażla. Madanakollu, din l-għażla trid issir f’qafas ta’ konsultazzjoni u djalogu wiesgħa u trasparenti ma’ għaqdiet ta’ produtturi u konsumaturi.
Il-Kummissarju Fischer-Boel qalet li strateġiji effiċjenti u vjabbli biex jassiguraw il-ko-eżistenza huma vitali biex ikun hemm għażla vera bejn produzzjoni ġenetikament modifikata u dik konvenzjonali għall-produtturi u l-konsumaturi. Il-Kummissarju Stavros Dimas stqarr li r-regolamentazzjoni li tiċċertifika l-produzzjoni u l-użu ta’ prodotti ġenetikament modifikati trid tkun tali li tindirizza l-preokkuppazzjonijiet taċ-ċittadini u anki tipproteġi l-biodiversita’ fl-ambjent naturali.
Minkejja li l-pożizzjoni tal-Gvern Malti dejjem kienet kontra l-produzzjoni u l-kultivazzjoni ta’ GMOs f’pajjiżna, il-Ministeru għall-Affarijiet Rurali u l-Ambjent qed isegwi b’attenzjoni l-iżviluppi xjentifiċi u d-diskussjoni fuq dan il-qasam. Malta tibqa’ ssostni li d-diskussjoni dwar il-ko-eżistenza ta’ GMOs u prodotti konvenzjonali għandha ssir b’mod oġġettiv u ’l bogħod minn emozzjoni żejda.
Malta hija konxja mill-fatt li ċerti pajjiżi Ewropej addottaw distanzi minimi ta’ iżolament bejn għelieqi bi prodotti ġenetikament modifikati u għelieqi bi prodotti konvenzjonali sabiex jiffaċilitaw il-ko-eżistenza. Mill-banda l-oħra Malta temmen li dan mhux daqstant applikabbli għal pajjiżna minħabba l-qisien ta’ l-għelieqi tal-bdiewa taghna u l-limitazzjonijiet li dawn għandhom.
Għal dawn ir-ragunijiet il-Gvern Malti jħoss li għandu jibqa’ jadotta l-prinċipju ta’ prekawzjoni u ma jħossx li għandu jbiddel il-pożizzjoni tiegħu.
Stqarrijiet Oħra:
PR261956
STQARRIJA MILL-MINISTERU GĦALL-INKLUŻJONI U L-VOLONTARJAT U MILL-MINISTERU ...
PR261955en