Programm regolari ta’ monitoraġġ u sorveljanza f’Malta bħala prekawzjoni kontra t-tixrid tal-virus ta’ l-influwenza tat-tjur
Il-Ministeru għall-Affarijiet Rurali u l-Ambjent jirreferi għal rapporti li ġew identifikati xi ċinji mejtin fi Sqallija u li fuqhom instab il-virus ta’ l-influwenza tat-tjur.
Il-Ministeru baqa’ għaddej bil-miżuri ta’ prekawzjoni kontra t-tixrid ta’ dan il-virus u għadu għaddej bi program regolari ta’ monitoraġġ u sorveljanza fuq kampjuni ta’ għasafar. Dan il-monitoraġġ jikkonferma li sal-lum, Malta hija ħielsa mill-virus ta’ l-influwenza tat-tjur u għalhekk ma jeżistix lok għall-allarm.
Id-Diviżjoni ta’ l-Ikel u l-Attivita’ Veterinarja fil-Ministeru għall-Affarijiet Rurali u l-Ambjent, qed issegwi mill-qrib l-aħħar żviluppi li qed iseħħu. Id-Diviżjoni tinsab f’kuntatt kontinwu ma’ l-awtoritajiet veterinarji Taljani u ta’ l-Unjoni Ewropea biex tkun f’pożizzjoni li tieħu azzjoni mmedjata skond ma jkun deċiż fuq bażi xjentifika.
Il-Ministeru għall-Affarijiet Rurali u l-Ambjent ifakkar fin-numri ta’ emerġenza. In-numru freephone 8007 2211 huwa attivat matul il-ħin ta’ l-uffiċċju u li fuqu għandhom ikunu ndirizzati xi mistoqsijiet dwar l-influwenza tat-tjur. In-numru 7903 3044 huwa attivat 24 siegħa kuljum, sebat’ijiem fil-ġimgħa u għandu jintuża f’każ ta’ xi suspett relatat mal-virus ta’ l-influwenza tat-tjur.
Il-Ministeru għall-Affarijiet Rurali u l-Ambjent se jibqa’ jżomm lill-pubbliku infurmat.
Stqarrijiet Oħra:
PR261952
STQARRIJA MILL-UFFIĊĊJU TAL-PRESIDENT Tliet Ambaxxaturi ġodda jippreżentaw...
PR261951