Left arrow Go Back

JINBEDA L-BINI TA’ BELVEDER FUQ WIED BABU, LIMITI TA’ WIED IŻ-ŻURRIEQ: PROĠETT TA’ ’L FUQ MINN LM600,000 FIN-NOFS IN-NHAR TA’ MALTA

pr0110
Date Icon 27/01/2006

Ħaddiema fi ħdan il-Ministeru għar-Riżorsi u l-Infrastruttura taw bidu għal proġett ieħor ta’ tisbiħ fin-nofs in-nhar ta’ Malta. Fl-aħħar ġimgħat inbeda xogħol ta’ bini ta’ belveder li jagħti fuq Wied Babu, limiti ta’ Wied iż-Żurrieq. Din iż-żona ta’ Malta titgawda minn eluf ta’ residenti li joqgħodu fl-irħula tal-madwar fosthom iż-Żurrieq, Qrendi, Mqabba u Ħal-Safi, kif ukoll minn bosta turisti.  

Il-Ministru Ninu Zammit żar dawn ix-xogħlijiet li nbdew fil-bidu tas-sena u huma ppjanati li jintemmu sa Ottubru. Dik li llum hija bankina dejqa u perikoluża se tinbidel f’belveder ta’ tliet metri wisa’, b’tul ta’ 750 metru. Il-kostruzzjoni tat-twessiegħ qiegħed isir permezz tat-tpoġġieħ ta’ blokki tal-franka. Dan il-proċess diġa’ nbeda. Dan għandu jwassal għal bini ta’ ħajt miksi bil-ġebel tas-sejjieħ sabiex b’hekk jikkumplimenta ma’ l-ambjent naturali tal-madwar. Inżabru numru ta’ siġar u sar tindif ġenerali tal-madwar qabel inbeda l-proġett. 

Bħalma twettaq fil-bini ta’ nofs kilometru promenade fix-Xgħajra u kif qed jitwettaq fil-bini ta’ promenade fix-Xemxija, se jiġu nstallati railings u street furniture bħal bankijiet u kontenituri ta’ l-iskart li kollha se jkunu manifatturati mill-ħaddiema tad-Dipartiment għal Manifattura u Servizzi. Il-pavimentar li ntagħżel għal dan il-proġett huwa tiżwiqa tal-ġebla tal-franka u porfido. B’kollox se jsir ’l fuq minn 3,000 metru kwadru ta’ pavimentar. Il-Ministru Zammit semma wkoll li dan il-belveder se jkun imdawwal permezz ta’ sistema ta’ dwal msejħa recessed light fittings. Dan il-proġett jipprovdi wkoll aċċess għal persuni b’diżabilita’. 

L-investiment fuq dan il-proġett jaqbeż is-Lm600,000, liema ammont jinkludi l-pagi tal-ħaddiema. 

Il-Ministru Zammit semma diversi proġetti li l-Ministeru għar-Riżorsi u l-Infrastruttura wettaq fl-aħħar sentejn fin-nofs in-nhar ta’ pajjiżna. Fost dawn insibu bini ta’ ġonna fl-Imqabba u fiż-Żurrieq, tisbiħ tal-pjazza ta’ Ħal Safi u fi Pjazza Paolino Vassallo ġewwa Bormla. Ħaddiema tal-Gvern wettqu wkoll xogħlijiet ta’ restawr fuq kappelli f’Ħal-Luqa, il-Gudja u s-Siġġiewi. Proġett ieħor li twettaq fl-2005 kien il-bini ta’ nofs kilometru promenade fix-Xgħajra. Kienu bosta l-widien fin-naħa t’isfel ta’ pajjiżna li ġew mnaddfa u rijabilitati bħala parti mill-ħidma relatata ma’ prevenzjoni mill-għargħar. 

Matul din is-sena diġ’ nbdew iktar xogħlijiet fin-nofs in-nhar ta’ Malta fosthom tisbiħ fiċ-ċentri ta’ Ħal Kirkop u Birżebbuġa. Ħaddiema tal-Gvern bdew ukoll xogħlijiet ta’ tisbiħ fuq proġett kbir li se jagħti dehra ġdida lil Mixtla ta’ Bormla, meqjusa bħala l-pulmun tal-Kottonera. 

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow