Left arrow Mur Lura

JIBDA PROĠETT TA’ LM1.1 MILJUN GĦAR-RESTAWR TAL-FORTI TIGNÉ

pr0050
Date Icon 17/01/2006

Ir-rivitalizzar ta’ assi storiċi bħal m’huwa l-Forti Tigné jiddistingwi proġett ta’ riġenerazzjoni urbana – distinzjoni li tissarraf ukoll f’vantaġġ kompetittiv biex jinġieb investiment barrani lejn xtutna.

F’diskors waqt żjara fil-Forti Tigné fejn bħalissa għaddej xogħol estensiv ta’ restawr u rinovazzjoni, il-Ministru għall-Iżvilupp Urban u Toroq, l-Onor. Jesmond Mugliett qal li l-parti l-kbira tal-proġetti ta’ riġenerazzjoni urbana li saru f’Malta fl-aħħar snin irnexxielhom isibu użu utili għall-binjiet storiċi li jmissu.

“Waqt l-aħħar ħames snin, proġetti bħal dawn bidlu żoni abbandunati f’ċentri ta’ attività li mhux biss isaħħu l-ekonomija, iżda anke jdaħħlu ħajja ġdida fl-inħawi madwarhom. Rajna dan iseħħ bit-twettiq tal-Proġett tax-Xatt tal-Birgu u fil-Proġett tax-Xatt tal-Belt,” qal il-Ministru Mugliett.

Parti mill-proġett ta’ Lm140 miljun ta’ Manoel Island u l-Ponta ta’ Tigné li qed isir mill-konsorzju MIDI, jinkludi r-rinovazzjoni u rivitalizzazzjoni tal-binja tat-tmintax –il seklu magħrufa bħala Forti Tigné. Dan il-Forti li jinsab f’Tas-Sliema – iċ-ċentru kummerċjali ta’ Malta – kien inbena oriġinarjament fl-1792 fuq diżinn tal-kap inġinier tal-Ordni ta’ San Ġwann, Stefano de Toussard.

Għalkemm il-Forti Tigné ra biss ftit azzjoni militari fil-200 sena storja tiegħu, dan għadda minn tliet epoki fl-istorja ta’ Malta u tal-Mediterran. Wara t-tluq tal-Kavallieri minn Malta, il-Forti kien okkupat mill-Franċiżi u wara mill-Ingliżi mill-1805 sat-tluq tagħhom fl-1979. Tul dan l-aħħar perjodu il-Forti kien ġie armat u alterat biex jaħdem bħala makna tal-gwerra.

Il-Ministru għall-Iżvilupp Urban u Toroq faħħar lil MIDI plc., talli din qed tqis ir-restawr tal-Forti u l-Garden Battery li nstabet reċentement fil-punent tiegħu bħala parti integrali tal-Proġett tal-Ponta ta’ Tigné.

“Għalkemm ir-restawr ta’ dawn l-istrutturi huwa wieħed mill-obbligi ta’ MIDI plc, dawn mhux qed jitqiesu bħala piż fuq il-proġett iżda bħala assi, peress li dawn ser jiġu ntegrati fil-landscaping ta’ din il-penisola,” hu qal.

Il-Ministru żied jgħid li l-Gvern għandu numru ta’ proġetti ta’ riġenerazzjoni urbana imħejjija, ewlenin fosthom l-iżvilupp ta’ Fort Cambridge fi Qui-si-Sana – li dwaru diġà inħareġ brief mill-Awtorità Maltija għall-Ambjent u l-Ippjanar, ir-riġenerazzjoni tal-inħawi tax-Shreiber f’Raħal Ġdid, u r-riġenerazzjoni taż-żona tal-Baċir Numru 1 f’Bormla. Dan tal-aħħar jinsab fl-istadju tal-għażla tal-iżviluppatur u x-xogħol fuqu mistenni jibda kmieni s-sena d-dieħla.

F’diskors waqt il-konferenza ta’ l-aħbarijiet, is-Sur Benjamin Muscat, Kap Eżekuttiv, qal li l-MIDI plc għandha l-ħsieb li toħloq spazju urban attrajenti biex il-Forti jerġa’ jibda jintuża fil-kuntest taż-żminijiet ta’ paċi tal-lum, filwaqt li jirrispetta is-saffi varji ta’ l-istorja militari tiegħu – l-Assedju l-Kbir, l-okkupazzjoni Franċiża u ż-żewġ gwerer dinjin – li huma s-sisien ta’ l-identità tiegħu bħala parti mill-wirt storiku ta’ Malta. Il-proposti għall-użu tal-Forti Tigné, fl-isfond tal-Belt Valletta u l-Port ta’ Marsamxett jinkludu żviluppi kulturali u kummerċjali li jkunu sensittivi għall-ambjent storiku tal-madwar. Dawn il-kunċetti differenti ser jinvolvu r-restawr bir-reqqa ta’ l-istrutturi eżistenti – inklużi t-tiswija u r-reintegrazzjoni tal-gun emplacements tas-seklu għoxrin, kif ukoll il-ħolqien ta’ ġonna, passaġġi u faċilitajiet oħra għall-pubbliku.

Is-Sur Albert Mizzi, Chairman ta’ MIDI plc, f’diskors lill-ġurnalisti saħaq fuq il-fatt li l-bidu tar-restawr ta’ Forti Tigné fil-Ponta ta’ Tigné huwa pass importanti ieħor peress li b’hekk ikun qed jintlaħaq obbligu ieħor bejn il-Gvern u MIDI plc.

L-ispiża li ser tmur għar-restawr ta’ Forti Tigné ser tammonta għal Lm1.1 miljuni. MIDI plc., qed tippjana li tlesti dan ir-restawr sa Frar 2008.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow