Left arrow Mur Lura

SE JIŻDIEDU 1,770 SODDA F’ERBA’ PROĠETTI TURISTIĊI DIN IS-SENA

pr0049
Date Icon 17/01/2006

Il-Ministru għat-Turiżmu u Kultura Francis Zammit Dimech qal li bil-ftuħ tal-lukanda Le Méridien fl-1 ta’ Marzu n-numru ta’ lukandi ta’ Ħames Stilel se jitla’ għal 14; filwaqt li n-numru ta’ sodod f’dawn il-lukandi se jitla’ għal 6,028. Il-Ministru Zammit Dimech li kien qed iżur il-lukanda Le Meridien f’San Ġiljan, fakkar li fl-1995 in-numru ta’ lukandi ta’ Ħames Stilel kien ta’ ħamsa li bejniethom kellhom 1,274 sodda. Hu qal li dan ifisser li f’10 snin in-numru ta’ lukandi ta’ Ħames Stilel żdied bi tliet darbiet li kien filwaqt li n-numru ta’ sodod illum hu ħames darbiet dak li kien fl-1995.

Il-Ministru Zammit Dimech qal li minn seba’ proġetti għall-bini ta’ lukandi ġodda jew estensjonijiet li kienu approvati erbgħa minnhom mistennija jkunu inawgurati din is-sena u se jżidu n-numru ta’ sodod b’1,770. Hu qal li tlieta minn dawn il-proġetti huma għal lukandi ġodda filwaqt li proġett ieħor hu għal estensjoni ta’ lukanda eżistenti. Hu qal li dawn il-proġetti kienu kollha għal lukandi ta’ Ħames Stilel.

Il-Ministru għat-Turiżmu u Kultura qal li l-lukandi ta’ Ħames Stilel kienu ta’ importanza ewlenija biex pajjiżna seta’ jidħol fis-settur tal-konferenzi u inċentivi għaliex 76 fil-mija tal-viżitaturi li jiġu għal dawn il-konferenzi jagħżlu li joqgħodu f’lukandi ta’ Ħames Stilel. Il-Ministru Zammit Dimech qal li fl-ewwel ħdax-il xahar tas-sena li għaddiet 88,513 viżitatur żaru Malta bħala ‘business tourists’. Din kienet żieda ta’ 8.7 fil-mija fuq l-istess perijodu s-sena li għaddiet. Hu qal li n-numru ta’ delegati għal konferenzi li hu kkalkulat li żaru pajjiżna s-sena li għaddiet kien ta’ 63,000 jew żieda ta’ 6.8 fil-mija fuq l-2004. Il-Ministru Zammit Dimech fakkar li dawn il-viżitaturi jonfqu tliet darbiet it-turisti l-oħra li jżuru pajjiżna.

Il-Ministru Zammit Dimech qal li l-lukanda Le Méridien kienet żieda importanti għal-lukandi ta’ Ħames Stilel. Hu qal li din il-lukanda, li tinsab f’wieħed mill-isbaħ postijiet ta’ pajjiżna f’nofs il-bajja ta’ San Ġiljan u b’veduti mill-isbaħ tal-baħar, telgħet fl-art ta’ Villa Cassar Torreggiani li nbniet fit-18-il Seklu. Hu qal li l-villa qed tiġi rinovata biex isservi bħala dining area.

Il-Ministru għat-Turiżmu u Kultura faħħar l-inizjattiva tal-management ta’ Le Méridien li hu marbut li jimplimenta miżuri proattivi għall-protezzjoni u s-sostenn ta’ l-ambjent biex ikun imħares għall-ġenerazzjonijiet futuri. Hu qal li l-management tal-lukanda jrid jilħaq dan l-iskop b’miżuri li jbiegħdu t-tniġġiż, jnaqqsu l-ammont ta’ skart u biex il-ħaddiema jkunu aktar infurmati u konxji dwar l-ambjent. Hu qal li jinsab infurmat li wara l-ftuħ tal-lukanda se jitwaqqaf Kumitat dwar is-Saħħa Ambjentali u Sigurta’. Dan il-kumitat jrid jiżgura li l-politika ambjentali titmexxa ’l quddiem u tingħata l-importanza meħtieġa.

Il-Ministru għat-Turiżmu u Kultura qal li l-lukanda Le Méridien kienet se tikkontribwixxi wkoll lejn il-ħolqien ta’ impjiegi fil-qasam turistiku. Hu qal li din il-lukanda kienet se timpjega 160 ħaddiem full time u 40 part-time qabel tiftaħ. In-numru ta’ l-impjiegi kien jitla’ għal 180 ħaddiem full-time u 60 part-time sa Mejju 2006.

Il-Ministru Zammit Dimech fakkar li għat-tieni sena konsekuttiva n-numru ta’ turisti li żaru pajjiżna żdied. Hu qal li fl-2003 żaru Malta 1,118,237 turist, fl-2004 in-numru ta’ turisti li żaru pajjiżna tela’ bi 3.4 fil-mija għal 1,156,028 u l-għadd ta’ turisti li kellna s-sena li għaddiet (2005) mistenni jkun ta’ madwar 1,170,000.

Il-Ministru għat-Turiżmu u Kultura rringrazzja lis-sidien tal-lukanda u lill-management għall-fiduċja li għandhom fis-settur turistiku u awguralhom kull suċċess f’dan l-investiment ġdid tagħhom.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow