Left arrow Go Back

IL-GVERN IĦABBAR PROĊESS TA’ KONSULTAZZJONI PUBBLIKA DWAR IS-SETT TAL-MUNITI MALTIN TAL-EURO

pr0041
Date Icon 14/01/2006

“Fi żmien sentejn, Malta ser tkun għaddejja minn bidla tal-munita nazzjonali tagħha, l-ewwel waħda f’ħamsa u tletin sena u bidla li probabbilment bħala mhux ser ikun hemm għal żmien twil. Din hija bidla unika minħabba li, din id-darba, ser inkunu qed ningħaqdu fi proġett ta’ integrazzjoni monetarja li rnexxa,l-euro. Il-Gvern iħoss illi ċ-ċittadin Malti għandu jkollu sehem dirett fl-għażla tad-disinji għall-uċuħ nazzjonali tal-muniti tiegħu tal-euro u llum qegħdin nagħtu bidu għal proċess ta’ konsultazzjoni pubblika. Din hi, għalhekk,opportunita’li qatt ma kien hawn bħalha biex il-pubbliku jista’ jagħżel hu wiċċ għall-flus tiegħu u qegħdin inħeġġu lil kulħadd sabiex jagħti sehemhu f’din id-deċiżjoni storika” Dan qalu s-Segretarju Parlamentari Tonio Fenech waqt konferenza ta’ l-aħbarijiet li saret dalgħodu fil-Bank Ċentrali ta’ Malta. 

Il-Bank Ċentrali ta’ Malta u l-Kumitat Nazzjonali Għall-Bidla għall-Euro (NECC) qegħdin jagħtu bidu għal proċess ta’ konsultazzjoni pubblika għall-għażla tad-disinji għas-sett Malti tal-muniti ta’ l-euro. Il-pubbliku qed jiġi ppreżentat bi 12-il għażla maqsuma f’erba’ temi u qed jiġi mitlub jagħti l-għażla li jixtieq li tidher fuq il-wiċċ nazzjonali tas-sett tal-muniti ta’ l-euro. 

Fl-indirizz tiegħu lill-istampa, is-Segretarju Parlamentari fil-Ministeru tal-Finanzi, Tonio Fenech, flimkien mal-Gvernatur tal-Bank Ċentrali ta’ Malta, Michael C Bonello, u ċ-Chairman ta’ l-NECC, Joseph F X Zahra, ħabbar li l-proċess ta’ konsultazzjoni pubblika qiegħed jinbeda llum u jintemm il-Ħadd 29 ta’ Jannar 2006.  Matul dan il-perjodu, l-pubbliku huwa mħeġġeġ biex jibgħat SMS jew iċempel in-numru abbinat ma’ l-għażla preferuta tiegħu. Min jipparteċipa f’din il-konsultazzjoni jkun qiegħed jieħu sehem f’lotterija li għandha bħala premjijiet 20 biljett ta’ l-arju mogħtija mill-Air Malta għal kwalunkwe destinazzjoni tagħha, jew inkella numru ta’ settijiet ta’ telefoniċellulari mogħtija minn Go Mobile. Il-prezz ta’ kull SMS jew telefonata huwa l-prezz standard ta’ l-operatur. 

Is-Segretarju Parlamentari Fenech, li huwa ċ-Chairman tal-Euro Changeover Steering Committee, qal li din hija l-ewwel fażi tal-proċess pubbliku ta’ konsultazzjoni: “It-tieni fażi, li sejra sseħħ aktar tard matul l-2006 se tinvolvi proċess ta’ konsultazzjoni simili li matulu l-pubbliku ser jiġi mitlub jagħżel id-disinji finali għas-sett tal-muniti tal-euro.” Kif seħħ diġa’ f’xi wħud mill-iStati Membri ta’ l-UE, il-muniti ta’ l-euro ta’ Malta ser ikollhom tliet disinji differenti: wieħed għall-muniti ta’ l-euro u taż-żewġ euro, ieħor għall-muniti tal-ħamsin, għoxrin u għaxar ċenteżmi w ieħor għall-muniti tal-ħames ċenteżmi, żewġ ċenteżmi u ċ-ċenteżmu. 

Hu spjega li erba’ temi ġew magħżula, b’kull tema tkopri aspett speċifiku tal-qafas Malti, jiġifieri, il-preistorja ta’ Malta, Malta fir-Rinaxximent, tema li tirrappreżenta l-identita’ Maltija u oħra li tirrappreżenta l-arċipelagu Malti. Għal kull tema qed jingħataw tliet għażliet differenti: “Il-pubbliku qiegħed jiġi mitlub biex jagħmel l-għażla tiegħu billi jibgħat SMS vojt jew iċempel in-numru abbinat ma’ kull għażla.Qed tingħata wkoll l-opportunita’li wieħed jissuġġerixxi għażliet oħrajn billi jibgħat SMS fuq numru differenti. It-tliet għażliet minn tliet temi differenti li jirċievu l-akbar numru ta’ voti, ser iservu ta’ bażi għad-disinji tal-muniti. Dawn l-għażliet finali, aktar tard din is-sena jerġgħu jiġu ppreżentati lill-pubbliku biex jiddeċiedi l-aħħar għażla għad-disinn li ser jidher fuq is-sett tal-muniti tal-euro.” 

Is-Sur Fenech qal li l-Gvern, permezz ta’ kumitat konġunt imwaqqaf bejn il-Bank Ċentrali ta’ Malta u l-NECC, fassal proċess immirat lejn l-involviment tal-pubbliku:“Nixtiequ li dan ikun proċess tal-poplu. Nemmnu li huwa ta’ importanza li Malta ser ikollha s-sett tal-muniti tal-euro tagħha li jintużaw fl-Ewropa kollha. B’dan il-mod għandna l-opportunita’ li nippromwovu lil Malta permezz tas-sett tal-muniti ta’ l-euro, minħabba li x-xbihat fuq il-muniti jkunu qed jiċċirkolaw fl-iStati Membri ta’ l-U.E. Grupp ta’ numiżmatiċi w esperti fl-eraldika mqabbda mill-Bank Ċentrali ta’ Malta qagħdu attenti li jagħżlu temi u għażliet li m’humiex kontroversjali jew partiġjani.Għal din ir-raġuni ddeċidejna li mmorru għal temi assoċjati mal-patrimonju għani Malti, aktar milli għal personalitajiet jew figuri li jistgħu joħolqu kontroversja.” 

Is-Sur Fenech ħeġġeġ lill pubbliku biex jipparteċipa f’dan il-proċess: “Din hija opportunita’ unika biex nagħżlu wiċċ għall-flus tagħna. Qegħdin inħeġġu lill-pubbliku biex jieħu sehem f’din id-deċiżjoni mportanti. Il-bidla għal munita ġdida hija avveniment nazzjonali storiku u l-bidla għall-euro hija ta’ sinifikat partikolari għaliex tagħtina l-opportunita’ biex inpoġġu l-identita’ nazzjonali tagħna fuq munita internazzjonali soda. Fiha nfisha, din hija wkoll xhieda li, permezz tas-sħubija fl-UE, aħna tassew qed insaħħu l-identita’ tagħna.” 

Aktar informazzjoni fuq il-proċess ta’ konsultazzjoni nazzjonali tinkiseb mill-website tal-Bank Ċentrali ta’ Malta, www.centralbankmalta.com jew mill-website ta’ l-NECC, www.euro.gov.mt. Il-pubbliku ser ikun ukoll infurmat permezz ta’ riklamar fuq it-televiżjoni u fil-gazzetti matul il-perijodu tal-konsultazzjoni.

Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow