BIL-ĦIDMA FLIMKIEN NEGĦLBU KULL SFIDA
Il-Ministru għat-Turiżmu u Kultura Francis Zammit Dimech qal li huwa normali f’dan iż-żmien, illi niltaqgħu nawguraw lil xulxin l-isbaħ xewqat għas-sena il-ġdida. Il-Ministru qal dan fid-diskors li għamel waqt ikla fl-okkażjoni tal-Laqgħa Ġenerali Annwali tal-FATTA.
Hu qal li huwa żmien ukoll li nħarsu lura u nikkumentaw fuq is-sena li għadha kif spiċċat. Hu tenna li hu propju dan li se jagħmel. Hu qal li jixtieq li fil-qosor jagħti ħarsa lura lejn x’ġara fil-qasam tat-turiżmu f’Malta fit-tnax il-xahar li għaddew. Li jixtieq ukoll jaqsam mal-membri tal-FATTA dak li jawgura li jiġri din is-sena u x’ħidma beħsiebna nwettqu sabiex dan isir.
Il-Ministru Zammit Dimech qal li s-sena 2005 kienet sena ta’ importanza kbira għall-industrija tat-turiżmu għal tliet raġunijiet prinċipali:
o kienet is-sena li fiha ksibna riżultati pożittivi li jagħtuna kuraġġ għall-ġejjieni;
o kienet sena li fiha rristrutturajna l-Awtorità tat-Turiżmu; u
o kienet is-sena li fiha ospitajna il-laqgħa tal-Kapijiet tal-Gvern tal-Commonwealth u l-European Tourism Forum b’suċċess.
Il-Ministru għat-Turiżmu u Kultura qal li uża l-plural mhux għax qed jirreferi għall-Gvern b’mod kollettiv imma għaliex jemmen li dak li sar din is-sena twettaq għax ilkoll flimkien ġbidna ħabel wieħed. Hu qal li dan hu il-fatt li l-aktar li tispikka għalih is-sena li għaddiet, jiġifieri kemm nistgħu nkunu aktar effettivi meta lkoll naħdmu għall-istess skop.
Il-Ministru Zammit Dimech qal li semma t-tliet landmarks tas-sena li għaddiet. Hu qal li r-riżultati pożittivi li ksibna, speċjalment mis-suq Ingliż huma sinifikanti għax jixhdu interess ġdid jew mill-ġdid minn operaturi li fl-aħħar snin kienu qed inaqqsu l-volum tax-xogħol lejn pajjiżna. Hu qal li din il-bidla ma saritx b’kumbinazzjoni. “Saret wara ħidma intensiva, wara laqgħat fit-tul ma’ operaturi kbar li fihom smajna x’riedu mingħandna. Il-messaġġ li huma tawna aħna ddiskutejnieh mar-rappreżentanti ta’ l-industrija lokali, inkluż mal-FATTA,” qal il-Ministru Zammit Dimech li żied li rridu fix-xhur li ġejjin inkomplu nibnu fuq din il-ħidma. Hu qal li din il-ħidma twettqet fl-istess ħin li l-Awtorità tat-Turiżmu kienet ghaddejja bil-proċess tar-ristrutturar u fakkar kif fil-konferenza annwali ta’ l-Awtorità tkellimna ħafna fuq ir-ristrutturar u għalhekk ma kienx fi ħsiebu jidħol f’dan is-suġġett. Hu tenna kelma ta’ ringrazzjament għal kull min fehem li dan hu proċess li biex isir sew irid iż-żmien tiegħu. Hu sostna li din s-sena rridu nibdew naraw il-benefiċċji ta’ dan il-proċess.
Il-Ministru Francis Zammit Dimech qal li din kienet ukoll is-sena taċ-CHOGM u l-European Tourism Forum. “Hawn irrid ngħid grazzi partikolari lid-dirigenti tal-FATTA għall-appoġġ bla heda li taw li dawn iż-żewġ konferenzi. Naħseb li lkoll qbilna li bid-dinja tħares lejna ridna noħorġu bl-unuri. U hekk għamilna. Kull min ta sehmu żgur li llum iħares lura u jħossu kburi. Naf ukoll li hemm min qed ihares lura u jgħid la konna kapaċi nagħmlu hekk għax ma nidħlux għall-iktar minn dan ix-xogħol. Dan huwa l-ħsieb tagħna lkoll”, qal il-Ministru Zammit Dimech.
Il-Ministru għat-Turiżmu u Kultura qal li s-sena li ġejja se nkomplu nibnu fuq ix-xogħol li għamilna. Hu tenna li għandna sfidi kbar għax il-kompetizzjoni qiegħda kull ma jmur tiħrax, iżda għandna wkoll opportunitajiet kbar li joħorġu l-aktar mill-prodott turistiku uniku ta’ pajjiżna.
Il-Ministru Zammit Dimech ħa wkoll l-opportunità ta’ din il-laqgħa biex iħabbar li din is-sena l-Awtorità ta’ Malta għat-Turiżmu se tintensifika bil-kbir il-ħidma tagħha fil-qasam tal-marketing, anke b’riżultat tal-flus kollha li ffrankat (Lm600,000) fuq ħlasijiet amministrattivi. Il-ħidma ta’ l-Awtorità fis-sena l-ġdida se tinkludi kampanja ta’ pubbliċità favur Malta fuq in-network televisiv internazzjonali CNN, u fil-ġimgħat li ġejjin se jkollna ‘crew’ professjonali ta’ l-istess stazzjon f’pajjiżna biex jieħu filmati apposta għal dan l-iskop.
Il-Ministru għat-Turiżmu u Kultura qal li rridu nagħmlu hu li niżguraw li dan il-prodott niżviluppawh u nbiegħuh bl-aħjar mod. Hu qal li dan hu li rridu nagħmlu flimkien. Il-Ministru Zammit Dimech sostna li kien żgur li jekk inkomplu naħdmu kif ħdimna f’din is-sena li għaddiet negħlbu kull sfida.
Stqarrijiet Oħra:
PR261950en
PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...
PR261950