Left arrow Mur Lura

ŻVILUPPI FIS-SERVIZZI EDUKATTIVI GĦAL STUDENTI BI BŻONNIJIET SPEĊJALI

pr1888
Date Icon 29/12/2005

Il-Ministeru ta’ l-Edukazzjoni f’Lulju ta’ din is-sena ppubblika l-iSpiteri report li kien frott ta’ ħidma minn grupp ta’ professjonisti mmexxija mis-Sur Lino Spiteri li ngħataw l-inkarigu biex jannalizzaw b’reqqa żewġ setturi importanti fil-qafas tas-sistema edukattiva Maltija, dak ta’ l-edukazzjoni inklussiva u dik speċjali.  Il-grupp fi żmien anqas minn sitt xhur ppreżenta r-rapport Spiteri li jinkludi mhux biss analiżi kritika tas-sistema imma wkoll numru ta’ rakkomandazzjonijiet għat-titjib ta’ din l-istess sistema.  Il-Gvern beda minnufih jwettaq diversi mir-rakkomandazzjonijiet, fosthom: 

·           F’Awissu 2005, il-Ministeru u d-Diviżjoni ta’ l-Edukazzjoni fasslu pjan ta’ ħidma fuq kif se ssir l-ewwel fażi ta’ l-implimentazzjoni tar-rapport Spiteri 

·           F’ Awissu 2005, ġie mwaqqaf l-Education Reform Steering Group mmexxi mill-Ministru ta’ l-Edukazzjoni u li jinkludi fih is-Segretarju Permanenti, id-Direttur Ġenerali u l-koordinatur tal-politika fi ħdan il-Ministeru ta’ l-Edukazzjoni, Żgħażagħ u Xogħol.  L-iskop ta’ dan l-iSteering Group huwa li jmexxi r-riforma pass pass biex jaċċerta komunikazzjoni effettiva bejn il-partijiet kkonċernati u jevalwa kontinwament l-andament ta’ l-istess riforma. Waħda mill-ewwel deċiżjonijiet li ttieħdet kienet li s-setturi ta’ l-edukazzjoni inklussiva u dik speċjali jinġabru flimkien taħt tmexxija waħda kif kien irrakkomandat fir-rapport. 

·           F’Settembru 2005, sar il-proċess ta’ għażla wara sejħa għall-applikazzjonijiet u nħatar s-Sur George Borġ bħala Koordinatur tan-‘network’ ta’ l-iskejjel speċjali, kif ukoll ingħata l-inkarigu li jmexxi l-proċess ta’ twettiq tar-rakkomandazzjonijiet tar-rapport Spiteri. 

·           F’Settembru 2005, twaqqaf ċentru fil-Ħamrun minn fejn ser issir id-direzzjoni ta’ dan is-settur. 

·           L-Education Reform Steering Group beda jiltaqa’ regolarment mal-koordinaturi biex jevalwa kull pass tar-riforma u jiffaċilita l-proċess. 

·           Mal-bidu tas-sena skolastika l-ġdida, is-Sur Borġ beda jdur l-iskejjel speċjali, kif ukoll jidħol f’issues ta’ edukazzjoni inklussiva flimkien ma’ l-Assistent Direttur ta’ l-Edukazzjoni, is-sinjorina Myriam Aquilina. Il-Koordinatur beda jiltaqa’ mal-kapijiet ta’ l-iskejjel speċjali u beda jesplora l-metodi kif jistgħu jagħtu aktar appoġġ lil xulxin kemm fl-użu tar-riżorsi umani kif ukoll dawk materjali. 

·           Ir-rapport Spiteri jisħaq ħafna fuq il-bżonn ta’ taħriġ fis-settur ta’ l-edukazzjoni speċjali.  Biex din ir-rakkomandazzjoni tibda tiġi mwettqa ġie mistieden is-Sur John Ayres f’Ottubru 2005, espert fl-assessjar edukattiv ta’ tfal b’diżabiltà u ġew organizzati diversi sessjonijiet ta’ taħriġ għall-Kapijiet ta’ l-iskejjel speċjali, kif ukoll l-għalliema.  Minn dan it-taħriġ qed isiru sessjonijiet ta’ żvilupp professjonali bejn l-iskejjel speċjali fi ħdan in-network biex l-istaff li jaħdmu f’dawn l-iskejjel jiddentifikaw u jaħdmu flimkien fuq metodi ġodda ta’ tagħlim.  Dawn is-sessjonijiet qed isiru fi skejjel differenti fi ħdan in-network sabiex l-għalliema jkunu aktar infurmati fuq ir-riżorsi li jeżistu u kif jistgħu jkollhom aċċess għalihom. 

·          Fil-bidu tas-sena skolastika, tlett għalliema fl-iskejjel speċjali ngħataw scholarship biex jagħmlu Master’s Degree ma’ l-Università ta’ Birmingham f’oqsma speċjalizzati, bħal autism, multisensory impairment u visual impairment. 

·           Ir-rapport Spiteri rrakkomanda wkoll li dawk il-facilitators li m’għandhomx taħriġ, jiġu offruti opportunità ta’ dan.  B’dan l-iskop, ġie mfassal kors li se jiġi offrut volontarjament li dawk li qed jagħmlu xogħol ta’ facilitators.  Il-ħsieb huwa li dan il-kors jibda fl-ewwel xhur tas-sena l-ġdida.  Diġà bdew ukoll taħditiet ma’ l-Università ta’ Malta biex dan il-kors jiġi kkunsidrat jekk l-istess parteċipanti japplikaw għall-kors fl-livell ta’ diploma ma’ l-Università ta’ Malta. 

·           F’Novembru 2005, beda jiltaqa’ l-Kunsill tal-Kapijiet ta’ l-Iskejjel speċjali u flimkien tfasslu l-prioritajiet għas-sena skolastika.  Il-Kapijiet Carmen Cascun mill-iskola Helen Keller, Anthony Galea, mill-iskola Dun Manwel Attard, Duncan Mercieca, mill-iskola San Miguel u Carmelo Pace, mill-iskola Guardian Angel jiffurmaw parti mill-Kunsill. 

·           Il-Koordinatur tan-network ta’ l-iskejjel speċjali qed jiġbor u jagħmel analiżi ta’ informazzjoni miġbura mill-iskejjel biex isiru profile ta’ studenti li jattendu l-iskejjel speċjali, kif ukoll ġbir ta’ data ħalli jkun jista’ jiġi ppjanat aħjar it-tranżizzjoni ta’ studenti li spiċċaw l-iskola sekondarja u għandhom il-ħsieb li jkomplu bl-istudji tagħhom. 

·           Ir-rapport Spiteri jirrakkomanda l-introduzzjoni ta’ servizzi ġodda bħal personal care assistant u sign language interpreter għall-studenti li jkollhom bżonn dan is-servizz u mhux dak ta’ facilitator.  Il-Koordinatur ta’ l-iskejjel speċjali qed ifassal deskrizzjoni tar-rwol ta’ assistant għall-bżonnijiet personali u l-Ministeru fil-bidu ta’ din is-sena skolastika wasal fi ftehim ma’ l-Għaqda Persuni Neqsin Mis-Smigħ u xtara s-servizzi ta’ interpreti tal-lingwa tas-sinjali li bdew xogħolhom minnufih ma’ studenti neqsin mis-smigħ, kemm fil-livell ta’ edukazzjoni obbligatorja, kif ukoll fl-MCAST.  Ta’ min wieħed jgħid ukoll li l-Ministeru ħa passi biex din is-sena skolastika jiġu ngaġġati aktar għalliema peripatewtiċi biex jagħtu servizz lill-studenti neqsin mis-smigħ. 

·           L-istess rapport Spiteri jikkummenta fuq il-bżonn li f’Malta jkollna aktar nies speċjalizzati fl-oqsma konnessi ma’ l-edukazzjoni speċjali u inklussiva.  F’Diċembru 2005, rappreżentanta tal-Ministeru, flimkien mas-Sur George Borġ intbagħtu l-Ingilterra għal negozjati sabiex jiġu offruti korsijiet fl-livell ta’ Masters u f’forma ta’ distance learning lill-numru ta’ għalliema Maltin li jixtiequ jispeċjalizzaw f’oqsma bħal autism, challenging behaviour, hearing impairment, visual impairment u profound multiple learning disabilities.  Il-ħsieb hu li fl-ewwel xhur tas-sena l-ġdida jiġu konklużi n-negozjati u jibda l-proċess ta’ applikazzjonijiet għal dawk kollha interessati. 

Il-Ministeru ta’ l-Edukazzjoni u d-Diviżjoni huma mpenjati li jżommu r-ritmu qawwi li beda f’dawn ix-xhur mill-pubblikazzjoni tar-rapport Spiteri, biex kull rakkomandazzjoni possibbli tiġi mplimentata, bl-iskop ewlieni li l-kwalità ta’ servizz edukattiv li qed jingħataw lill-studenti b’diżabiltà jitjiebu u jgħinu lill-istess studenti jiżviluppaw kull ħila possibbli. 

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow