Left arrow Mur Lura

GWIDI ĠODDA GĦALL-KWALIFIKI FIS-SETTUR VOKAZZJONALI

pr1881
Date Icon 28/12/2005

Pass importanti ieħor fis-sistema ta’ edukazzjoni u taħriġ vokazzjonali hu t-twaqqif  ta’ gwidi ġodda għall-kwalifiki u kompetenzi. Bis-saħħa ta’ regolamenti ġodda l-Gvern waqqaf il-Kunsill Malti għall-Kwalifiki li ser jaħdem biex f’Malta ikun hawn Qafas Nazzjonali ta’ Kwalifiki li jqarreb id-dinja tax-xogħol, u l-edukazzjoni u taħriġ. Il-Kunsill se jieħu post il-Kunsill Malti għall-Kwalifiki Professjonali u Vokazzjonali li kien twaqqaf fis-sena 2000. Iċ-Chairman tal-Kunsill il-ġdid hu s-Sur Charles Mizzi li okkupa diversi karigi fis-settur edukattiv u li sa ftit xhur ilu kien is-Segretarju Permanenti fil-Ministeru ta’ l-Edukazzjoni, Żgħażagħ u Xogħol.  

Il-kwalifiki u l-kompetenzi huma strument importanti ferm għad-dinja tax-xogħol. Permezz tagħhom l-individwu jkollu aċċess aħjar għal kif ukoll għall-edukazzjoni u taħriġ ieħor matul il-ħajja. Huwa fuq dan il-prinċipju li ġew imfassla dawn il-kwalifiki u kompetenzi li għandhom jiftħu l-bibien għal aktar tagħlim u taħriġ għall-istudenti u l-ħaddiema tagħna. Il-livelli ta’ kwalifiki u kompetenzi li ġew stabbiliti jkopru s-sistema kollha ta’ edukazzjoni tul il-ħajja u jirriflettu l-livelli ta’ kwalifiki u kompetenzi kif qed jiġu proposti mill-Kummissjoni ta’ l-Unjoni Ewropeja.  

Il-Kunsill Malti għall-Kwalifiki ser jiggwida ruħu minn dawn il-livelli ta’ kwalifiki u kompetenzi biex fuqhom isejjes, wara konsultazzjoni wiesa’, il-Qafas Nazzjonali tal-Kwalifiki. Dan il-pass jorbot tajjeb ħafna mar-riformi li qed iseħħu fis-sistema edukattiva li huma maħsuba li jsaħħu l-kunċett ta’ Edukazzjoni tul il-Ħajja. Fil-prattika dan għandu jissarraf fil-ħolqien ta’ passaġġi (pathways) li jiffaċilitaw il-mixja edukattiva bejn il-kwalifiki kollha fis-sistema edukattiva Maltija. Huwa permezz ta’ dawn il-passaġġi illi ntejjbu l-opportunitajiet biex l-edukazzjoni vokazzjonali tkun tassew attrajenti u effettiva.  

Il-pajjiż illum għandu sfidi u opportunitajiet importanti ħafna. Malta hija parti minn suq ta’ kważi 500 miljun ruħ. Il-proċess ta’ globalizzazzjoni, l-avvanzi fix-xjenza u t-teknoloġija, u l-esiġenzi ġodda tal-ħajja moderna huma fatturi li qed jirristrutturaw id-dinja tax-xogħol, b’impjiegi li jmutu u oħrajn li jitwieldu. Dawk li għandhom livell tajjeb ta’ edukazzjoni u t-taħriġ għandhom ħafna aktar ċans li jkollhom xogħol minn dawk li ħarġu kmieni mis-sistema edukattiva. L-Unjoni Ewropea qed timmira li sas-sena 2010, l-medja ta’ dawk li jħallu kmieni l-edukazzjoni ma jkunx ta’ aktar minn 10%. Dan ifisser li l-edukazzjoni u t-taħriġ għandhom l-isfida li mhux biss jipprovdu edukazzjoni rilevanti u ta’ kwalita’, iżda wkoll li din tiftaħ il-bibien lil kulhadd għall-edukazzjoni tul il-ħajja inkluż dik terzjarja. 

L-iskop prinċipali tal-Kunsill Malti għall-Kwalifiki hu li jaħdem għall-iżvilupp ta’ Qafas Nazzjonali tal-Kwalifiki u li jissorvelja t-taħriġ u ċ-ċertifikazzjoni li jipprovdi istituzzjonijiet pubbliċi, bħal MCAST u oħrajn privati. F’dan l-istadju l-Kunsill mhux ser jidħol fi kwalifiki li diġa qed jiġu provduti mill-istituzzjonijiet ta’ edukazzjoni obbligatorja jew korpi li jagħtu lawriji. Il-funzjonijiet l-oħra tal-Kunsill huma li: 

(a) jistabbilixxi u jżomm qafas ta’ kwalifiki biex jiżviluppa, jakkredita u jagħti l-kwalifiki professjonali u vokazzjonali, barra minn lawrja, ibbażati fuq standards ta’ għarfien, ħiliet, kompetenzi u attitudnijiet miksuba mill-individwi;

(b) iġib ’l quddiem u jiffaċilita l-aċċess, it-trasferiment u l-progress ta’ studenti u ħaddiema fit-tagħlim tul il-ħajja kollha tal-bniedem;

(c) jinkoraġġixxi r-rikonoxximent f’pajjiżi barranin ta’ ċertifikati professjonali u vokazzjonali mogħtija f’Malta taħt dawn ir-regolamenti.  

Din ir-riforma qed isseħħ fil-kuntest ta’ riformi oħra li l-Gvern qed jagħmel fis-settur edukattiv partikolarment: 

·     fis-settur ta’ edukazzjoni obbligatorja bit-twaqqif tal-Kulleġġi Reġjonali;

·     fis-settur ta’ l-edukazzjoni terzjarja bil-pjan ta’ riforma tal-finanzjament ta’ l-Edukazzjoni Għolja u Terzjarja u l-proposta tat-twaqqif tal-Kummissjoni ta’ l-Edukazzjoni Għolja skond ir-Rapport Chalmers;

·     fis-settur ta’ l-eżamijiet bil-proposti tar-Rapport Grima dwar riforma fil-MATSEC biex Malta jkollha sistema ta’ eżamijiet fuq l-ogħla livelli internazzjonali;

·     fis-settur ta’ l-Edukazzjoni Inklussiva u Speċjali bi proposti tar-Rapport Spiteri;

·     fis-settur ta’ l-attendenza ta’ l-istudenti fl-istituzzjonijiet edukattivi biex b’hekk ngħelbu l-assentejiżmu kif jipproponi r-Rapport Clarke. 

Il-Kunsill Malti għall-Kwalifiki għalhekk huwa ħolqa oħra mportanti ħafna fl-iżvilupp ta’ l-edukazzjoni u t-taħriġ. Dan il-Kunsill għandu jwassal biex l-istudenti u l-ħaddiema Maltin u Għawdxin, kif ukoll minn iħaddem, ikollu stampa ċara tar-rabta bejn kwalifika u oħra kif ukoll bejn il-kwalifiki u l-istandards okkupazzjonali kif mitluba mid-dinja tax-xogħol. Dan hu pass importanti ieħor biex nipprovdu edukazzjoni ta’ kwalita’ tul il-ħajja li twassal għat-twettiq l-aktar sħiħ tal-potenzjal ta’ kull individwu f’kuntest ta’ kompetittivita’ u intraprenditorjalita`.  

Kif stqarr fid-dokument ta’ qabel il-budget, il-Gvern huwa mpenjat u determinat biex jaġġorna u jtejjeb l-għarfien u l-ħiliet tal-ħaddiema kollha permezz ta’ l-introduzzjoni ta’ qafas nazzjonali ta’ kwalifiki vokazzjonali. Dan il-qafas nazzjonali ta’ kwalifiki vokazzjonali għandu jwassal għal aktar ċertezza fit-tifsira tad-diversi tipi ta’ kwalifiki u jippermetti li l-kwalifiki jiġu mqabbla b’mod aktar faċli biex b’hekk tiġi facilitata l-mobilita` ta’ l-istudenti minn livell jew istituzzjoni għal ieħor.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow