Left arrow Mur Lura

MESSAĠĠ TAL-MILIED U L-EWWEL TAS-SENA MILL-PRIM MINISTRU, L-ONOR LAWRENCE GONZI

pr1872
Date Icon 24/12/2005

Ħuti Maltin u Għawdxin,

Erġajna ninsabu lejliet il-Milied u sena ġdida oħra. Sena wara sena, niċċelebraw dawn il-ġranet ta’ festi li għandhom tifsira tassew speċjali għalina l-Maltin u l-Għawdxin.

Il-ġrajja tal-Milied għaddewielna l-ġenituri tagħna, u aħna, għaliex tant ngħożżuha u ngħarfu l-importanza ta’ dak li qed niċċelebraw f’dawn il-ġranet, irridu ngħadduha wkoll lil uliedna.

Din il-ġrajja m’hijiex biss ir-rakkont li nismgħu fit-tfulija, iżda ġrajja li tkompli sseħħ madwarna. Hija ġrajja ta’ taħbit, ta’ tama u fidi, ta’ familja li fi żmien diffiċli tfittex il-kenn, familja li taħdem biex ittejjeb il-qagħda tagħha. Matul is-sena li għaddiet, rajna din l-istorja sseħħ madwarna kemm-il darba u f’ħafna modi differenti. Rajniha f’familji madwar id-dinja jippruvaw jgħelbu t-tbatija u jissaraw kontra l-firda. Rajniha f’persuni jfittxu l-kenn f’pajjiżna filwaqt li pajjiżhom għaddejjin minn żminijiet diffiċli.

F’dawn il-festi ta’ ferħ, niftakru b’mod speċjali f’dawk in-nies li qed ibatu, anke f’pajjiżna. Hemm min tilef ix-xogħol dan l-aħħar, jew jixtieq jaħdem u għadu ma sabx xogħol. Hemm min qed jiffaċċja l-mard jew rikbu xi vizzju. Hemm min tilef lil xi ħadd qrib tal-familja. Jiena nemmen li l-isbaħ awgurju tagħna lil dawn in-nies huwa t-tisħieħ tad-determinazzjoni tagħna lkoll biex nagħmlu dak kollu possibbli biex fit-tbatija tagħhom isibu l-għajnuna kollha li għandhom bżonn u li s-sena d-dieħla tkun għalihom ukoll ahjar minn dik li wasalna biex nispiċċaw.

Din is-sena, kellna l-opportunità li bħala Nazzjon nagħtu sehem dirett biex numru ta’ pajjiżi jtejbu l-mod kif jikkollaboraw u jaħdmu flimkien. Kapijiet ta’ Gvernijiet, rappreżentanti tan-negozju, taż-żgħazagħ u tas-soċjetà ċivili minn aktar minn 50 pajjiż differenti ltaqgħu f’pajjiżna biex fi spirtu ta’ paċi u solidarjetà ddiskutew u qablu dwar kif jistgħu jikkontribwixxu għall-iżvilupp aħjar ta’ pajjiżhom. Qiegħed nirreferi għal-Laqgħa tal-Mexxejja tal-Pajjiżi tal-Commonwealth li saret f’pajjiżna. Bħala Malti u bħala mexxej ta’ dawn id-diskussjonijiet, jien tassew kburi li Malta .../... għażlet li taħdem favur l-iżvilupp permezz tad-djalogu, permezz tal-għaqda u solidarjetà bejnietna. F’dan is-sens, dan il-Milied tassew nistgħu niċċelebraw il-fatt li Malta kompliet tgħożż u tkattar il-valuri tas-solidarjetà u l-kollaborazzjoni; valuri li tul iż-żminijiet wassluna biex inkunu dak li aħna llum, nazzjon li jaħdem favur il-paċi, nazzjon dinjituż u ħieles, li jagħraf id-diffikultajiet u jikkontribwixxi b’mod dirett biex dawn id-diffikultajiet jiġu ndirizzati.

Il-mogħdija taz-żmien iġġib magħha realtajiet ġodda. Nemmen li quddiem ir-realtajiet ġodda li ħa ġġib magħha żgur is-sena li ġejja, aħna l-Maltin għandna nistinkaw biex inkomplu nħarsu l-valuri tant għeżież għalina. B’dan ma nixtieqx infisser li għandna nibqgħu staġnati jew li ma nimxux mal-progress. Għal kuntrarju, irridu niffaċċaw il-ġejjieni b’kuraġġ u b’karattru. Illum nagħrfu li l-bidla hija parti integrali minn ħajjitna, realtà li ma nistgħux u m’għandniex nippruvaw naħarbu minnha. Il-bidla ġġib magħha kemm sfidi u kemm opportunitajiet. L-identità u t-twemmin tagħna bla dubju jissarfu fil-mod kif inġibu ruħna quddiem dawn is-sitwazzjonijiet ġodda li nkunu il-ħin kollu naffrontaw.

Hija x-xewqa tiegħi li permezz tat-tradizzjonijiet sbieħ tagħna, il-valuri u t-twemmin marbuta ma’ dawn il-festi tant għeżież, niċċelebraw l-identità tagħna, li hija marbuta ukoll mill-qrib mal-ġrajja tal-Milied. Filwaqt li jiena ċert li l-Milied għandu tifsira unika u speċjali għal kull wieħed u waħda minna, din il-festa għandha wkoll tifsira għalina bħala poplu Malti. Iċ-ċelebrazzjonijiet, il-presepji, il-ġenerożità u tradizzjonijiet oħra ta’ dawn il-ġranet huma kollha kemm huma mgħaġuna ma’ l-identità tagħna lkoll.

Fil-Milied ma jistax jonqos li niftakru fi qrabatna u ħbiebna li għalkemm ħallew Malta u ġew milqugħa f’pajjiżi oħra, fejn rawwmu opportunitajiet tajba għall-familji tagħhom, baqgħu Maltin b’identità qawwija u komplew iħaddnu l-valuri tagħna.

F’dinja li qiegħda dejjem tiċkien, l-importanza ta’ din l-identità tagħna tidher ċara daqs il-kristall. Kif jafu l-ħbieb u l-qraba tagħna l-Maltin li jgħixu ’l barra minn xtutna, huwa proprju meta niltaqgħu ma’ popli oħrajn li jispikkaw is-saħħa u l-valur ta’ l-identità tagħna. Pajjiżna qed jiltaqa’ iktar spiss ma’ nazzjonijiet u popli oħra. Dan il-kuntatt iġib miegħu l-opportunità biex bħala Nazzjon insaħħu l-identità tagħna bħala Maltin, niskopru lilna nfusna u nsostnu dawk il-valuri li tant aħna magħrufin għalihom - il-valur tal-familja, il-valuri tar-rispett lejn xulxin, l-għaqda bejnietna, il-bżulija u s-solidarjetà. Huwa f’dan l-ispirtu ta’ djalogu u solidarjetà tal-Milied li nixtieqna nkomplu mexjin fil-futur; spirtu li fih il-poplu Malti dejjem fjorixxa u kiseb suċċessi kbar!

Jiena, il-mara tiegħi Kate u l-familja tagħna, kif ukoll il-Gvern li jien imexxi, nixtiequ lilkom ilkoll ħuti Maltin u Għawdxin il-Milied it-tajjeb, mimli sliem u saħħa, u sena mimlija b’kull rizq, hena u barka.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow