Left arrow Mur Lura

MESSAĠĠ GĦALL-MILIED U L-EWWEL TAS-SENA MILL-PRIM MINISTRU, L-ONOR LAWRENCE GONZI LILL-MALTIN U GĦAWDXIN LI JGĦIXU BARRA MINN MALTA

pr1857
Date Icon 20/12/2005

Ħuti Maltin u Għawdxin li tgħixu barra minn Malta, 

Nixtieq inwasslilkom l-isbaħ xewqat tiegħi u tal-Gvern Malti għal dawn il-ġranet tal-festi tal-Milied u għas-sena l-ġdida.  Għalkemm mifrudin bid-distanzi ta’ bejnietna, dawn iż-żminijiet, li għandhom tifsira tant speċjali għalina l-Maltin, għandhom jgħinuna nħossuna aktar qrib xulxin.  Żgur li ħafna minnkom f’dawn il-ġranet ikollhom kuntatt speċjali ma’ qrabathom u ħbiebhom li jgħixu hawn Malta.  

Kif tafu tajjeb, Malta din is-sena ospitajna l-Laqgħa tal-Kapijiet tal-Pajjizi tal-Commonwealth, li kienet opportunità oħra fejn aħna l-Maltin urejna lid-dinja dak li verament aħna – poplu kapaċi, poplu ospitabbli li jħaddan il-valuri tal-paċi u li jemmen fis-solidarjetà.  Aħna l-Maltin u l-Għawdxin urejna li nemmnu li l-iżvilupp ma jitwettaqx permezz ta’ prepotenza jew firda, iżda permezz ta’ l-għaqda, ħelsien u paċi li tant ngħożżu.  J’Alla dawn il-valuri jibqgħu jispiraw lilna l-Maltin, inkunu fejn inkunu. 

L-esperjenza pożittiva ta’ din il-laqgħa f’pajjiżna wrietna wkoll li kollaborazzjoni bejn il-kulturi ma tfissirx biss periklu u sfidi għall-identità tagħna, iżda tfisser ukoll ħafna opportunitajiet li jistgħu jissarfu f’riżultati ferm pożittivi.  Bħala parti minn dinja li qiegħeda dejjem tiċkien, fejn nazzjonijiet u popli kull ma jmur dejjem iffittxu aktar li jikkollaboraw ma’ xulxin, Malta ssib ruħha f’kuntatt ma’ kulturi barranin f’diversi sitwazzjonijiet, fosthom permezz tal-familja Ewropea, tat-turisti li jżuruna, tas-suq globali u ta’ nies li jfittxu l-kenn f’pajjiżna.  Dan il-kuntatt iġib miegħu l-opportunità biex bħala Nazzjon u poplu Malti u Għawdxi, insaħħu l-identità tagħna. Għandna l-opportunità biex insaħħu l-wirt u r-riżorsi tagħna u biex naqsmu l-esperjenzi u l-għerf kif ukoll niżviluppaw u nitgħallmu mill-ohrajn.  B’hekk inkunu qed insaħħu l-identità tagħna u nużawha għall-ġid komuni.  

Il-Milied huwa wkoll ġrajja ta’ taħbit, ta’ tama u fidi, ta’ familja li fi żmien ta’ diffikultà tfittex il-kenn u meta fil-periklu tfittex ħajja aħjar. Dan iż-żmien jippreżenta lil kull wieħed u waħda minna l-opportunità li niefqu u naħsbu dwar il-kontribut li nistgħu nagħtu, kemm bħala individwi kif ukoll bħala pajjiż, biex intejbu sitwazzjonijiet ta’ min hu għaddej minn żminijiet bħal dawn. 

F’dan is-sens ma nistax ma nsemmix l-immigrazzjoni irregolari, li hawn Malta qed nesperjenzaw partikolarment mill-qrib f’dawn l-aħħar snin.  Meta pajjiżna kien għaddej minn żminijiet diffiċli, ħafna minnkom sibtu opportunitajiet li tibnu futur sabiħ għalikom u għall-familji tagħkom f’pajjiżi oħra.  Din it-tama għal ħajja aħjar twassal lil xi persuni minn pajjiżi fejn hemm il-gwerrer u l-faqar biex jitilqu għal għonq it-triq, fi triq li twassal lil uħud minnhom fostna.  Intom li mxejtu lejn pajjiż barrani tafu sew xi sfidi ġġib magħha din is-sitwazzjoni. F’sens ispirat mill-ġrajja tal-Milied, meta l-familja ta’ Betlem intlaqgħet għal xi żmien barra minn pajjiżha, aħna qed nistinkaw biex nagħtu kenn lil dawk li jistħoqqilhom, u naħdmu biex anki huma jsibu futur aħjar f’pajjiżi oħra.  

U f’dan iż-żmien tas-sena ma nistax nonqos milli nsemmi li ċ-ċentru ta’ dak kollu li nemmnu fih u li naħdmu għalih isib il-milja tiegħu fil-familji tagħna.  Il-Milied huwa żmien li fih il-familji jingħaqdu aktar minn kull żmien ieħor filwaqt li jġeddu l-għożża li għandhom għal xulxin.  Huwa b’dan l-għan ewlieni li għandna nħasru ’l quddiem lejn sena oħra ta’ ħidma għall-ġid tal-familji Maltin u Għawdxin. 

Matul din is-sena kelli l-okkażjoni u x-xorti li niltaqa’ m’uħud minnkom meta żort l-iStati Uniti.  Esperjenza li laqtitni immens meta rajt il-mod li bih il-komunitajiet Maltin tant jibqgħu maqgħuda, anki jekk integrati tajjeb ħafna u rispettati immens fil-komunità li laqgħathom.  L-awgurju tiegħi għalikom ilkoll huwa li tibqgħu tħaddnu il-valuri tar-rispett lejn xulxin, il-valur tal-familja u l-għaqda kif ukoll tal-bżulija u s-solidarjetà, li jagħmlukom Maltin filwaqt li toħolqu opportunitajiet għalikom, għal familji tagħkom u l-pajjiżi li tgħixu fihom.  Nistenna bil-ħerqa li jkolli opportunità niltaqa’ m’aktar komunitajiet Maltin barra minn Malta matul is-sena li ġejja. 

F’ismi, f’isem il-mara tiegħi Kate u l-familja tagħna u għan-nom tal-Gvern Malti kollu nixtieq lilkom ilkoll Maltin u Għawdxin li tgħixu barra minn xtutna Milied ħieni u nawgurawlkom sena mimlija risq, saħħa u sliem.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow