Left arrow Mur Lura

MESSAĠĠ MILL-PRESIDENT TA’ MALTA, L-E.T. DOTT. EDWARD FENECH ADAMI, GĦALL-MILIED U S-SENA L-ĠDIDA LILL-MALTIN U L-GĦAWDXIN LI JGĦIXU BARRA MINN MALTA

pr1856
Date Icon 20/12/2005

Ħuti Maltin u Għawdxin li tgħixu barra minn pajjiżna,  

Naħseb li hija drawwa tajba ħafna, dik li ilha issa li daħlet f’pajjiżna, li l-President ta’ Malta f’dawn iż-żminijiet tal-Milied u ta’ l-Ewwel tas-Sena, jindirizza mhux biss lil Maltin li ngħixu f’pajjiżna, imma anke lilkom, intom li għal tant snin servejtuna bħala Ambaxxaturi tagħna; bħal nies li wrejtu lil kumplament tan-nies li jgħixu fil-pajjiżi fejn qedgħin bħalissa, min huma l-Maltin, x’jiswew il-Maltin, x’isarrfu l-Maltin u ta’ dan kollu naħseb li għandna nirringrazzjawkom.  

Huwa żmien meta nagħtu l-awguri lil xulxin, nixtiequ l-Milied it-tajjeb, nixtiequ s-Sena t-Tajba lil xulxin. U għandna bżonn ħafna li nixtiequ dawn ix-xewqat sbieħ biex ngħarrfu kif ngħixu ż-żminijiet tagħna. Kif nilqgħu l-problemi li kull wieħed u waħda minna jiltaqa` magħhom matul is-sena. Is-sena li għaddiet kienet sena, forsi nistgħu nsejħulha kważi eċċezzjonali għal pajjiżna. Per eżempju, qatt ma kien ġara li Malta tilqa’ l-pajjiżi tal-Commonwealth. Kif tafu f’Novembru, kellna f’pajjiżna, tnejn u ħamsin kap ta’ gvern jew kap ta’ stat tal-pajjiżi kollha tal-Commonwealth. Kellna l-Prim Ministru ta’ l-Awstralja, kellna Ministru li rrapreżenta l-Prim Ministru tal-Kanada li ma setgħax jiġi. Kellna diversi pajjiżi kbar u żgħar li jiffurmaw il-Commonwealth.  

Kien hawn min ħaseb li Malta hija pajjiż żgħir wisq biex jorganizza laqgħa bħal din. Jiena kelli okkażjoni mmur jiena stess għal tmien laqgħat minn dawn tal-Commonwealth. U hija verament organizzazzjoni qawwija ħafna biex tilqa tant kapijiet ta’ Gvern. F’Malta ilqajniehom u rnexxielna nuru li kapaċi norganizzaw anke laqgħa hekk kbira ta’ tlieta u ħamsin pajjiż f’Malta fl-istess ħin. U ħriġna bl-unuri: ħriġna bl-unuri fl-organizzazzjoni, ħriġna bl-unuri bil-mod kif saru d-diskussjonijiet taħt it-tmexxija tal-Prim Ministru tagħna li ppresjeda l-laqgħa tal-Commonwealth hawnhekk. Irnexxielna nuru kif kapaċi wkoll bid-diskussjoni, insibu fuq x’hiex naqblu u t-tnejn u ħamsin Kap ta’ Gvern tal-Commonwealth irnexxielhom joħorġu tliet dikjarazzjonijiet importanti, magħrufin waħda bħala d-dokument, ir-Reżoluzzjoni tal-Belt Valletta, ir-Reżoluzzjoni ta’ Malta, ir-Reżoluzzjoni dwar Għawdex. Kien suċċess, u nieħdu pjaċir li rnexxielna nuru min aħna.  

L-iktar li wrejna kien min hu l-poplu. Huwa poplu li jaf xi tfisser ospitalita’, kif tilqa’ lil ħaddiehor kif tilqa’ partikolarment lill-barrani li jsib ruħu f’pajjiżek. Jiena ma smajtx ħlief kliem ta’ tifħir ta’ kif l-affarijiet imxew hawn Malta. Dak huwa t-tajjeb li rajna.  

Naturalment meta nħarsu lura naraw affarijiet li ġraw kemm f’pajjiżna kemm ukoll barra minn pajjiżna. F’pajjiżna kellna l-problemi kif għandhom il-problemi kollha ta’ l-ekonomija. Sfortunatament numru ta’ ħaddiema, eluf, tilfu l-postijiet tax-xogħol tagħhom. Uħud sabu postijiet tax-xogħol ġodda, oħrajn għadhom jistennew bla xogħol, nittamaw li s-sena d-dieħla ġġib opportunitajiet biex dawk li tilfu l-post tax-xogħol tagħhom jsibu postijiet ġodda fejn jistgħu jaħdmu.   

Traġedji, kellna minnhom ukoll hawn Malta. Naħseb anke intom fl-Awstralja u fil-Kanada smajtu b’dik id-diżgrazzja meta ħames żgħażagħ mill-Qrendi tilfu ħajjithom waqt li kienu sejrin lura lejn djarhom – żgħażagħ mimlijin enerġija. Kien għalija bħala President mument ta’ dieqa kbira illi mmur għal funeral tagħhom. Jekk inħarsu lejn x’ġara f’pajjiżi oħra ma nistgħux ninsew it-Tsunami li qatel tant eluf ta’ nies. Ma ninsewx it-traġedja li kien hemm bit-terrimot fil-Pakistan u għal darb’oħra f’dawk l-okkażjonijiet il-Maltin urew xi tfisser is-solidarjeta’, li aħna jimpurtana minn ħaddieħor.  

Kienet sena nerġa’ ngħid, kif jkunu s-snin kollha, b’mumenti ta’ ferħ u mumenti ta’ niket. Kellna mumenti ta’ ferħ meta ġew jżuruna hawn Malta kapijiet ta’ Stat, onorawna bil-preżenza tagħhom. Kellna l-President ta’ Ċipru li ġie Malta fi Frar ta’ din is-sena, kellna l-President ta’ l-Italja, il-President Ciampi, li għamel viżita statali f’Mejju ta’ din is-sena. Imbgħad, kellna r-Reġina – ir-Reġina tar-Renju Unit, ir-Reġina tagħkom l-Awstraljani u tal-Poplu tal-Kanada - u l-Kap tal-Commonwealth,  li għal darb’oħra ġiet fostna u nista’ nassigurakom, għax hekk qalet lili, kemm ħadet pjaċir terġa’ tiġi f’dan il-pajjiż fejn hi għexet. L-uniku post fid-dinja barra l-Ingilterra fejn qattet parti minn ħajjietha toqgħod hemm, għal ċertu tul ta’ żmien.  

Inħarsu lejn is-sena l-ġdida. Naturalment għad hemm l-isfidi. Għad għandna per eżempju l-problema tal-Palestina li għad m’hiex riżolta għalkemm issa wieħed jista’ jara xaqq ta’ dawl.  Għad għandna l-problema ta’ l-Iraq, li għadu poplu jfittex sovranita’ b’mod illi l-istat sovran tagħhom jirrispetta liċ-ċittadini Iraqini kollha. Ma naqtgħux qalbna. Irridu nħarsu ’l quddiem b’fiduċja u b’kuraġġ.  

Aħna hawn Malta, naħseb li nista’ ngħid f’isem kulħadd, li għandna kuraġġ li nħarsu lejn is-sena l-ġdida b’tama kbira li nibqgħu mixjin ’il quddiem ilkoll niġbdu ħabel wieħed, lkoll infittxu l-ġid tal-poplu tagħna. U għalhekk jiena nittama illi s-sena dieħla tkun sena mimlija risq u hena. 

Nispiċċa billi nawguralkom ilkoll Milied hieni fost il-familji tagħkom u nawguralkom suċċessi fis-sena d-dieħla.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow