SISTEMI TA’ BIEDJA SOSTENIBBLI JWASSLU GĦALL-ĦARSIEN AKBAR TA’ L-AMBJENT
L-użu fil-prattika ta’ sistemi ta’ biedja sostenibbli jwasslu għall-ħarsien akbar ta’ l-ambjent. Biedja sostenibbli u li tħares l-ambjent twassal ukoll biex igawdi l-bidwi nnifsu u l-konsumatur permezz ta’ prodotti aħjar u ta’ kwalita’ akbar bi prezzijiet irħas.
Dan qalu l-Ministru għall-Affarijiet Rurali u l-Ambjent George Pullicino f’diskors li għamel waqt żjara fl-egħlieqi ta’ Charles Micallef fl-Imtaħleb. Matul iż-żjara saret preżentazzjoni dwar sistema ta’ kontroll kompjuterizzata li qed twassal biex ikun hemm kontroll akbar fuq il-kwantita’ ta’ fertilizzant u ilma li jintużaw fit-tkabbir ta’ ħaxix.
Il-Ministru Pullicino qal li permezz ta’ din is-sistema l-użu tal-fungiċida naqas b’75%, il-fertilizzant naqas bi 80% u l-ilma qed ikun ikontrollat. Hu qal li dan huwa proċess li minnu jgawdi kulħadd:
- il-bidwi għaliex se jkollu dħul akbar u spejjeż anqas;
- il-konsumatur għax jista’ jgawdi minn prezzijiet orħos u kwalita’ aktar konsistenti;
- u l-ambjent għaliex jintuża anqas fertilizzant u jintuża b’mod aħjar, użu aħjar ta’ l-ilma u jitnaqqas il-mard minn fost ir-raba’ minħabba ħamrija aktar b’saħħitha.
Il-Ministru Pullicino qal li dan jikkonferma l-konnessjoni mill-qrib bejn agrikoltura sostenibbli u l-ħarsien ta’ l-ambjent. Hu qal li d-Dipartiment ta’ l-Agrikoltura se jaħdem mill-qrib ma’ dan il-bidwi biex il-vantaġġi ta’ sistema bħal din ikunu jistgħu jitgawdew mill-akbar numru ta’ bdiewa possibli. Huwa fatt inkoraġġanti li dan il-bidwi huwa lest li jaqsam it-tagħrif li kiseb hu ma’ min hu nteressat għaliex ġenwinament jemmen fil-vantaġġi ta’ sistema bħal din.
George Pullicino qal li ġew mistiedna wkoll numru ta’ studenti mill-Istitut ta’ l-Agro Industrija tal-MCAST u mill-Fakulta’ ta’ l-Agrikoltura ta’ l-Universita’ għaliex anke dawn jistgħu jaraw b’għajnejhom sistemi fil-prattika li jagħtu riżultati mill-aqwa filwaqt li jħarsu l-ambjent. Hu qal li dan jikkonferma l-ħolqa li teżisti bejn l-edukazzjoni u l-ambjent. Din l-attivita’ saret bħala parti mill-attivitajiet tal-Ġimgħa Ambjent li qed isiru biex jitfakkar Jum l-Ambjent 2005.
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946