GĦARFIEN NAZZJONALI ŻGĦAŻAGĦ FIS-SOĊJETA’
Il-Ministru ta’ l-Edukazzjoni Louis Galea attenda għal serata li saret mis-Sezzjoni taż-Żgħażagħ tal-Ministeru ta’ l-Edukazzjoni biex jingħata l-Għarfien Nazzjonali Żgħażagħ fis-Soċjetà, għarfien li jingħata ta’ kull sena lil dawk l-għaqdiet taż-żgħażagħ li matul is-sena ta’ qabel ikunu wettqu ħidma volontarja kemm f’pajjiżna kif ukoll barra minn Malta . Is-serata saret fis-sala Erin Serracino Ingott, fl-Università ta’ Malta
Fid-diskors tiegħu, il-Ministru Galea qal li l-għaqdiet li jkunu qed jingħataw dan l-għarfien huma biss rappreżentazzjoni żgħira ta’ l-ammont kbir ta’ żgħażagħ u għaqdiet li jwettqu ħidma importanti u essenzjali f’oqsma differenti. Hu tenna li l-Gvern jimxi b’politika ta’ appoġġ lill-għaqdiet u mhux ta’ ħidma diretta għax jemmen li ħadd aktar mill-għaqdiet innifishom m’huwa kapaċi joffri s-servizzi u l-appoġġ li għandhom bżonn iż-żgħażagħ. Il-Ministru qal li l-għaqdiet taż-żgħażagħ illum għandhom opportunitajiet ta’ finanzjament u appoġġ ferm ikbar milli qatt kellhom u dan permezz tad-diversi programmi li toffri l-UE. Madankollu, tenna l-Ministru, l-opportunitajiet m’humiex biss finanzjarji għax il-programmi ta’ l-UE joffrulhom opportunitajiet ta’ networking, skambji u qsim ta’ l-informazzjoni li l-valur tagħhom hu bil-wisq akbar. Hu temm jawgura lill-għaqdiet li ġew nominati u lill-għaqdiet kollha taż-żgħażagħ aktar ħidma għall-ġid taż-żgħażagħ u tal-komunitajiet fejn jaħdmu.
Din is-sena ħmistax-il organizzazzjoni ġew nominati u minn dawn l-organizzazzjonijiet, il-kumitat ta’ l-għażla, għażel sitta. Dawn l-organizzazzjonijiet huma:
· Generades Youth Group
· SPYS – Salesian Pastoral Youth Service
· Youth 4 Life
· Youths@local
· ZAK Tarxien
· Zest Youth Group
Ir-Rebbieħa tal-Premju Għarfien Nazzjonali Żgħażagħ fis-Soċjeta' għal din is-sena hu l-grupp 'Youth 4 Life' li ngħataw is-somma ta' Lm500 u plakka kommemorattiva.
It-Tieni Premju ta' Lm200 ingħata lil SPYS (Salesian Pastoral Youth Service) filwaqt li l-Generades Youth Group ġew fit-Tielet Post u ngħataw Lm100.
Youths@local, ZAK Tarxien u Zest Youth Group ukoll ingħataw Lm75 bħala rikonoxximent għall-ħidma tagħhom.
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946