Left arrow Mur Lura

IPPREŻENTAT IL-PJAN T’AZZJONI GĦALL-PROĠETT TAD-DWEJRA

PR0514
Date Icon 12/04/2005

L-ewwel abbozz tal-Pjan t’Azzjoni għall-proġett ta’ Heritage Park għall-inħawi tal-Qawra u d-Dwejra f’Għawdex ġew ippreżentati dalgħodu, biex b’hekk infetaħ proċess ta’ konsultazzjoni għal perijodu ta’ 6 ġimgħat.  Dan l-abbozz jinkludi proposti ta’ 25 miżura li jridu jittieħdu sabiex din iż-żona tikseb il-livelli mixtieqa ta’ protezzjoni ambjentali u wirt kulturali. Dan il-proġett qed jiġi ffinanzjat in parti mill-Unjoni Ewropea taħt il-LIFE Third COUNTRIES scheme. 

Il-preżentazzjoni ta’ dan l-abbozz ta’ Pjan t’Azzjoni issegwi t-twaqqif tad-Dwejra Steering Committee li sar is-sena li għaddiet. Dan il-kumitat jinkludi rappreżentanti tal-Ministeru għal Għawdex, tal-Malta Environment and Planning Authority (MEPA), tal-Kunsill Lokali San Lawrenz, kif ukoll ta’ Nature Trust (Malta). 

Dan il-proġett, inizjalment sottomess min-Nature Trust (Malta) għall-fondi mill-Unjoni Ewropea, kien wieħed mill-ħmistax-il proġett magħżula mill-istess Unjoni, wara li ġew sottomessi 107 proġetti. L-implimentazzjoni tiegħu bdiet f’April 2004. Matul din l-aħħar sena, saru diversi studji ekoloġiċi minn grupp ta’ esperti li ġew maħtura apposta sabiex jevalwaw l-ambjent naturali fuq l-art u l-baħar ta’ dawn l-inħawi. Saru wkoll diversi laqgħat mal-partijiet konċernati fejn ġew diskussi problemi u saru wkoll rakkomandazzjonijiet dwar dan is-sit. Fuq bażi ta’ dan, l-iSteering Committee fassal dan l-ewwel abbozz tal-Pjan t’Azzjoni li ġie ppreżentat illum. 

L-għan ta’ dan il-Pjan t’Azzjoni huwa l-ħolqien ta’ heritage park b’mod ibbażat fuq il-parteċipazzjoni tal-partijiet kollha konċernati. L-għanijiet m’humiex biss marbuta ma’ konservazzjoni tas-sit imma wkoll jinkludu għanijiet edukattivi kif ukoll ħidmiet ekonomiċi bħal agrikoltura u l-eko-turiżmu. Sabiex jintlaħqu dawn l-għanijiet, il-Kumitat tat-Tmexxija ppropona 25 miżura li jkopru dawn il-fatturi:  

      1.      il-kostruzzjoni u operazzjoni ta’ Ċentru Interpretattiv;

2.      l-immaniġġjar tal-boathouses fil-Qawra u l-inħawi ta’ madwarhom;

3.      it-titjib tal-kappella ta’ Sant’Anna;

4.      l-immaniġġjar tal-parking;

5.      l-użu ta’ materjal adegwat għall-uċuħ tat-toroq u car parks;

6.      il-konservazzjoni tal-ħitan tas-sejjieħ;

7.      l-użu u l-immaniġġjar tat-Torri tal-Qawra;

8.      it-teħid u t-twettieq ta’ deċiżjonijiet konkreti dwar il-konservazzjoni ta’ l-attrazzjoni

         magħrufa bħala t-Tieqa;

9.      it-teħid u t-twettieq ta’ deċiżjonijiet dwar il-barrieri li jinsabu fis-sit;

10.    l-immaniġġjar tat-turiżmu;

11.    il-potenzjal tas-sit għall-mixjiet fin-natura;

12.    l-immaniġġjar ta’ ankrar fil-baħar;

13.    it-teħid ta’ żjut u fuel minn dgħajjes;

14.    prekawzjonijiet biex titħares is-saħħa pubblika;

15.    ir-restawr ta’ siti degradati;

16.    l-immaniġġjar ta’ provvista ta’ ilma u drenaġġ;

17.    l-użu ta’ teknoloġiji ta’ enerġija bbażati fuq ix-xemx;

18.    l-immaniġġjar ta’ speċi aljeni u nvażivi ta’ flora u fawna;

19.    l-immaniġġjar ta’ viżitaturi;

20.    il-provvista ta’ fondi;

21.    attivitajiet ta’ climbing, abseiling u biking (bir-rota biss);

22.    l-attivita’ ta’ l-għaddasa;

23.    pubbliċita’ dwar il-park;

24.    l-immaniġġjar tat-traffiku; u,

25.    l-ikkampjar. 

Il-proġett jaħseb għat-twaqqif ta’ żoni ta’ mmaniġġjar differenti, kemm fuq l-art kif ukoll fil-baħar, li ser igawdu livelli differenti ta’ protezzjoni. Ser isiru wkoll sforzi biex il-valur ta’ dan is-sit jiġi rikonoxxut fuq livelli nternazzjonali, kemm fl-Unjoni Ewropea kif ukoll fuq livell dinji.  

Il-Ministru għal Għawdex, l-Onor. Giovanna Debono, iddeskriviet din l-aħħar sena bħala esperjenza mill-iktar pożittiva fejn il-Gvern u l-organizzazzjoni Nature Trust (Malta) ħadmu mill-qrib ħafna sabiex ippreparaw dan il-Pjan t’Azzjoni. Il-Ministru Debono enfasizzat il-fatt li dan l-abbozz ġie bbażat fuq diskussjoni miftuħa mal-partijiet konċernati kollha li ġew ikkonsultati matul din l-aħħar sena.  

L-Onor. Giovanna Debono spjegat ir-rwol tal-Ministeru għal Għawdex f’dan il-proġett li qiegħed isir f’żona li taqa’ parzjalment taħt ir-responsabilita’ ta’ l-istess Ministeru. Il-Ministru Debono spjegat kif, fejn possibbli, ir-riżorsi tal-Ministeru għal Għawdex se jiġu ndirizzati lejn dan il-proġett sabiex tiġi ffaċilitata l-implimentazzjoni tiegħu. L-Onor. Debono rreferiet ukoll għall-kunsiderazzjoni li l-Ministeru għal Għawdex qiegħed jagħti lil dawn iż-żoni speċjalment b’riferenza għall-perijodu ta’ wara l-fażi ta’ l-implimentazzjoni ta’ dan il-proġett. 

Il-Ministru Debono espremiet pubblikament l-apprezzament tagħha lil Nature Trust (Malta) għall-interess li ħadet f’din iż-żona ta’ Għawdex li hija partikolarment sinjura mil-lat ekoloġiku, ġeoloġiku u estetiku, kif ukoll talli rnexxielha takkwista fondi mill-Unjoni Ewropea speċifikament għad-Dwejra. Il-Ministru Debono qalet li d-Dwejra hija żona mill-iktar importanti għat-turiżmu t’Għawdex u li ta’ kuljum iżuruha proporzjon sostanzjali tat-turisti tal-gżira kif ukoll Għawdxin minħabba xogħol jew rikreazzjoni. Hija qalet li dawn l-inħawi t’Għawdex huma wkoll fost l-ikbar attrazzjonijiet tal-gżira għall-industriji ċinematografiċi jew televiżivi. 

Il-Ministru għall-Ambjent u Affarijiet Rurali, l-Onor. George Pullicino, qal li dan l-abbozz tal-Pjan t’Azzjoni ġie maqbul mhux biss mill-Kumitat ta’ Tmexxija tad-Dwejra imma wkoll mill-Bord tal-MEPA, li se jevalwa l-kummenti li jaslulha mill-pubbliku in ġenerali sa tmiem is-sitt ġimgħat ta’ konsultazzjoni pubblika.  

Il-Ministru Pullicino spjega kif dan il-proġett huwa l-aqwa eżempju ta' kif pajjiżna jista' jibbenefika minn fondi ta' l-Unjoni Ewropea għat-titjib fl-ambjent ta' pajjiżna. Huwa faħħar is-sehem ta' għaqdiet volontarji, bħalma hi n-Nature Trust (Malta), li tuża l-isforzi u l-kuntatti tagħha biex jinkiseb finanzjament bħal dan li tant hu importanti għal pajjiżna. 

Il-Ministru Pullicino qal li, fuq kollox, dan l-iżvilupp jikkonferma li l-Gvern u l-Għaqdiet mhux Governattivi jistgħu jaħdmu flimkien għall-ġid ta' pajjiżna.  Huwa stqarr li dan jikkonferma wkoll l-importanza li jkollna aktar sforzi mis-soċjeta’ in ġenerali biex mhux nikkritikaw biss imma nagħmlu wkoll azzjoni konkreta għal ambjent aħjar. 

Is-Sindku ta’ San Lawrenz Noel Formosa, il-President ta’ Nature Trust (Malta) Vincent Attard kif ukoll rappreżentant tal-MEPA Chris Attard indirizzaw it-tnedija. 

Il-proċess ta’ konsultazzjoni huwa miftuħ għal 6 ġimgħat. F’dan il-perijodu, ser isiru laqgħat speċifiċi mar-residenti ta’ San Lawrenz u l-Għarb, kif ukoll mal-partijiet kollha konċernati u l-pubbliku b’mod ġenerali, fl-ewwel ġimgħa ta’ Mejju. Kopji tal-Pjan t’Azzjoni jistgħu jinkisbu mill-uffiċċju prinċipali tal-MEPA wara ħlas ta’ Lm30, jew jiġu downloaded mis-sit www.mepa.org.mt. Kopji ta’ leaflet ta’ informazzjoni bil-Malti, li jiġbor fih il-punti ewlenin tad-dokument, jistgħu jinkisbu mill-Ministeru għal Għawdex, mill-uffiċċji tal-MEPA f’Għawdex u f’Malta, kif ukoll mill-uffiċċji tal-Kunsilli Lokali ta’ San Lawrenz u l-Għarb. Il-kummenti jistgħu jaslu għand il-MEPA sa mhux iktar tard mill-24 ta’ Mejju.  

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Ċertifikazzjoni internazzjonali tal-ogħla livell għad-dipartiment tar-radjoterapija fiċ-Ċentru tal-Onkoloġija Sir Anthony Mamo

PR261947

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...

STQARRIJA MILL-MINISTERU GĦALL-EDUKAZZJONI U L-ISPORT  Aktar minn 1,800 student jiggradwaw mill-Università ta’ Malta

PR261946

STQARRIJA MILL-MINISTERU GĦALL-EDUKAZZJONI U L-ISPORT Aktar minn 1,800 stu...

Aktar Stqarrijiet Right arrow