IL-GVERN JAGĦMEL RIKORS QUDDIEM IT-TRIBUNAL INDUSTRIJALI
Il-Gvern jesprimi tħassib għat-theddida tal-General Workers’ Union li tieħu azzjonijiet industrijali fis-setturi kollha ta’ l-ekonomija fejn hi rappreżentata minħabba li ma taqbilx mal-Gvern li l-ħaddiema li ħadu azzjonijiet fi ksur tal-Ftehim Kollettiv ta’ l-Enemalta m’għandhomx jitħallsu għaż-żmien li damu sospiżi.
It-tħassib tal-Gvern hu dovut għall-ħsara lill-ekonomija Maltija li jkollhom l-azzjonijiet li qed thedded li tieħu l-Union. Dawn huma azzjonijiet mingħajr ġustifikazzjoni għax li kellhom jittieħdu jkunu fuq nuqqas ta’ qbil t’interpretazzjoni tal-liġi u li allura jeżistu l-fora fejn nuqqas ta’ qbil bħal dan jista’ jiġi rimedjat b’mod ċivili.
Il-Gvern diġà appella diversi drabi lill-General Workers’ Union li jekk hi konvinta mir-raġun tagħha f’din il-kwistjoni, għandha tieħu l-każ quddiem il-Qrati, it-Tribunal Industrijali jew arbitru indipendenti Anke jekk ma kellux għalfejn, il-Gvern ikkonferma minn qabel u mingħajr kundizzjonijiet, li jimplimenta d-deċiżjoni tat-Tribunal Industrijali tkun xi tkun.
Mingħajr ma tat raġuni, il-General Workers’ Union irrifjutat li tissottometti dan il-każ quddiem it-Tribunal Industrijali.
Bħala sinjal ulterjuri ta’ rieda tajba, hu għalhekk li l-Enemalta ddeċidiet li dal-għodu, permezz tar-rappreżentant legali tagħha, tagħmel rikors quddiem it-Tribunal Industrijali biex dan jisma’ l-każ tal-kwistjoni u jiddeċiedi fuqu.
Kopja tar-rikors preżentat dal-għodu fit-Tribunal Industrijali hi mehmuża
Kopja tar-rikors.pdf
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946