L-AĠENZIJA TAL-PAGAMENTI TQASSAM MA’ L-LM4 MILJUNI F’GĦAJNUNIET LIS-SETTUR AGRIKOLU
L-Aġenzija tal-Pagamenti fil-Ministeru għall-Affarijiet Rurali u l-Ambjent qassmet ma’ l-Lm4 miljuni f’għajnuna lis-settur agrikolu. Dawn l-għajnuniet huma possibli wara li pajjiżna waqqaf, kif kien mitlub, l-Aġenzija ta’ Pagamenti li hi nkarigata mill-amministrar u t-tqassim tal-fondi li jkunu ġejjin mill-Unjoni Ewropea u mill-Gvern Malti.
Dan ħabbruh l-Ministru għall-Affarijiet Rurali u l-Ambjent George Pullicino u s-Segretarju Parlamentari responsabbli għall-Biedja u Sajd, Frans Agius waqt attività fil-Girgenti, li matulha ngħataw dettalji dwar diversi għajnuniet li qed igawdi minnhom is-settur agrikolu.
Permezz ta’ din l-għajnuna qed igawdu kemm is-settur tal-frott u l-ħxejjex, kif ukoll is-settur tal-bhejjem. L-għajnuniet huma mqassma kif ġej:
§ LM1 miljun f’sussidji fuq frott u ħxejjex li għaddew mill-Pitkalija;
§ madwar Lm60,000 ingħataw f’għajnuna għall-bdiewa li jkabbru l-patata;
§ l-għajnuna fuq dwieli tlaħħaq is-Lm740,000 li tkopri kemm l-għajnuna fuq dwieli ġodda, kif ukoll l-għajnuna fuq id-dwieli eżistenti;
§ l-għajnuna lill-produtturi ta’ tadam għall-ipproċessar tlaħħaq is-Lm700,000;
§ Lm1.1 miljuni qed jingħataw bħala miżura ’ad hoc’ f’għajnuna lill-bdiewa reġistrati full-time;
§ ir-raħħala qed igawdu wkoll minn għajnuna ta’ madwar Lm350,000 bħala sussidju fuq il-qatla ta’ ċanga u nagħaġ.
Il-Ministru George Pullicino qal li din l-għajnuna tikkonferma kemm in-negozjati ma’ l-Unjoni Ewropea qed isarrfu f’benefiċċji, li qed iservu biex jgħinu lis-settur agrikolu Malti jirristruttura ruħu; u b’hekk ikun lest biex isir dejjem aktar effiċjenti u kompetittiv.
Hu fakkar illi kieku bqajna barra mill-Unjoni Ewropea, dan ir-ristrutturar kellu jsir xorta u dan mingħajr ebda għajnuna jew fondi mill-Unjoni Ewropea.
Il-Ministru Pullicino qal li fl-14 ta’ Frar jerġgħu jiftħu l-applikazzjonijiet għall-għajnuna relatata mal-ħidma ta’ l-art agrikola u għal dan il-għan, fil-jiem li ġejjin se ssir kampanja ta’ tagħrif u jitħabbru wkoll aktar dettalji.
Is-Segretarju Parlamentari Frans Agius qal li minbarra din l-għajnuna, il-bdiewa għandhom iħejju ruħhom biex b’hekk jiggwadanjaw mir-riforma fil-Pitkalija li se tidħol fis-seħħ matul din is-sena. Din ir-riforma se twassal biex il-bidwi jkollu sehem akbar fit-tmexxija tal-Pitkalija u se tiżgura li l-konsumatur Malti jgawdi minn prodotti lokali friski u ta’ kwalità akbar.
Iż-żewġ kelliema rringrazzjaw lill-impjegati kollha tad-dipartiment għall-impenn tagħhom biex illum setgħu jitqassmu dawn l-għajnuniet li minnhom qed tgawdi l-komunità agrikola kollha.
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946