LAQGĦA TA’ INFORMAZZJONI GĦALL-BDIEWA GĦAWDXIN DWAR L-ISKEMI TA’ GĦAJNUNA FINANZJARJA GĦALL-QASAM AGRIKOLU
LAQGĦA TA’ INFORMAZZJONI GĦALL-BDIEWA GĦAWDXIN DWAR L-ISKEMI TA’ GĦAJNUNA FINANZJARJA GĦALL-QASAM AGRIKOLU
Id-Dipartiment għall-Proġetti u Żvilupp fi ħdan il-Ministeru għal Għawdex ser jorganizza laqgħa ta’ informazzjoni għall-bdiewa Għawdxin fejn ser jiġu spjegati d-diversi skemi ta’ għajnuna finanzjarja mill-Unjoni Ewropea u mill-Gvern Malti.
Din il-laqgħa ser tinżamm fis-Sala Guże’ Micallef, fil-Farm Sperimentali fix-Xewkija, Għawdex nhar il-Ħadd, 2 ta’ Mejju fid-9.00 a.m.
Ser ikun hemm uffiċjali li jispjegaw l-iskemi u jirrispondu għall-mistoqsijiet li jsiru mill-bdiewa.
L-iskemi ta’ għajnuna finanzjarja huma għal:
- Qmugħ, cereali u magħlef ieħor, u għajnuna fuq ir-raba’ mistrieħ
- Frott u ħxejjex
- Tadam u frott għall-ipprocessar
- Patata
- Żebbuġ
- Għajnuna għar-restawr ta’ ħitan tas-sejjiegħ ta’ lqugħ
- Taħwil, ristrutturar u għajnuna addizzjonali fuq dwieli
- Għajnuna fuq speci awtoktoni (eż. is-siġar tal-ballut u l-gendus Malti)
- Biedja organika
- Għajnuna fuq żoni żvantaġġjati u
- Għajnuna għall-bdiewa reġistrati full time
Il-bidwi japplika għal dawn l-iskemi kollha f’applikazzjoni waħda. Din hija sistema semplici fejn il-bidwi ma jrid jimla’ ebda formola, imma jiddikjara l-informazzjoni kollha lill-Ufficcjal Inkarigat li jirreġistraha fuq sistema kompjuterizzata. Biex ikun jista’ japplika għal dawn l-iskemi ta’ għajnuna, il-bidwi jrid ikollu r-raba’ tiegħu reġistrat ma’ l-Ufficcju għall-Amministrazzjoni u Kontroll ta’ l-Art Agrikola. F’Għawdex, min għadu ma rreġistrax ir-raba’ li qed jaħdem jista’ jmur jagħmel dan fl-Ufficcju ta’ l-Agrikoltura, fic-Centru Amministrattiv fir-Rabat.
L-applikazzjonijiet għal dawn l-iskemi ser jintlaqgħu sat-Tnejn 17 ta’ Mejju. Il-bidwi għandu jieħu miegħu l-karta ta’ l-identita’, certifikati ta’ l-IACS (dawk il-pjanti ta’ meta rreġistra l-art agrikola tiegħu), kif ukoll il-ktieb tar-raba’ (jekk reġistrat) u n-numru ta’ reġistrazzjoni tal-VAT (jekk reġistrat).
Skond ir-regolamenti ta’ l-Unjoni Ewropea, jingħata cans ta’ 25 ġurnata oħra wara d-data ta’ l-egħluq, jiġifieri sal-Ġimgħa 11 ta’ Ġunju, iżda f’dan il-każ, tinqata’ 1% ta’ l-għajnuna li jkun intitolat għaliha l-applikant, għal kull ġurnata tard li ssir l-applikazzjoni.
DOI - 27.04.2004
Stqarrijiet Oħra:
PR261936
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...
PR261935en