Left arrow Go Back

DISKORS MILL-ONOR EDDIE FENECH ADAMI, PRIM MINISTRU, FL-OKKAŻJONI TA’ L-INAWGURAZZJONI TA’ L-EWWEL MIS-SENSIELA T’AJRUPLANI AIRBUS ĠODDA TA’ L-AIR MALTA

PR43
Date Icon 17/01/2004

Hu ta’ pjaċir għalija li ninawgura din il-linja ġdida t’ajruplani Airbus li l-Air Malta akkwistat b'investiment qawwi.

Bħala linja nazzjonali ta’ l-ajru, l-Air Malta għarfet il-bżonn li tipprovdi lill-passiġġieri tagħha servizz mill-aqwa.  Dan il-pass importanti ser ikompli jsaħħaħ is-servizz li diġà tipprovdi l-Air Malta filwaqt li jassigura li l-passiġġiera jkollhom garanzija ta’ kumdità, sigurtà u prezz kompetittiv.

Matul is-snin l-Air Malta ssarfet f’simbolu ta’ kburija nazzjonali.  Bħala kumpanija ta’ l-ajru ħadmet biex mhux biss tagħmel il-qligħ iżda biex fl-istess waqt tipprovdi lill-Maltin mezz prattiku ta’ komunikazzjoni bl-ajru mal-bqija tad-dinja.  Bħala gżira, u bħala pajjiż li għandu t-turiżmu bħala wieħed mis-sisien ta’ l-ekonomija tiegħu, pajjiżna jeħtieġlu linja ta’ l-ajru li tkun kapaċi tipprovdi servizz konsistenti.  

Bil-ħidma tagħha l-Air Malta qegħda tassew isservi l-interess nazzjonali.  Fost oħrajn bħala linja nazzjonali ta’ l-ajru, l-Air Malta , qegħda tkattar l-għarfien dwar pajjiżna internazzjonalment.  

Pajjiżna jaspira li jressaq lejh investiment barrani.  Dan nagħmluh għax nemmnu bis-sħiħ li pajjiżna għandu jkompli jikber bħala ċentru ta’ servizzi finanzjarji u bħala kompetitur ewlieni fis-settur marittimu.  Dawn iż-żewġ miri jistgħu jintlaħqu aktar faċilment u jrendu aktar jekk nassiguraw li jkollna komunikazzjoni bl-ajru fuq bażi soda u kontinwa.  Dan hu li qegħda tagħmel l-Air Malta .  

Madanakollu l-interess nazzjonali m’għandux jintlaħaq billi jitħallas kwalunkwe prezz.  Il-bżonn li pajjiżna jkollu linja nazzjonali ta’ l-ajru ma jistax jiġġustifika li l-Air Malta ma toperax bħala kumpanija sostenibbli li tagħmel il-qligħ u li topera fuq sisien finanzjarji sodi.  Fuq kollox dan ukoll huwa fl-interess nazzjonali għax il-Gvern għandu sehem fl-Air Malta .  

L-aħħar tlett snin kienu l-ewwel snin li fihom l-Air Malta għamlet telf u dan seħħ għal ħafna raġunijiet.  Dawn ir-raġunijiet isibu l-ġenesi tagħhom fil-ġrajjiet negattivi ta’ nhar il-11 ta’ Settembru 2001, iżda hu fatt li hemm problemi interni fil-kumpanija li jridu jiġu indirizzati.  Dawn il-problemi issa saru piż li qed jhedded il-kompetittività tal-kumpanija.  

Kull azjenda u kull intrapriża, żgħira jew kbira, jasal għaliha żmien meta trid tħares lejha nfisha u tistaqsi fejn hemm bżonn tirranġa jekk trid tibqa’ tirnexxi.  Il-Gvern qed jagħmel preċiżament dan fil-kumpaniji u l-entitajiet li fihom għandu sehem.  Teżisti l-kritika, fil-fehma tiegħi mhux ġustifikata, li għax konna fil-Gvern qabel, ma jmissux għandna għalfejn induru ma’ darna u naraw x’hemm bżonn jinbidel.  

Qatt ma ppretendejna li dak li għamilna mill-1987 kien perfett għal dejjem u qatt ma kien ser ikun hemm bżonn li naġġornaw u nirrevedu għaż-żmien li ġej.  F’April li għadda erġajna dħalna bl-enerġija ta’ Gvern ġdid, li jħares b’għajnejn kritiċi lejn ir-realtajiet ta’ pajjiżna u ma jqisx xejn b’domma għax ilu fil-gvern għall-numru ta’ snin.  Xogħol il-Gvern hu li jara fejn hemm bżonn jitjieb u jiġġedded, u jiena sodisfatt li qed nara dan jiġri fl-Air Malta u fil-kumpaniji strateġiċi oħra li fihom il-Gvern għandu sehem.  

Hu mertu, mhux vizzju, li tkun kapaċi tiġġedded kontinwament, li tibdel għall-aħjar u li tirrevedi dak li għamilt biex tifhem kif tista’ tagħmlu aħjar.  Meta wieħed jieqaf jagħmel dan l-eżerċizzju, jkun qiegħed jiqdiem u miegħu jiqdiem ix-xogħol li jkun għamel.  Il-Gvern immexxi minni żamm friska l-ħila li ma jkunx kompjaċenti u li jlaħħaq u jmexxi l-aspirazzjonijiet dejjem jikbru tal-Maltin għal-livell ta’ servizz dejjem itjeb u b’valur aqwa għall-flus.  

L-Air Malta trid tibqa’ isservi l-interess nazzjonali.  Iżda l-interess nazzjonali jinbidel ukoll maż-żminijiet.  L-aspirazzjonijiet tagħna llum m’għadhomx dawk li kienu fl-1973, jew fl-1987, jew fl-1998.  L-Air Malta , bħall-bqija ta’ pajjiżna, trid tinbidel maż-żminijiet.  

L-awgurju tiegħi hu li nkunu lkoll kapaċi niġbdu ħabel wieħed għax hekk jifhem min għandu għall-qalbu l-interess nazzjonali. L-okkażjoni tal-lum hi biss pass wieħed fid-direzzjoni t-tajba.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Inawgurat bust ta’ Ġorġ tal-Mużew fl-Isptar Mater Dei b’tifkira tal-ħidma tiegħu fost dawk vulnerabbli

PR261936

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...

PRESS RELEASE BY THE MINISTRY FOR ENERGY, THE ENVIRONMENT AND THE REGENERATION OF THE GRAND HARBOUR  ERA launches anniversary publication: A decade of protecting Malta’s natural future

PR261935en

PRESS RELEASE BY THE MINISTRY FOR ENERGY, THE ENVIRONMENT AND THE REGENERAT...

More Press Releases Right arrow