Left arrow Go Back

REVIŻJONI TAL-MATSEC

PR281
Date Icon 03/03/2004

Il-Ministru ta’ l-Edukazzjoni irid li ż-żgħażagħ kollha fl-eta` ta’ sittax-il sena jiksbu ċertifikazzjoni ta’ l-iżvilupp edukattiv u l-ħiliet tagħhom wara ħdax-il sena ta’ edukazzjoni obbligatorja.  Dan iċ-ċertifikat nazzjonali irid ikun rikonoxxut għal finijiet ta’ aktar studju u taħrig.  Il-Ministru irid ukoll it-tibdil meħtieġ fil-livell avvanzat tal-MATSEC biex niffaċilitaw il-mira li 85% ta’ dawk fl-eta’ ta’ tnejn u għoxrin sena jiksbu xi forma ta’ edukazzjoni post-sekondarja. Ir-riforma trid iġġib magħha standards ta’ l-ogħla kwalita` u tisħiħ tal-fiduċja ta’ kulħadd f’dawn l-eżamijiet.

Dan ħabbru l-Onor. Louis Galea, Ministru tal-Edukazzjoni  meta dalgħodu nieda proċess li biħ is-sistema tal-MATSEC se titpoġġa taħt il-lenti biex issir analiżi kritika u reviżjoni tas-sistema preżenti.  

Is-sistema tal-MATSEC inħolqot fl-1991 bl-iskop li tissostitwixxi l-eżamijiet tal-GCE fil-livelli  ordinarji (‘O’) u  avvanzati (‘A’) ta’ Bordijiet mir-Renju Unit,  b’sistema ta’ eżamijiet lokali mfassla għall-istudenti Maltin u Għawdxin.  L-eżamijiet tal-MATSEC għandhom isegwu il-prinċipji tal-Kurrikulu Nazzjonali.   

Il-Ministru Galea spjega kif gew żviluppati ż-żewġ sistemi ta’ eżamijiet.  L-eżami tas-SEC (Ċertifikat ta’ Edukazzjoni Sekondarja)  li kien joffri ċertifikat f’kull suġġett sal-livell li wieħed jilħaq hekk kif jispiċċa l-edukazzjoni obbligatorja. Il-Matrikola, min-naħa l-oħra, hi s-sistema li twassal lill-istudenti biex ikomplu studji f’istituzzjonijiet ta’ edukazzjoni għola, inkluż l-Universita’.  

Il-Ministru Louis Galea qal li l-iskop ewlieni tar-reviżjoni tal-MATSEC hu li tissaħħaħ is-sistema preżenti u li ssir aktar rilevanti għad-dinja tax-xogħol ta’ llum u ta’ għada.  Il-Ministru fisser li għandu jkun ta’ sodisfazzjon għal kulħadd li s-sistema MATSEC kisbet rispett u rikonoxximent kemm lokalment, kif ukoll fuq livell internazzjonali.  Madankollu issa wasal iż-żmien li ssir verifika u evalwazzjoni bl-iskop li ntejjbu dak li hemm.  

Il-Ministru qal li f’dawn l-aħħar snin l-ammont ta’ kandidati li joqgħodu għall-eżamijiet tas-SEC u tal-MATSEC, żdiedu sostanzjalment, biex minn ftit aktar minn 3,500 fl-1992, is-sena li għaddiet għamlu l-eżamijiet mal-11,000 persuna.  

Louis Galea qal li l-Kurrikulu Nazzjonali tas-sena 2000, irid li s-sistema edukattiva tagħna tiżviluppa b’mod li toffri edukazzjoni ta’ kwalita` lil kulħadd skond il-bżonnijiet tax-xogħol illum.  Il-Kurrikulu joffri viżjoni cara għall-edukazzjoni obbligatorja f’pajjiżna.  Barra minn hekk waħda mill-miri tal-Pjan Nazzjonali ta’ Azzjoni għall-Impjiegi hu li sal-2010, 85% taż-żgħażagħ ta’ 22 sena iridu jkun waslu sal-livell post-secondarju.  Għaldaqstant hemm bżonn li naraw x’inhuma il-bżonnijiet tagħna illum, u l-istandards li rridu nilħqu.  

Il-Ministru ta’ l-Edukazzjoni ħatar grupp ta’ esperti, li se jkun koordinat minn Dr. Grace Grima, u jinkludi lill-Professur Salvu Chircop, il-Professur Frank Ventura u s-Sur Ray Camilleri, Direttur tal-Kurrikulu fid-Diviżjoni ta’ l-Edukazzjoni.  Dan il-grupp mistenni jagħmel evalwazzjoni tas-sistema tal-MATSEC u jagħti r-rakkomandazzjonijiet dwar il-futur taċ-ċertifikazzjoni fil-livell sekondarju u post-sekondarju.  Din ir-reviżjoni trid timxi fl-istess direzzjoni li jagħti l-Kurrikulu Nazzjonali u tkun gwidata minn dak li qed jiġri f’pajjiżi Ewropej u oħrajn.  

Il-Ministru Galea ser jassigura li ssir konsultazzjoni mifruxa ma’ kull min hu involut, inkluż għalliema, kapijiet ta’ skejjel, uffiċċjali fid-Diviżjoni ta’ l-Edukazzjoni, l-Universita` u l-MCAST, is-setturi ekonomiċi privati u pubbliċi, kif ukoll l-Unjons.  Ix-xogħol fuq din ir-riforma hu mistenni jieħu sena u nofs. Minħabba in-natura ta’ dawn l-eżamijiet, l-ebda rakkomandazzjoni li tiġi aċċettata ma tidħol fis-seħħ, jekk mhux b’avviz ta’ għal anqas sentejn.  F’xi każijiet dan l-avviz ser ikun meħtieġ li jkun ta’ perjodu itwal.     

Il-Ministru Galea temm jgħid li waħda mill-isfidi l-kbar hi li nagħtu edukazzjoni ta’ kwalita` lil kulħadd.  Dan ifisser kwalita’ mhux biss fil-kontenut tas-suġġetti iżda fil-mod tat-tagħlim u kif nagħmlu l-eżamijiet u l-assessjar; għaliex it-tnejn jiddependu minn xulxin.  “Jeħtieġ nevalwaw l-impatt ta’ l-eżamijiet fuq it-tfal tagħna, il-familji tagħhom, l-iskejjel u s-suq tax-xogħol.  Irridu t-titjib li hemm bżonn fis-sistema biex il-poplu tagħna joħrog mis-sistema edukattiv b’għodod aħjar u b’ħiliet itjeb biex kulħadd jieħu sehem sħiħ fil-ħidma tas-soċjeta` u fil-frott li din iġġib magħha,” temm jgħid Louis Galea.    

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Inawgurat bust ta’ Ġorġ tal-Mużew fl-Isptar Mater Dei b’tifkira tal-ħidma tiegħu fost dawk vulnerabbli

PR261936

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...

PRESS RELEASE BY THE MINISTRY FOR ENERGY, THE ENVIRONMENT AND THE REGENERATION OF THE GRAND HARBOUR  ERA launches anniversary publication: A decade of protecting Malta’s natural future

PR261935en

PRESS RELEASE BY THE MINISTRY FOR ENERGY, THE ENVIRONMENT AND THE REGENERAT...

More Press Releases Right arrow