MIŻURI FAVUR DAWK INQAS IXXURTJATI
Il-Fiera tal-Milied organizzata fit-Trade Fair Grounds in-Naxxar daħlet fil-kalendarju ta’ attivitajiet ta’ qabel il-Milied. Din is-sena l-Fiera tal-Milied se tinkludi l-parteċipazzjoni tal-Fondazzjoni Eden li se jikkontribwixxu biex jinħoloq Ġnien tal-Milied f’waħda mill-ikbar tined li hawn f’pajjiżna.
Aktar minn 1,600 metru kwadru se jinbidlu fi ġnien fejn se jkun hemm divertiment minn artisti lokali u fejn se jinħoloq ambjent familjari b’kafeterija u minn fejn ikun jista’ jinxtara ikel tradizzjonali Malti.
Il-Ministru għat-Turiżmu u Kultura, l-Onor. Dr. Francis Zammit Dimech inawgura din il-Fiera nhar it-Tlieta 7 ta’ Diċembru. Hu awgura lil 65 esibitur, li qed jimlew 10 swali bil-prodotti varji tagħhom, negozju tajjeb u li filwaqt li jbiegħu, jferrħu wkoll lil dawk kollha li se jżuru l-istands tagħhom. “Dawn huma żminijiet meta nagħtu u naqilgħu rigali. Iżda m’hemm xejn isbaħ milli tagħti speċjalment lil dawk li jeħtieġu l-għajnuna tagħna.
Il-ftit li jagħti kulħadd jagħmel il-ħafna u joħroġ il-qalb tajba tagħna l-Maltin li magħrufin għal kemm nilqgħu b’entużjażmu l-appelli għall-għajnuna għal dawk l-organizazzjonijiet volontarji, li jaħdmu fost dawk li l-aktar għandhom dritt għal din l-għajnuna,” qal Francis Zammit Dimech, filwaqt li appella biex f’dawn il-jiem ma ninsewx il-Fondazzjoni Eden, li qed tagħmel tant ġid għal dawk inqas fortunati.
Il-Ministru għat-Turiżmu u Kultura qal li l-Gvern kien jemmen bil-fatti li dawk svantaġġjati kellhom jingħataw kull għajnuna biex jegħlbu l-iżvantaġġi tagħhom. Hu qal li anke fil-budget ta’ din is-sena, kien hemm miżuri favur ġenituri b’ulied bi bżonnijiet speċjali u favur dawk li għandhom dawn il-bżonnijiet speċjali.
Ġenituri li għandhom jew se jibgħatu l-uliedhom bi bżonnijiet speċjali fi skejjel privati, u li jħallsulhom għas-servizz ta’ facilitator, (kemm il-darba l-ħtieġa ta’ facilitator tkun ċertifikata mill-iStatementing Moderating Panel u kemm il-darba l-impjieg ta’ facilitator ikun skond kif rakkomandat mill-Bord imwaqqaf għal dan l-iskop), jingħataw għajnuna fiskali permezz ta’ eżenzjoni mid-dħul taxxabbli tagħhom ta’ l-ewwel Lm4,000 mill-ispiża marbuta mas-servizz ta’ dan il-facilitator.
Francis Zammit Dimech qal li hemm żewg miżuri oħra fil-budget. Hu qal li ġiet maħduma skema li permezz tagħha l-Gvern jirrifondi l-VAT li tkun tħallset fuq dawk l-oġġetti mixtrija minn persuni b’diżabilita’ kemm il-darba dawn ikunu intenzjonati għall-użu esklussiv tagħhom.
Dr. Francis Zammit Dimech qal li għajnuna oħra se tingħata lill-koppji b’diżabilita’ li jridu jiżżewwġu. Illum meta żewġ persuni b’diżabilita’ li jkunu jieħdu l-pensjoni ta’ diżabilita’ jiżżewġu, wieħed minnhom jitlef id-dritt tal-pensjoni. Il-Gvern issa se jibda jħallas il-pensjoni ta’ diżabilita’ liż-żewġ persuni b’diżabilita’ li jiżżewġu.
Il-Ministru għat-Turiżmu u Kultura qal li n-numru ta’ dawk li jieħdu allowance għal tfal b’diżabilita’, kif ukoll l-ammonti li joħroġ il-Gvern għalihom, kien qed jikber. Hu qal li s-sena l-oħra 660 tfal bi bżonnijiet speċjali ħadu din il-pensjoni filwaqt li tħallsu aktar minn Lm3 miljun f’pensjonijiet ta’ diżabilita’. Il-Ministru qal li dan kollu kien qed jgħidu biex anke f’okkażjonijiet ta’ ferħ bħalma huma dawk tal-Milied, filwaqt li niċċelebraw, niftakru wkoll f’persuni oħra u ngħinuhom bl-aħjar mod.
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946