Left arrow Mur Lura

ĦADDIEM TAS-SENA 2004

PR1841
Date Icon 29/11/2004

Waqt serata li ttellgħet apposta f’Dar il-Mediterran ġie mħabbar ir-rebbieħ tal-Premju Ħaddiem tas-Sena 2004.  Is-Sinjura Nora Macelli hi r-rebbieħa tas-Sbatax-il edizzjoni tal-Premju li hu maħsub biex jipprema ħaddiema eżemplari għax-xogħol li jwettqu ta’ kuljum.  

Nora Macelli tokkupa l-post ta’ Kap Eżekuttiv tal-Fondazzjoni għal Servizzi Edukattivi (FES).  Fil-fatt hija waqqfet din il-Fondazzjoni fl-2001.  Fuq ix-xogħol il-bieb tagħha huwa miftuħ għal kulħadd.  Hija turi l-apprezzament tagħha għall-abbilità personali u professjonali ta’ kull min jaħdem magħha.  Qatt ma xxekkel il-ħidma ta’ sħabha l-impjegati u tibni fuq it-tajjeb tagħhom filwaqt li tifhem in-nuqqasijiet tagħhom.  Hija taqsam l-ideat tagħha u ssaħħaħ l-ideat ta’ l-oħrajn.  Tittratta lil kulħadd bl-istess mod.  

Is-Sinjura Macelli hija mpenjata fix-xogħol tagħha, onesta, u integra fix-xogħol u fil-mod kif tittratta ma’ l-oħrajn.  Hija kkunsidrata bħala bniedma umli.  Ħafna huma dawk l-impjegati l-oħra li, fil-kwiet, isibu appoġġ konkret minnha meta jiltaqgħu mad-diffikultajiet fil-ħajja.  Din l-attitudni twassal biex jitkattar is-sens ta’ solidarjetà fost l-impjegati kollha.   

Macelli hi persuna b’riżorsi kbar u għandha karatteristiċi umani u professjonali.  Dawn huma evidenti fid-dinamiċi interni ta’ l-organizzazzjoni fejn taħdem.  Hija timpenja ruħha biex tibni relazzjonijiet umani, ġenwini kif ukoll relazzjonijiet leali ma’ kull min ikollu x’jaqsam ma’ l-organizzazzjoni li tmexxi, u b’hekk toħloq trasparenza u professjonalità fil-ħidmiet tal-Fondazzjoni.  

Ix-xogħol ta’ Nora Macelli hu estensjoni ta’ l-impenn soċjali u professjonali matul ħajjitha b’risq min hu imwarrab u dgħajjef fis-soċjetà.  Dan l-impenn soċjali jidher fil-mod kif Nora Macelli tagħti orjentazzjoni ċara lill-Fondazzjoni biex il-programmi tal-Fondazzjoni jilħqu l-familji li l-aktar għandhom bżonn għajnuna minkejja l-impenji tagħha dejjem tassigura li żżomm kuntatt dirett ma’ l-istudenti u l-ġenituri kif ukoll ma’ kollegi tagħha impenjati fil-qasam ta’ l-edukazzjoni.  

Mix-xogħol tagħha joħroġ is-sens ta’ krejattività li jwassal biex Nora żżomm il-Fondazzjoni fuq quddiem f’issues innovattivi kemm fuq livell nazzjonali kif ukoll internazzjonali.  

Waqt is-serata saru messaġġi mill-President ta’ Malta, l-E.T. Dr. Edward Fenech Adami, il-Prim Ministru Dr. Lawrence Gonzi u mill-Ministru ta’ l-Edukazzjoni Żgħażagħ u Xogħol Dr. Louis Galea.  Il-Premju ngħata lis-Sinjura Macelli mill-E.T. Dr. Fenech Adami, filwaqt li s-sbatax-il nominat ingħataw tifkira ta’ l-okkażjoni.   

Il-persuni l-oħra li ġew nominati huma: is-Sur Frans Borg, Ministeru ta' l-Edukazzjoni, Żgħażagħ u Xogħol; Mro. John Borg, Forzi Armati ta’ Malta; is-Sur Paul Camilleri, Kulleġġ Santu Wistin; is-Sur Anthony Caruana, Corinthia Palace Hotel Co. Ltd.; is-Sur Anthony Caruana, Uffiċċju tal-Prim Ministru; is-Sur Vincent Cassar, Ministeru ta’ l-Iżvilupp Urban u Toroq; is-Sur Charles Debono, Dipartiment tal-Protezzjoni Ċivili; is-Sur Max Farrugia, Korporazzjoni Enemalta; is-Sur John Gauci, Airmalta; is-Sur Carmel Magro, Korp tal-Pulizija; is-Sur Paul Miruzzi, Qrati tal-Ġustizzja; is-Sur Lorrie Saliba, Korporazzjoni għas-Servizzi ta’ Ilma;  is-Sur Arthur Sammut, Università ta’ Malta; is-Sur Mario Spiteri, Dipartiment għall-Promozzjoni tas-Saħħa; is-Sin. Denise Vella, Toly Products Ltd.; is-Sin. Mary Anne Vella, Sptar Karen Grech.    

Il-Premju Ħaddiem tas-Sena beda jingħata sa mill-1988 b’inizjattiva tal-Ministru Louis Galea li dak iż-żmien kien Ministru tal-Politika Socjali.  Ir-rebbieħa kollha tal-Premju s’issa kienu s-Sur Martin Grasso (1988), Dr Maria Sciberras M.D. (1989), is-Sur Richard Farrugia (1990), is-Sinj. Mary Vella (1991), is-Sinj. Rita Agius (1992), is-Sur Frans H.Said (1993), is-Sur Francis Cachia (1994), is-Sur Mario Sammut (1995), is-Sur Joe Sammut (1996), is-Sinj. Louisette Pace (1997), is-Sur Joseph Caruana (1998), is-Sur Anthony Bugeja (1999), is-Sur Joe Caruana (2000), is-Sur Alessio Camilleri (2001), is-Sur Edward Borg (2002) u s-Sur George Borg (2003).

DOI  29.11.2004

9.14 Kbytes Last Modified on 29th November, 2004

HOME | GOV.MT 

HELP | LINKS | SITEMAP | SEARCH

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Ċertifikazzjoni internazzjonali tal-ogħla livell għad-dipartiment tar-radjoterapija fiċ-Ċentru tal-Onkoloġija Sir Anthony Mamo

PR261947

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...

STQARRIJA MILL-MINISTERU GĦALL-EDUKAZZJONI U L-ISPORT  Aktar minn 1,800 student jiggradwaw mill-Università ta’ Malta

PR261946

STQARRIJA MILL-MINISTERU GĦALL-EDUKAZZJONI U L-ISPORT Aktar minn 1,800 stu...

Aktar Stqarrijiet Right arrow