SILTIET MID-DISKORS TA’ L-ONOR TONIO BORG, VIĊI PRIM MINISTRU U MINISTRU TAL-ĠUSTIZZJA U L-INTERN, FIL-FTUĦ TA’ WORKING SEMINAR ‘VITTMI TAL-KRIMINALITÀ – KUNSILL LOKALI, PAOLA – 11 TA’ NOVEMBRU 2004
Nirringrazzjakom ta’ l-istedina li għamiltuli għal dan is-seminar dwar il-vittmi tal-kriminalità. Ninsab hawn biex ikun evidenti li l-Gvern iħoss li l-vittmi tal-kriminalità jistħoqilhom l-għajnuna kollha li jista’ jipprovdi l-istat. Skogan fil-ktieb tieghu “The Impact of Police on Victims” iddiskriva lill-vittmi tal-kriminalità bħala l-“partecipanti minsija” fis-sistema tal-ġustizzja kriminali.
Illum, bħala servizzi eżistenti għall-vittmi tal-kriminalità nsibu dawk għan-nisa u t-tfal li jiġu abbużati kif ukoll għall-vittmi ta’ l-usura. Il-Gvern jirrealizza li għalkemm dan żgur li hu pass fid-direzzjoni t-tajba, dawn is-servizzi għall-vittmi huma tassew ftit. Madanakollu, dan huwa biss il-bidu.
Però, tajjeb li ngħidu, li għalkemm għad baqa’ xi jsir, il-gvern żgur li ma nesihomx! Biss biss insemmu l-emendi li saru fil-Kodiċi Kriminali, speċifikament fil-liġi li tirregola l-pulizija. Twaqqaf il-Bord tal-Pulizija li, fost xogħol ieħor, jinvestiga rapporti ta’ nuqqasijiet f’dak li jirrigwarda t-trattament tal-vittmi tal-kriminalità. Twaqqfet b’mod uffiċċjali l-iskema tal-protezzjoni tal-vittma/xhieda. Issa l-vittmi ngħataw id-dritt li jkunu preżenti fis-smigħ tal-kawża li jistgħu jiġu assistiti minn avukat meta qabel ma kellhomx dan id-dritt u li jagħmlu s-sottomissjonijiet meħtieġa dwar pieni wara l-verdett f’ġuri. Issa jistgħu jagħtu xhieda viva voce filwaqt li jiġu mistura mill-akkużat jew inkella li ix-xhieda tagħhom tixxandar fuq monitor fl-awla - b’xandira diretta minn post fil-viċinanzi. Dan kollu sar sabiex nuru li għall-Gvern, mhux talli l-vittma tal-kriminalità mhux il-“partecipant minsi” fis-sistema tal-gustizzja kriminali iżda hija r-raguni għalxiex teżisti s-sistema.
Huwa magħruf li meta persuna tisfa vittma, tgħaddi minn erba’ fażijiet (Crime and its Victims ta’ E C Viano) : Eżatt kif issofri l-att kriminali, il-vittma tiġi trawmatizzata u taqa’ f’xokk. Fit-tieni stadju, il-vittma tirrealizza x’ġara u taċċetta l-fatt li sfat vittma. L-istadju li jmiss huwa dak kruċjali … meta l-vittma tiddeċiedi jekk tieħux passi u jekk iva, x’passi tieħu. Għalhekk huwa fit-tielet stadju li l-vittma tiftaħ qalbha ma’ xi ħadd viċin tagħha u tieħu parir: tmur għand il-pulizija? Tagħmel rapport? Naturalment, hawn jiddependi fuq il-fiduċja fil-pulizija! Fl-aħħar stadju, il-vittma tiġi rikonoxxuta mis-soċjetà u tingħata l-attenzjoni li jixirqilha.
Jidher fiċ-ċar li l-pulizija għandha rwol qawwi fejn jidħol it-trattament tal-vittmi tal-kriminalità. Il-pulizija huwa l-ħolqa bejn il-vittma u l-istat. Għalhekk għandu responsabbiltà qawwija. Riċerka li saret dan l-aħħar fi ħdan l-Istitut ta’ l-Istudji Forensiċi (Università ta’ Malta) tagħti dawn l-indikazzjonijiet:
· Il-maġġoranza tal-pulizija Maltin jemmnu li l-vittmi tal-kriminalità jistħoqqilhom l-importanza kollha.
· Il-maġġoranza tal-pulizija Maltin huma konxji li l-vittmi tal-kriminalità mhumiex soddisfatti bl-aġġornamenti li suppost jingħataw fuq il-każijiet tagħhom …. wara li jirraportaw.
· Il-maġġoranza tal-pulizija Maltin jemmnu li l-pulizija għandhom dejjem iżommu l-vittmi infurmati dwar il-każ tagħhom.
· Il-maġġoranza tal-pulizija Maltin jemmnu li l-għajnuna lill-vittmi tal-kriminalità hija importanti u jistqarru ukoll li l-pulizija ta’ Malta dan temmnu ukoll anka bħala organizzazzjoni.
· Il-maġġoranza tal-pulizija Maltin jixtiequ iktar taħrig dwar kif huma għandhom jittrattaw il-vittmi u jixtiequ li dan it-taħrig jiġi pprovdut b’mod professjonali.
Għalhekk jidher ċar li, minn naħa tal-pulizija Maltija, hemm ir-rieda sabiex jitjieb is-servizz li jingħataw il-vittmi tal-kriminalità. Ma rridux ninsew li fi ħdan il-Korp tal-Pulizija kien ġie mwaqqaf il-Victim Support Unit, intenzjonat għall-vittmi tal-kriminalità. Huwa veru li sfortunatament din is-sezzjoni tiġi ikkunsidrata minn ħafna bħala r-rifuġju biss tal-vittmi tal-vjolenza domestika. Filwaqt li nemmen li dawn ukoll huma vittmi ta’ atti kriminali, nemmen li l-vittmi l-oħra għandhom jingħataw l-importanza li tistħoqqilhom ukoll. Għalhekk hija x-xewqa tiegħi li nara s-servizzi għall-vittmi kollha tal-kriminalità jitjiebu u jitkattru.
Ma rridux ninsew li l-Qrati wkoll jagħmlu l-almu tagħhom sabiex jitħarsu d-drittijiet tal-vittmi. B’sentenzi tal-Probation u ta’ Sentenza Sospiża l-qorti għandha l-opportunità li tordna kumpens lill-vittmi tal-kriminalità. Il-vittmi tal-kriminalità jingħataw ukoll attenzjoni partikolari mis-servizz tal-Probation meta dawn jitqabdu jagħmlu rapport ta’ qabel is-sentenza. Hawnhekk il-vittma jkollha l-opportunità li tgħid dak li tħoss kemm fuq ir-reat li sfat vittma tiegħu kif ukoll tagħti l-opinjoni tagħha fuq l-aħjar sentenza li tista’ tingħata lill-akkużat.
Kif għidt fil-bidu, il-vittmi tal-kriminalità tistħoqqilhom l-għajnuna kollha – psikologika u materjali - li tistà tiġi pprovduta lilhom. Kif diġà wera, il-gvern huwa kommess li jgħin sabiex il-vittmi tal-kriminalità jiġu pprovduti bis-servizzi kollha neċessarji.
DOI 11.11.2004
17.36 Kbytes Last Modified on 11th November, 2004
HOME | GOV.MT
HELP | LINKS | SITEMAP | SEARCH
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946