KONFERENZA STAMPA MILL-ONOR. CARMELO MIFSUD BONNICI, SEGRETARJU PARLAMENTARI FIL-MINISTERU GĦALL-ĠUSTIZZJA U L-INTERN DWAR SEMINAR BIT-TEMA “IL-KTIEB MALTI U L-LIBRERIJI PUBBLIĊI” – AUBERGE D’ARAGON, VALLETTA - IL-ĦAMIS, 28 TA’ OTTUBRU 2004
Kemm ilu li twaqqaf il-Kumitat għall-Iżvilupp tal-Libreriji Pubbliċi beda jingħata aktar attenzjoni settur partikolari li waqa’ taħt ir-responsabbilta’ u l-kontroll ta’ numru ta’ Kunsilli Lokali.
Kif qed isir magħruf, illum il-ġurnata żdiedu b’mod qawwi l-Kunsilli li ġie devolut lilhom dawn il-libreriji pubbliċi. Dan fih innifsu kien u jibqa’ pass importanti u progressiv. Jekk irridu naraw żieda f’ħidmet il-Kunsilli Lokali għandna nimxu f’din id-direzzjoni. Jekk għandna nħarsu lejn il-Kunsilli bħala organi importanti fl-istat demokratiku tagħna rridu nieħdu ħsieb li dan isir u jsir kemm jista’ jkun kullimkien. Pero’dan mhux biżżejjed. Hemm bżonn li nidħlu iktar fil-fond.
Irridu nassiguraw li dawn il-libreriji ma jispiċċawx f’limbu li ħadd ma jagħti każ sewwa tagħhom. Għax huwa veru li hemm Kunsilli Lokali li għamlu differenza, per eżempju dak ta’ Birkirkara li mill-figura ta’ 6,870 fis-sena 2002 bħala self ta’ kotba, is-sena l-oħra din il-figura telgħet għal 43,930; jew tal-Gudja li minn 2,512 telgħu għal 11,300 jew iż-Żebbuġ, Għawdex li minn 401 ktieb, is-self tela’ għal 4,899 ktieb. Hemm fatturi li jgħinu dan, fosthom ix-xiri ta’ kotba ġodda li huma ta’ sustanza u li jinteressaw lill-poplu, kif ukoll kampanji organizzati apposta mill-istess Kunsilli Lokali. Pero’ rridu ngħidu u nuru li mhux kollox huwa ward u żahar, kif jixhdu dawn il-figuri kunsill, kunsill.
Hemm bżonn li l-poplu jagħti l-opinjoni tiegħu u jiddaħħal jipparteċipa iktar f’dan il-qasam. Ma huwiex aċċettabbli li numru ta’ Kunsilli ma jagħtu każ, kważi xejn, tal-librerija pubblika li jkollhom f’idejhom. Hemm bżonn li kull Kunsill ikollu strateġija ċara u li tiġi ppreżentata u mħaddma kull sena sabiex l-ewwel jiżdiedu l-kotba u t-tieni li jiżdiedu dawk li jissellfu l-kotba.
Fl-aħħar laqgħat ta’ dan il-Kumitat, kif ukoll wara l-aħħar seminar li sar fl-20 ta’ Marzu ta’ din is-sena bit-tema “Il-Kunsilli Lokali u l-Libreriji Pubbliċi – Inħarsu ’l Quddiem”, ħareġ ċar li ħafna f’dawn il-Gżejjer ifittxu l-kotba bil-Malti. Hemm bżonn li nassiguraw li jkun hemm iktar kotba bil-lingwa tagħna fuq l-ixkafef ta’ dawn il-libreriji. Iktar u iktar illum meta l-lingwa tagħna hija waħda minn dawk li jiġu wżati fl-istituzzjonijiet ta’ l-Unjoni Ewropea. Ir-rappreżentanti tagħna jistgħu jitkellmu bil-lingwa tagħna u jwasslu l-messaġġ kif iridu huma f’liberta’ sħiħa. Għalhekk ma għadx hawn il-ħsieb li biex tikkomunika fl-Ewropa trid bilfors tarmi l-lingwa tiegħek u tuża dik ta’ ħaddieħor. Dan il-Kumitat għall-Iżvilupp tal-Libreriji Pubbliċi fil-Kunsilli Lokali, immexxi miċ-Chairman Oscar Grech, qiegħed jikkonċentra ħidmietu fuq l-importanza tal-ktieb Malti.
Kif ġie mħabbar fl-1 ta’ Settembru, 2004 il-Kumitat inxteħet sabiex din il-ħidma tissoda aktar. Għalhekk, għada l-Ġimgħa 29 ta’ Ottubru, ġewwa s-Sala tal-Komunita’ fil-Mosta ser jiġi organizzat Seminar bit-tema “Il-Ktieb Malti u l-Libreriji Pubbliċi”. Hemm ser jiġu diskussi żewġ temi ta’ natura importanti u li għandhom jiftħulna aktar għajnejna fuq kemm dan huwa ta’ bżonn. L-ewwel waħda ser tiddiskuti “Avvanzi, tendenzi u żviluppi fil-Letteratura Maltija” fejn ser jipparteċipaw is-Sur Trevor Zahra u s-Sur Immanuel Mifsud u t-tieni waħda “Sehem il-Ktieb Malti fl-Iżvilupp tal-Letteratura Ewropea” fejn ser ikun hemm il-Prof. Oliver Friggieri u s-Sur Frans Sammut.
Dan is-seminar huwa ntenzjonat li jkompli jkabbar l-interess u jħeġġeġ l-ewwel li l-Kunsilli Lokali kollha jieħdu dan is-suġġett bis-serjeta’ u t-tieni sabiex iktar Maltin u Għawdxin ifittxu s-servizzi mogħtija mil-libreriji pubbliċi tagħna.
DOI – 29.10.2004
7.97 Kbytes Last Modified on 29th October, 2004
HOME | GOV.MT
HELP | LINKS | SITEMAP | SEARCH
Stqarrijiet Oħra:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946