Left arrow Go Back

WIRJA TA’ PROGETTI MINN STUDENTI FL-AHHAR SENA TA’ KORS UNIVERSITARJU

PR1131
Date Icon 07/07/2004

Il-Ministru ta’ l-Edukazzjoni Louis Galea inawgura wirja ta’ proġetti mill-istudenti ta’ l-aħħar sena fil-kors ta’ l-Universita’ B.Sc. I.T. (Hons).  Il-Kors ta’ l-informatika fl-Universita’ beda disa’ snin ilu u dan hu s-sitt grupp li se jiggradwa minn dan il-kors.  In-numru ta’ studenti li qed isegwu dan il-kors issa tela’ għal ftit mijiet madankollhu dawn l-istudenti huma mfittxija ħafna kemm fl-industrija tal-manifattura kif ukoll f’dik tas-servizzi.  Ħafna minn dawk li ggradwaw qed jaħdmu fl-Industrija tas-Software, filwaqt li oħrajn qed isibu mpjieg fl-oqsma ta’ l-accountancy, l-ekonomija, ix-xjenza u l-inġinerija.

Il-wirja tinkludi 42 proġett li l-istudenti jkunu għamlu bħala parti mill-aħħar sena tal-kors fl-Universita’.  Dawn ikopru diversi oqsma ta’ speċjalizzazzjoni fl-informatika.  Minbarra l-wirja, il-proġetti ġew pubblikati fi ktejjeb li jagħti idea ta’ x’inhuma l-proġetti bl-iskop li kumpaniji u imprendituri lokali u barranin jaraw x’potenzjal għandhom dawn l-istudenti u x’idea u soluzzjonijiet jistgħu joffru.  

F’diskos li għamel il-Ministru Galea hu faħħar l-istudenti għall-kwalita’ tax-xogħol li qed jippreżentaw u qal li jemmen li l-universita’ qed tipproduċi kwalita għolja ta’ studenti li huma kapaċi jħabbtuha ma’ l-aqwa mħuħ f’pajjiżi oħrajn.  Louis Galea qal li aktar minn setturi oħrajn, is-settur ta’ l-informatika jeżiġi li istituzzjonijiet ta’ taħriġ bħall-Universita u l-MCAST ikunu il-ħin kollu aġġornati ma’ l-iżviluppi li qed iseħħu fil-qasam u fl-industriji li jużaw il-ħiliet ta’ l-istudenti.  Fl-istess ħin hemm bżonn li dawk li diġa’ jkunu qed jaħdmu, isibu opportunitajiet ta’ taħriġ u aġġornament biex jibqgħu kompettitivi fid-dinja tax-xogħol.  L-Universita’ u l-MCAST diġa’ qed joffru diversi korsijiet għall-adulti u hemm bżonn li dawn ikomplu jiżviluppaw.  Louis Galea awgura li l-Universita’ u l-MCAST ikomplu jikkollaboraw flimkien biex l-istudenti miż-żewġ istituzzjonijiet ikunu jistgħu jieħdu taħriġ u esperjenzi differenti.  

Louis Galea temm jawgura kull suċċess lill-istudenti kemm jekk jekk jidħlu għal impjieg iżda b’mod partikolari jekk jiddeċiedu jiftħu għal rashom, hu qal li hemm bżonn li aktar studenti ta’ l-Universita’ jikkonsidraw sewwa l-possibilta’ li jiffurmaw kumpaniji żgħar jew koperattivi, hu tenna li l-ekonomija ta’ pajjiżna, bħal dik ta’ ħafna pajjiżi oħra, hi mibnija fuq kumpaniji żgħar u s-self-employed.    

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra jisħaq fuq il-vulnerabbiltajiet klimatiċi ta’ Malta u r-rwol tal-parlamenti waqt laqgħa parlamentari tal-IPU marbuta mal-COP31 fit-Turkija

PR261942

STQARRIJA MILL-UFFIĊĊJU TAL-ISPEAKER L-Ispeaker tal-Kamra jisħaq fuq il-vu...

More Press Releases Right arrow