DISKORS TA’ L-ONOR EDDIE FENECH ADAMI, PRIM MINISTRU, WAQT IL-LAQGĦA TAS-SINDKI
PR63
18/01/2003
| Ippermettuli | nibda dan id-diskors b’xi ħaġa li normalment issir lejn l-aħħar tad-diskors jiġifieri r-ringrazzjamenti. Irrid l-ewwelnett nirringrazzjakom ta’ l-istedina sabiex niġi u niċċelebra magħkom dan l-anniversarju. Irrid imma wkoll nirringrazzja lil dawk kollha li tul dawn l-għaxar snin li għaddew ħadmu sabiex l-esperiment li nidejna fl-1993 sar wieħed mill-isbaħ esperjenzi ta’ l-iżvilupp amministrattiv u politiku ta’ pajjiżna. Għalkemm jien dejjem emmint li l-Kunsilli Lokali kienu ser jirnexxu, kont konxju mit-tlett sfidi li dawn riedu jiffaċċjaw mat-twelid. |
| L-ewwel | sfida kienet li kellna wieħed miż-żewġ partiti politiċi li b’mod uffiċjali ħareġ kontra l-introduzzjoni tal-gvern lokali. Dan seta’ faċilment wassal sabiex il-kunsilli jsiru ballun politiku li jiġi xxutjat barra mill-grawnd ta’ l-amministrazzjoni qabel tibda l-logħba. Dan ma ġarax ngħid jien, grazzi għall-għaqal li ntwera u x-xogħol li wettqu l-ewwel kunsilli li b’ħidmithom ikkonvinċew li iva, il-kunċett ta’ Gvern Lokali jagħmel sens anke għal Malta. |
| It-tieni | sfida li kellhom jegħlbu l-ewwel kunsilli lokali kienet in-nixfa ta’ sens ċiviku fost il-Maltin. Is-sistema ta’ gvern ċentralista tas-sebgħinijiet, fejn anke l-iżjed affarijiet bażiċi, kienu jiġu deċiżi mill-ministri tal-gvern, ħonqot ħafna mill-inizjattiva ċivika. L-ewwel kunsilli lokali servew biex dakkru l-ftit xitel ta’ sens ċiviku li kien baqa’ f’xi bliet u rħula filwaqt li żergħu żerriegħa ġdida li malajr kibret u nfirxet ma’ kull rokna ta’ Malta. Ir-riżultat hu li llum kull belt u raħal Malti reġa’ kiseb l-identità tiegħu, identità li warajha hemm qafas ta’ amministrazzjoni mwieżen minn sens ċiviku qawwi. |
| It-tielet | sfida kienet waħda ta’ aspettativa. Din l-isfida forsi ma kinitx tanġibbli, ma stajtx tmissa daqs iż-żewġ sfidi li semmejt qabel imma naħseb kienet l-ikbar ħajt li kellhom quddiemhom il-kunsilli lokali għaxar snin ilu. Il-kunsilli lokali bħal kull tarbija tat-twelid, riedu ż-żmien sabiex jitgħallmu jimxu. Il-gvern ċentrali ried ukoll jitgħallem u jaddatta ruħu għal ċirku iżjed dejjaq ta’ poter. Min-naħa l-oħra, l-aspettativa fost iċ-ċittadini kienet għolja. Għalhekk kien hemm il-possibilità li l-ħidma tal-kunsilli ma tlaħħaqx ma’ l-aspettativi taċ-ċittadin. Dan ma seħħx ngħid jien għal żewġ raġunijiet. L-ewwel raġuni kienet l-entużjażmu li wrew il-kunsilli pijunieri, entużjażmu li ġarr miegħu liċ-ċittadini. It-tieni raġuni li waslet biex intgħelbet din l-isfida kienet il-mod għaqli li bih il-gvern għadda b’mod gradwali, responsabbilitajiet ġodda. B’hekk ir-responsabilità tal-kunsilli kibret hekk kif kibret il-kapaċità tagħhom li jwettqu ħidmithom. |
| Ir-riżultati | ta’ din il-ħidma jista’ jarahom kulħadd. Bħal kull Malti ieħor, inħossni kburi nimxi fil-bliet u l-irħula tagħna u nara kif sbieħu t-toroq, il-pjazez u l-ġonna grazzi għax-xogħol li qed jagħmlu l-kunsilli. Dan l-aħħar mort il-Qala Għawdex sabiex ninawgura leisure park. Laqatni l-proġett fih innifsu imma laqatni wkoll id-diskors tas-sindku li fih qal li dan il-proġett kien ilu ħolma għal għexieren ta’ snin. Li kieku ma kienx hemm il-Kunsilli l-probabiltà kbira kienet li dan il-proġett kien jibqa’ ħolma li tintiret minn ġenerazzjoni għal ta’ warajha. Minflok ħolma issa l-ġenerazzjonijiet Qalin ser jirtu proġett li jagħmel ġieħ lil kull min ħadem fuqu hekk kif ser jagħti pjaċir lil kull min jarah u jużah. Din l-istorja hija waħda minn ħafna mferxin ma’ kull rokna tal-gżejjer tagħna. Hija l-istorja tad-differenza li għamlu l-kunsilli lokali. |
| Il-bidla | għall-aħjar li ġabu magħhom il-kunsilli lokali m’hiex limitata għall-ambjent fiżiku. Il-kunsilli lokali llum qed joffru u jaħdmu servizzi li jtejbu l-kwalità tal-ħajja taċ-ċittadin. Il-ħsieb tagħna hu li nagħtu dejjem aktar spazju lill-Kunsilli Lokali sabiex ikabbru r-responsabbiltajiet tagħhom. Dan kien punt li tqajjem fir-rapport dwar id-Demokrazija Lokali f’Malta li għadu kif ġie konkluż mill-Kamra ta’ l-Awtoritajiet Lokali tal-Kunsill ta’ l-Ewropa. Dan ir-rapport jesprimi ammirazzjoni għall-passi konsiderevoli li għamiltu intom, naħseb bi ftit mertu wkoll tal-Gvern Ċentrali, f’dawn l-aħħar għaxar snin. |
U nixtieq nieqaf ftit fuq din l-‘intom’ li għadni kif semmejt. F’din is-sala llum hawn nies minn kull qasam tal-ħajja. Hawn għalliema, sajjieda, professjonisti, nisa tad-dar, żgħażagħ u min mhux daqshekk żagħżugħ. Anke dan fih innifsu huwa ċertifikat tas-suċċess tal-kunsilli lokali. Dawn ġibdu lejhom l-oqsma kollha tas-soċjetà Maltija. L-awtonomija lokali issa hija mnaqqxa fil-Kostituzzjoni tagħna. B’hekk il-vuċi li għandkom hija garantita darba għal dejjem.
| X’futur | għandhom il-Kunsilli Lokali? Jiena nara żewġ opportunitajiet kbar li jistgħu jiftħu bibien ġodda għall-Kunsilli Lokali. L-ewwel opportunità hija l-użu ta’ l-informatika. |
| Kien | bi ħsieb ċar li l-Gvern tiegħi rabat il-Gvern Lokali u l-qasam ta’ l-informatika taħt l-istess ministeru. L-informatika tagħti lil kull tip ta’ amministrazzjoni għodda b’saħħitha ferm. Hija għodda li mhux biss tgħin fl-amministrazzjoni ordinarja, imma aktar minn hekk hija għodda li tagħmilha possibbli li s-servizz jingħata aħjar, f’inqas ħin u b’aktar kumdità għaċ-ċittadin. L-opportunitajiet huma kbar, irridu nkunu aħna li ngħarfu naħtfuhom. Qed nieħdu inizjattivi f’dan il-qasam sabiex inkunu dejjem minn ta’ quddiem. L-akbar kumpaniji f’dan il-qasam illum iħarsu lejn Malta bħala sieħeb bis-sens. Irridu niżguraw li din is-sħubija nisfruttawha fi proġetti li jġibu ċ-ċittadin viċin id-dinja ta’ l-informatika. Irridu li din l-isħubija bejn il-gvern ċentrali u lokali u dawn il-major players tad-dinja ta’ l-informatika ttejjeb bil-kbir il-ħajja taċ-ċittadin. |
| F’dawn | l-aħħar ġimgħat tkellimna ħafna u ser inkomplu nitkellmu fuq sħubija oħra. Malta issa qegħda fuq l-għatba tas-sħubija fl-Unjoni Ewropea. Illum ħafna kunsilliera jafu, għax ħadmu mill-qrib, xi tfisser l-Unjoni Ewropea. Jafu l-programmi li għandha l-Unjoni sabiex tgħin il-Gvern Lokali. Fostkom hemm numru ta’ kunsilli, li minkejja l-limitazzjonijiet imposti fuq pajjiż li għadu barra mill-Unjoni, ġibdu lejhom fondi li ntużaw għall-proġetti ta’ fejda. Wara Mejju tas-sena d-dieħla l-possibilitajiet ser jikbru ferm hekk kif Malta ssir membru. |
| Il-bliet | u l-irħula tagħkom għandhom stedina sabiex jissieħbu fil-familja ta’ bliet u rħula fl-Unjoni Ewropea. M’għandi l-ebda dubju li l-Maltin, kif għarfu l-opportunità tal-gvern lokali minkejja n-nuqqas ta’ qbil politiku li kien hawn dak in-nhar, ser jgħarfu l-opportunitajiet kbar u irrepetibbli li toffrilna sħubija fl-Unjoni Ewropea. |
| Jekk | nagħrfu nieħdu dawn iż-żewġ opportunitajiet żgur li meta niltaqgħu għaxar snin oħra sabiex niċċelebraw l-għoxrin anniversarju nkunu nistgħu nerġgħu nagħtu ċertifikat ieħor ta’ eċċellenza lill-ħidma tal-kunsilli lokali. |
Stqarrijiet Oħra:
PR261932
STQARRIJA MILL-MINISTERU GĦALL-GVERN LOKALI U X-XOGĦLIJIET PUBBLIĊI Kważi n...
PR261931