Left arrow Mur Lura

Domanda qawwija għas-siġar tal-frott

PR16
Date Icon 07/01/2003

Id-domanda għas-siġar tal-frott aktar milli rduppjat f’dawn l-aħħar erba’ snin kif jirrriżulta mit-talbiet li jsiru kull lid-Dipartiment ta’ l-Agrikultura. Il-pjani tad-Dipartiment huma li d-domanda annwali tibda tintlaqa’ kollha minn siġar imkabbra fil-mixtla li d-Dipartiment għandu f’San Vinċenz de Paul, tant li matul is-sena li għaddiet tħawlu u tlaqqmu aktar minn 20,000 rootstock biex jilħqu għall-bejgħ f’Jannar ta’ sena oħra. Id-domanda għas-siġar tal-frott żdiedet minn 4,358 fl-1999 għal 11,611 din is-sena.

Dan qalu l-Ministru għall-Agrikultura u s-Sajd, l-Onor. Ninu Zammit meta dalgħodu żar il-mixtla San Vinċenz de Paul, fejn qed isir il-qlugħ u rootstocks biex fil-jiem li ġejjin jibdew jitqassmu lil dawk li ordnawhom.

Il-Ministru Zammit spjega li l-mixtla San Vinċenz de Paul ġiet stabbilita uffiċjalment f’Jannar tas-sena 2000, meta għall-ewwel darba f’Malta, tkabbru siġar ċertifikati ħielsa mill-mard u l-virus. Dik is-sena, il-mixtla pproduċiet għall-bdiewa lokali 4,300 siġra ċertifikati tal-frott irqieq.

Biex setgħet titwaqqaf, inkisbet l-għajnuna taċ-CIHEAM, permezz ta’ l-Istitut Agronomiku f’Bari, inxtara makkinarju, tħarrġu n-nies billi ntbagħtu Bari u ġew Malta esperti minn żmien għal żmien, minn dan l-Istitut, biex jagħtu l-pariri u t-taħriġ ieħor meħtieġ.

Il-mixtla fiha b’kollox madwar 80 tomna raba. Il-ħamrija u l-pjanti jiġu ttestjati regolarment fil-laboratorji taċ-Ċentru tal-Bioteknoloġija tal-Pjanti f’Ħal Lija, biex ikun assigurat li m’hemm l-ebda mard f’din il-mixtla. Il-pożizzjoni tagħha hi ideali, għaliex hi maqtugħa sew minn art fejn jitkabbru siġar oħra tal-frott. Is-siġar fl-aħħar jiġu ċċertifikati b’sistema aċċettata fl-Ewropa li huma ħielsa minn kull mard.

Il-Ministru Zammit qal li parti sew mir-rootstocks li jitlaqqmu fuqhom qed jiġu pproduċuti f’Malta, fiċ-Ċentru tal-Bioteknoloġija tal-Pjanti.

Il-Ministru Zammit semma wkoll li minn sentejn ’l hawn fl-istess mixtla, inbeda l-proċess tat-tkabbir tax-xitel tas-siġar taż-żebbuġ ukoll ċertifikati ħielsa mill-mard u l-virus. Għal dan l-iskop intbagħtu wkoll ħaddiema jitħarrġu l-Italja fit-tilqim tas-siġar taż-żebbuġ. Din is-sena, din il-mixtla pproduċiet aktar minn 4,000 siġra taż-żebbuġ, imqassmin f’varjetajiet differenti: tal-mejda u taż-żejt.

Il-mixtla bdiet ukoll tipproduċi miż-żerriegħa s-selvaġġ taż-żebbuġ għat-tilqim.

Barra minn hekk, inbdiet ukoll ħidma biex jitkabbru dwieli tar-razza, inbid u mejda, ukoll ċertifikati mingħajr mard u virus.

Matul is-sena li għaddiet tkabbru aktar minn 20,000 xitla tas-selvaġġ tad-dwieli (rootstock) li se jinbiegħu bħala parti minn 47,300 ordnati mill-bdiewa Maltin. Dan minbarra ordni għal 57,000 dielja mlaqqma ta’ l-inbid u tal-mejda. Fl-istess waqt qed jitħejja aktar r-raba’, bit-testijiet kollha meħtieġa, biex jitħawlu l-mother plants ħalli minnhom jittieħdu kemm żraġen għas-selvaġġ (rootstock) kif ukoll għat-tilqim tad-dwieli tar-razza.

Il-Ministru Zammit enfasizza li l-iskop wara din il-ħidma hu biex il-bidwi Malti jkollu siġar b’saħħithom u għammiela kif ukoll biex is-siġar li qed nipproduċu fuq rootstock ġdid, bħal GF-677, Mirabolan u oħrajn, li huma reżistenti għal mard u jagħtu aktar produzzjoni, jieħdu post dawk antiki li llum intrikbu wisq minn mard li jtellef il-produzzjoni u l-kwalità tal-frott.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozzi leġiżlattivi biex tkompli tissaħħaħ il-ġlieda kontra l-vjolenza fuq in-nisa u l-vjolenza domestika

PR261931

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

Aktar Stqarrijiet Right arrow