Left arrow Go Back

Donazzjoni ta' Tail-Lift Van għall-iSkola San Miguel

PR225
Date Icon 22/02/2002

Il-Ministru ta' l-Edukazzjoni Louis Galea, għan-nom ta' l-iSkola San Miguel ta' Pembroke, irċieva donazzjoni ta' tail-lift van mill-President tal-Lions Club (Malta), is-Sur Joseph Attard. Dan il-vann speċjalizzat se jintuża biex jittrasporta lit-tfal li jattendu l-iskola San Miguel u xi tfal oħra li skejjel fil-lokal tagħhom.

Il-Ministru Louis Galea faħħar l-impenn tal-Kunsill ta' l-iSkola San Miguel kif ukoll tal-Membri tal-Lions Club (Malta) li f'dawn is-sentejn ħadmu flimkien biex jinxtara dan il-vann speċjalizzat u biex inġab hawn Malta.

Il-President tal-Lions Club Malta qal li wara konsultazzjoni maċ-Ċhairperson tal-Kummissjoni Nazzjonali Persuni b'Diżabilità dwar kif il-Lions Club jista’ jgħin, kien identifikat il-bżonn ta' vann speċjalizzat għall-iskola San Miguel. Il-Lions Club organizza numru ta' attivitajiet biex jiġbor il-flus meħtieġa.

Il-vettura se tintuża fuq ir-rotot ta' l-iskola biex tittrasporta lit-tfal mid-dar għall-iskola u lura. Barra minn dan, tfal li għandhom kundizzjoni bħal tat-tfal li jattendu din l-iskola u li bħalissa qegħdin jattendu l-iskola tal-lokal tagħhom, se jagħmlu wkoll użu mit-trasport ta' din l-iskola. B'hekk, l-iskola San Miguel qed tappoġġja ukoll lill-istudenti li qegħdin f'siġġu tar-roti biex ikunu jistgħu jipparteċipaw f'attivitajiet edukattivi li jsiru barra mill-iskola.

Il-vann jiswa madwar Lm 8500. Il-Lions Club Malta għamel tajjeb għall-ispejjeż biex inxtrat il-vettura u biex din twasslet Malta filwaqt li d-Diviżjoni ta' l-Edukazzjoni ħallset il-kumplament ta' l-ispejjeż.

Il-Ministru ħabbar li l-ġimgħa d-dieħla se jasal Malta l-Professur Sir Colin Stansfield Smith li minbarra l-fama internazzjonali tiegħu fil-qasam ta' l-Arkitettura, ħadem u għadu jaħdem fis-settur ta' l-edukazzjoni f'diversi lokalitajiet fl-Ingilterra. Il-Professur Sir Colin Stansfield Smith se jindirizza konferenza organizzata mill-Fondazzjoni għall-iSkejjel ta' Għada li qed tniedi tliet programmi ta' xogħlijiet fl-iskejjel ta' l-istat li wieħed minnhom se jitratta l-aċċessibilità fl-iskejjel. Il-Ministru qal li l-programm ta' l-aċċessibilità se jkun fuq nett ta' l-aġenda tal-Fondazzjoni peress li kemm f'livell nazzjonali kif ukoll permezz tal-Kurrikulu Nazzjonali irridu nersqu dejjem aktar lejn soċjetà inklussiva li toffri opportunitajiet indaqs f'kull qasam.

Il-Ministru tenna li fil-qasam ta' l-edukazzjoni speċjali u inklussiva pajjiżna għamel passi importanti. Il-Ministru qal li l-Gvern qed ikompli bl-impenn tiegħu f'dan il-qasam u qed jaħdem biex flimkien ma' dawk kollha involuti jkunu riżolti ċerti diffikultajiet biex it-tfal u ż-żgħażagħ b'diżabilità fl-iskejjel primarji u sekondarji u dawk speċjali jingħataw l-aħjar servizz possibbli. Għal dan l-iskop il-Kumitat Ministerjali għall-Edukazzjoni Inklussiva waqqaf Working Groups, wieħed li jirrevedi d-deskrizzjoni tad-doveri (job description) ta' Facilitator u l-ieħor dwar l-amministrazzjoni ta' mediċini ma' studenti fil-ħin ta' l-iskola.

Wara li l-pożizzjoni ta' Facilitator issa ilha stabbilità għal għadd ta' snin, u wara l-esperjenza li diġà għaddew minna kemm il-Facilitators kif ukoll l-istudent bi bżonnijiet specjali, inħasset il-ħtieġa li tkun riveduta d-deskrizzjoni tad-doveri tal-Facilitators bl-iskop li tingħata l-aħjar edukazzjoni kif ukoll l-appoġġ u l-attenzjoni meħtieġa. Il-Facilitators mistennija li jimplimentaw il-Programm Edukattiv Individwali skond il-ħtiġijiet personali ta' l-istudenti kif ukoll jagħtu l-attenzjoni għall-bżonnijiet fiżiċi ta' l-istudent. Il-working group se jara wkoll f'liema oqsma għandhom jitħarrġu kemm il-Facilitators kif ukoll ħaddiema oħra li jistgħu jkunu meħtieġa biex jagħtu servizz ma' tfal bi bżonnijiet speċjali.

Minħabba li matul dawn l-aħħar snin, il-politika ta' inkluzzjoni xterdet sewwa fil-livelli kollha ta' l-iskejjel, qed tinħass il-ħtieġa li jsiru arranġamenti partikulari għal certa medikazzjoni li whud mill-istudenti jeħtieġu waqt li jkunu fl-iskola taħt ir-responsabbiltà tal-Facilitator jew l-Għalliema. Il-working group se jipproponi kif jistgħu ikunu indirizzati diffikultajiet mediċi, edukattivi kif ukoll legali li jistgħu jinqalgħu.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSUMER PROTECTION  European funding through the Erasmus+ programme to strengthen educators’ professional development

PR261925EN

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...

More Press Releases Right arrow