82,000 FLIXKUN TAL-PLASTIK MIĠBURA MINN ‘GIRL GUIDES’
Ir-riċiklaġġ kien kruċjali biex tirnexxi l-istrateġija għall-immaniġġjar ta’ l-iskart solidu fil-gżejjer Maltin. Dan qalu l-Onor. Francis Zammit Dimech, Ministru għar-Riżorsi u l-Infrastruttura, meta żar grupp ta’ Girl Guides li kienu qed jieħdu sehem f’attivita’ marbuta mal-ġbir ta’ fliexken tal-plastik.
Hu qal li skond il-ftehim li lħaqna ma’ l-Unjoni Ewropea, sa tarf l-2005 irridu nkunu qed nirriċiklaw ta’ l-inqas 25 fil-mija ta’ l-iskart kollu ta’ l-ippakkjar. Sa tarf l-2009 Malta se tkun qed tirriċikla ta’ l-inqas 15 fil-mija ta’ l-iskart mill-plastik.
Il-Ministru qal li fl-1999 f’pajjiżna ntużaw 75 miljun kontenitur mhux ritornabbli u li għalhekk jispiċċaw fil-Magħtab. Aktar minn 30 miljun minn dawn il-kontenituri huma fliexken tal-plastik ta’ l-ilma, 11.2 miljun huma kontenituri tal-fruit juices, 9.4 miljuni huma fliexken ta’ sports drinks u ice teas, 3.3 miljun fliexken ta’ soft drinks u 20.5 miljun fliexken tal-birra.
L-Onor Zammit Dimech tenna li sehem essenzjali mill-istrateġija għall-immaniġġjar ta’ l-iskart solidu kien il-programm kontinwu ta’ komunikazzjoni ma’ dawk kollha involuti f’din l-istrateġija. Hu qal li għal dan l-iskop kienet twaqqfet task force, taħt l-awspiċi tal-Ministeru ta’ l-Edukazzjoni u kkoordinata minn Proġett Skart bl-iskop li jitħejjew pakketti edukattivi li jittrattaw l-immaniġġjar ta’ l-iskart f’suġġetti mgħallma fl-iskejjel primarji u sekondarji. Hu qal li l-iskop ta’ din l-inizjattiva kien li l-istudenti jkollhom kuntatt mas-suġġett ta’ l-immaniġġjar ta’ l-iskart matul iż-żmien li jagħmlu l-iskola.
Francis Zammit Dimech fakkar li f’nofs dan ix-xahar Proġett Skart nieda eżerċizzju għas-separazzjoni ta’ l-iskart f’25 skola fuq l-istess linji ta’ dak li qed jitwettaq fid-djar. Hu qal li ’l quddiem dan l-eżerċizzju kien se jinfirex għall-iskejjel kollha.
Il-Ministru għar-Riżorsi u l-Infrastruttura qal li minn żmien għall-ieħor jissejjaħ biex isegwi mill-qrib attivitajiet li jkunu qed jitwettqu minn tfal ta’ skejjel, minn boy scouts u girl guides. Xi xhur ilu kien żar grupp ta’ boy scouts li kienu għall-kamp annwali tagħhom f’Marsaxlokk fejn ħadu inizjattiva li jisseparaw l-iskart. Francis Zammit Dimech qal li kien ta’ pjaċir għalih li għal darb’oħra jkun fl-Impjant tal-Kompostaġġ f’Sant’Antnin fejn il-Malta Girl Guides Association kienu qed jieħdu fliexken tal-plastik biex ikunu riċiklati.
Hu spjega li l-aħħar li kien f’dan l-Impjant kien fis-6 ta’ Diċembru fejn segwa proċess ta’ imballaġġ ta’ fliexken tal-plastik biex jiġu esportati għar-riċiklaġġ. Hu qal li fl-istess post kien qed jinġabar apparat elettroniku li m’għadux aktar utli biex jintuża u għalhekk jista’ jiġi riċiklat.
Francis Zammit Dimech faħħar l-inizjattiva tal-Girl Guides li matul is-sena ġabru l-fliexken tal-plastik minn diversi lokalitajiet ta’ Malta. Hu qal li b’kollox ipparteċipaw 12-il unit mir-Rabat, San Ġwann, Tarxien, Msida, Dingli, Mosta, Gżira, Żebbuġ, Attard, Għargħur, Qawra u Swieqi. B’kollox dawn ġabru 82,000 flixkun, bil-unit tar-Rabat jiġbor l-akbar numru ta’ fliexken, 26,000. Francis Zammit Dimech qal li dawn il-fliexken inġabru l-aktar mid-djar u kienu parti minn pjan tal-Malta Girl Guides Association biex jedukaw liż-żgħażagħ dwar problemi ambjentali.
Żied jgħid li bl-għajnuna ta’ Proġett Skart dawn il-fliexken ittieħdu fl-Impjant ta’ Sant’Antnin. Hemmhekk jintgħażlu, jkunu mballati, jinbiegħu u wara jkunu esportati għar-riċiklaġġ.
Il-Ministru qal li kien jinkoraġixxi b’kull mod attivitajiet bħal dawn għaliex kien jemmen li aktar maż-żgħażagħ tagħna jkunu konxji mill-ħtieġa li nnaqqsu l-iskart, nirriċiklawh u nużawh mill-ġdid aktar naslu biex nilħqu u nissuperaw il-miri li qiegħdna quddiemna fl-Istrateġija għall-Immaniġġjar ta’ l-Iskart Solidu fil-Gżejjer Maltin.
Stqarrijiet Oħra:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en