TALBIET LILL-UE GĦAL DISA’ PROĠETTI FIL-BELT VALLETTA
Il-Ministru għar-Riżorsi u l-Infrastruttura Francis Zammit Dimech qal li issa li pajjiżna ġie aċċettat bħala membru ta’ l-Unjoni Ewropea l-Gvern diġà pprepara d-dokumentazzjoni meħtieġa li tifforma l-bażi għat-talbiet li jagħmel pajjiżna għal fondi minn programmi strutturali u ta’ koeżjoni.
Dan qalu waqt li żar xogħol ta’ restawr li twettaq mill-Proġett għar-Riabilitazzjoni tal-belt Valletta bl-għajnuna tal-BOV, fuq iż-żewġ funtani f’Misraħ San Ġwann, Valletta.
Francis Zammit Dimech qal li fost il-proġetti li għalihom qed tintalab għajnuna hemm disa’ relatati mal-belt Valletta b’valur ta’ madwar Lm6 miljun.
Il-Ministru Francis Zammit Dimech qal li tul l-erbatax il-sena li ilu mwaqqaf, il-Proġett għar-Riabilitazzjoni tal-Belt Valletta (VRP) wettaq mhux biss proġetti kbar iżda anke proġetti żgħar.
Francis Zammit Dimech qal li l-VRP irrestawra diversi niċeċ li jinsabu fil-kantunieri tat-toroq fil-belt Valletta u l-Floriana. Hu qal li fost dawn kien hemm in-niċeċ ta’
- San Franġisk fi Triq Sant’Ursula kantuniera ma’ Triq Santa Luċia, Valletta.
- San Pawl fi Triq San Pawl kantuniera ma’ Triq Santa Luċia, Valletta.
- San Ġwann fi Triq San Pawl kantuniera ma’ Triq S. Luċia, Valletta.
- San Pawl fi Triq San Nikola kantuniera ma’ Triq il-Bir, Valletta.
- Tas-Salvatur fi Triq is-Sur kantuniera ma’ Triq S. Franġisk, Floriana.
- Tal-Kunċizzjoni fi Triq il-Kapuċċini kantuniera ma’ Triq San Tumas, Floriana.
- Ta’ San Publiju f’Xatt il-Belt.
Il-Ministru għar-Riżorsi u l-Infrastruttura qal li l-Proġett għar-Riabilitazzjoni tal-Belt Valletta iddeċieda li jirrestawra erba’ funtani fil-kapitali, tnejn fi Pjazza San Ġorġ u tnejn f’Misraħ San Ġwann. Hu qal li l-aħħar tnejn, għalkemm ta’ żmien l-Ingliżi, huma ta’ importanza kbira. Żied jgħid li dawn ġew restawrati u issa qed jiffunzjonaw.
Francis Zammit Dimech qal li VRP qed jaħdem biex jikseb sponsorships ħalli jkun jista’ jkabbar il-firxa tal-ħidma tiegħu. Hu qal li wieħed mill-isponsors regolari li qed jgħin f’diversi proġetti żgħar ta’ restawr hu l-Bank of Valletta. Dan il-bank għen fir-restawr ta’ dawn il-funtani u anke aċċetta li jibqa’ jgħin fil-manutenzjoni tagħhom għal ħames snin. Dan kien jassigura li mhux biss dawn il-funtani ġew restawrati iżda li se jibqgħu jinżammu fi stat tajjeb. Francis Zammit Dimech irringrazzja lill-Bank of Valletta għall-għajnuna tagħhom.
Il-Ministru Francis Zammit Dimech qal li dakinhar kien se jiltaqa’ għall-ewwel darba l-Kumitat li se jiġġudika s-sottomissjonijiet għal disinji għal pavimentar f’Misraħ San Ġwann, quddiem il-Kon-Kattidral ta’ San Ġwann u parti minn Triq il-Merkanti. Hu qal li dan permezz ta’ dan il-proġett kien maħsub li jsir upgrading tas-servizzi u pavimentar. Ix-xogħol kien mistenni jibda lejn l-aħħar tas-sena d-dieħla. Hu qal li dan il-proġett kien maħsub li jkabbar l-area fil-belt Valletta li se tkun pedestrianised. Francis Zammit Dimech qal li dan kien wieħed mill-proġetti li kienet se tintalab għajnuna finanzjarja għalih mill-Unjoni Ewropea.
Il-Ministru għar-Riżorsi u l-Infrastruttura qal li l-ħidma ta’ riabilitazzjoni u restawr li qed titwettaq fil-kapitali ta’ pajjiżna hi waħda kontinwa u tirrifletti l-impenn tal-Gvern li jħares il-wirt storiku ta’ pajjiżna li hu fost l-eqdem fid-dinja.
Stqarrijiet Oħra:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en