STQARRIJA MILL-PRIM MINISTRU FIL-KAMRA TAR-RAPPREŻENTANTI DWAR IT-TMIEM TAN-NEGOZJATI MA’ L-UNJONI EWROPEA.
Nixtieq ninforma lill Kamra li nhar il-Ġimgħa, 13 ta’ Diċembru, 2002 f’isem il-Gvern aċċettajt li Malta tissieħeb fl-Unjoni Ewropea b’effett mill-1 ta’ Mejju 2004 bil-kundizzjonijiet kif negozjati bejn il-Gvern Malti u l-Unjoni Ewropea.
Flimkien ma’ Malta għalqu n-negozjati disa’ pajjiżi oħra jiġifieri Ċipru, Estonja, Latvja, Litwanja, r-Repubblika Ċeka, l-Ungerija, is-Slovenja, is-Slovakkja u l-Polonja.
B’hekk it-13 ta’ Diċembru ra l-qasma bejn il-pajjiżi Ewropej tispiċċa u titwieled Ewropa Waħda. Dan huwa fatt storiku li Malta hija kburija li ħadet sehem fih. Huwa avveniment li għandu jfisser paċi u sliem, progress ekonomiku u soċjali, stabbilità politika u solidarjetà għall-pajjiżi ta’ l-Ewropa.
Malta bdiet in-negozjati tagħha fl-15 ta’ Frar 2000, wara li kienet għamlet it-talba biex tissieħeb fl-Unjoni Ewropea fis-16 ta’ Lulju, 1990. Kienet għalhekk triq twila li tulha rajna l-pajjiż jgħaddi minn żmien ta’ bidla biex issa jinsab f’pożizzjoni tajba li jsir membru fit-tkabbir li jmiss.
In-negozjati missew l-oqsma kollha politiċi, ekonomiċi u soċjali u wasslu għal qbil finali. Il-Gvern dejjem emmen li b’rieda soda u b’fiduċja fih innifsu u fil-poplu Malti seta’ jiżgura l-aħjar kundizzjonijiet għal sħubija.
Ir-riżultat irid issa jiġi ssiġillat b’referendum mill-poplu Malti.
Qabel dan isir il-Kamra ser tingħata, kif hu xieraq, l-opportunità li tesprimi ruħha fuq dan l-avveniment storiku għal Malta u għall-Ewropa f’dibattitu li jsir f’Jannar, 2003.
Irrid nirringrazzja lil dawk kollha li ħadu sehem fin-negozjati twal u spiss diffiċli.
Nirringrazzja lill-Ministru Joe Borg li taħt id-direzzjoni u l-ħarsien tiegħu saru n-negozjati, lil Richard Cachia Caruana li b’enerġija, dedikazzjoni u kompetenza kien iċ-Chairman tal-Core Negotiating Group, lill-Ambaxxatur Victor Camilleri u lill-membri l-oħra tal-istess Grupp.
Nirringrazzja lil membri tal-MEUSAC għall-kontribut tagħhom fid-diskussjonijiet dettaljati dwar kull aspett tan-negozjati. Fost dawn hemm membri li pparteċipaw fuq bażi personali u oħrajn li rrappreżentaw interessi partikolari.
Nirringrazzja lis-Segretarji Permanenti tal-Ministeri kollha tax-xogħol assidwu tagħhom kif ukoll lid-diversi Diretturi Ġenerali u Diretturi f’diversi Dipartimenti, kif ukoll dawk kollha li ħadmu magħhom.
Nirringrazzja fuq kollox lill-poplu Malti tal-mandat li ta lili u lill-Gvern tiegħi fl-elezzjoni tal-5 ta’ Settembru 1998 biex inwassal dawn in-negozjati għal tmiem b’suċċess.
Inwiegħed issa li nerġa’ ngħaddi f’idejn il-poplu Malti dan il-mandat u nistiednu biex bil-vot ħieles tiegħu f’referendum jirratifika dan il-ftehim.
Stqarrijiet Oħra:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en