Left arrow Go Back

RESTAWR TA’ TEŻORI STORIĊI FIL-KAPITALI TA’ PAJJIŻNA

PR1750
Date Icon 16/12/2002

Waqt li kien qed jżur iż-żewg proġetti ta’ restawr li qed jitwettqu mid-Ditta Sante Guido għall-Proġett għar-Riabilitazzjoni tal-belt Valletta, il-Ministru għar-Riżorsi u l-Infrastruttura Francis Zammit Dimech qal li l-ħidma li wettqet l-amministrazzjoni prezenti wasslet biex kienu investiti aktar minn Lm13-il miljun fi proġetti ta’ restawr u riabilitazzjoni fil-belt Valletta.

Francis Zammit Dimech qal li fl-1988 Gvern Nazzjonalista waqqaf il-Proġett għar-Riabilitazzjoni tal-belt Valletta. Minn dik is-sena ’l hawn, dan il-Proġett investa madwar Lm4.6 miljun fi proġetti ta’ riabilitazzjoni f’diversi postijiet ta` importanza nazzjonali u storika bħalma huma l-Konkatidral ta’ San Ġwann, fil-Palazz Presidenzjali, bereġ, knejjes u ġonna pubbliċi.

Minbarra dan l-investiment il-Ministeru għar-Riżorsi u l-Infrastruttura mill-1987 wettaq xogħol ta’ rikostruzzjoni fiċ-Ċentru tal-Konferenzi tal-Mediterran li sewa Lm2.9 miljun, wettaq il-proġett ta’ riabilitazzjoni tal-Kavallier ta’ San Gakbu b’investiment ta’ Lm4.5 miljun u rrestawra u rriabilita l-Berġa ta’ l-Italja u l-faċċata tal-Knisja ta’ Santa Caterina d’Italia li nvolvew nefqa ta’ aktar minn miljun lira.

Il-Ministru żied jgħid li l-ħtiġijiet tal-kapitali ta’ pajjiżna kienu kbar ħafna minħabba l-wirt kbir storiku li fiha l-belt Valletta. Hu qal li kien għalhekk li l-Gvern qed jinvesti kontinwament f’xogħlijiet ta’ restawr u riabilitazzjoni.

Il-Ministru għar-Riżorsi u l-Infrastruttura qal li bħalissa kien qed isir xogħol ta’ riabilitazzjoni fit-tliet ġonna ewlenin tal-Belt, kienu qed jitwettqu diversi proġetti ta’ restawr fuq affreski fil-Palazz Presidenzjali u proġetti ta’ riabilitazzjoni fl-istess bini. Għas-sena 2003, il-Proġett għar-Riabilitazzjoni tal-belt Valletta kien se jwettaq diversi proġetti li kienu jinkludu

  • Is-swar ħdejn Salinos Ground,
  • Is-swar tad-daħla tal-Belt,
  • Il-faċċati tad-Dar Parrokjali ħdejn il-Knisja tal-Vitorja,
  • Is-sur ta’ Santa Barbara,
  • Il-faċċata tat-teżoreria f’Misraħ San Ġorġ,
  • Is-Sala Sant’Jiermu u kappella fil-Forti Sant’Jiermu,
  • Iċ-Ċentru ta’ l-Eżamijiet fi Biagio Steps,
  • Id-dħul tal-Palazz Presidenzjali,
  • Il-faċċata tal-Biblioteka.

Il-Ministru Francis Zammit Dimech qal li fil-laboratorju tal-Proġett għar-Riabilitazzjoni tal-belt Valletta, ħaddiema tad-Ditta Sante Guido kienu qed jirrestawraw bust tal-bronz li jinsab fil-faċċata tal-Knisja tal-Vitorja u partijiet tar-ram fil-kappella ta’ San Mikiel fil-Knisja ta’ San Pawl. Hu qal li dawn iż-żewġ proġetti kienu ta’ mportanza kbira. Il-bronz tal-Knisja tal-Vitorja hu parti mill-proġett ta’ restawr tal-faċċata ta’ l-istess knisja fejn bħalissa kien qed isir restawr tal-parti ċentrali tal-faċċata li kien jinkludi l-irħam u l-ġebel dekorattiv. Fi ftit jiem oħra se jibda x-xogħol ta’ restawr tal-faċċata tad-dar tal-kappillan li tmiss mal-Knisja tal-Vitorja.

Il-Ministru għar-Riżorsi u l-Infrastruttura qal li l-proġett tal-kappella ta’ San Mikiel fil-Knisja ta’ San Pawl hu xogħol ieħor ta’ mportanza minħabba l-irħam u teżori oħra li fiha din il-kappella li tinkludi dekorazzjonijiet tar-ram u ġebel prezzjuż li minnu, sa ma beda r-restawr, ma kien jidher xejn u li llum qed terġa toħroġ is-sbuħija tiegħu.

Il-Ministru Francis Zammit Dimech qal li kull investiment fil-wirt storiku ta’ pajjiżna kien flus minfuqa tajjeb. Mhux biss biex kull Malti jsir aktar konxju mill-istorja millenarja ta’ pajjiżna, iżda anke għaliex l-istorja kienet niċċa oħra tas-settur turistiku li kien jiġġenera kwart tal-ġid nazzjonali.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozzi leġiżlattivi biex tkompli tissaħħaħ il-ġlieda kontra l-vjolenza fuq in-nisa u l-vjolenza domestika

PR261931

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

More Press Releases Right arrow