Left arrow Go Back

CRIMSON WING: STORJA TA’ SUĊĊESS - IL-MALTIN B’SEHEM IMPORTANTI F’DAN IS-SUĊĊESS.

PR1701
Date Icon 04/12/2002

Il-Ministru għall-Ġustizzja u Gvern Lokali Austin Gatt, fisser l-esperjenza tal-kumpanija internazzjonali Crimson Wing, bħala esperjenza li tixhed il-ħiliet u l-kapaċitajiet tal-Maltin.

Il-Ministru Gatt qal li l-kumpanija Crimson Wing, kellha l-kuraġġ li tinvesti f’pajjiżna, u llum qed taħsad il-frott tad-deċiżjoni li ħadet, għax kif saħaq Dave Walsh, ic-CEO tal-Crimson Wing, din il-kumpanija kibret bis-saħħa tal-kapaċitajiet tal-ħaddiema Maltin.

Dr. Austin Gatt spjega li Malta tipproduċi nies kapaċi, u li jħabtuha tajjeb ma’ l-aħjar nies madwar id-dinja fil-qasam tal-ICT.

Huwa kompla li l-priorita’ tal-Gvern Malti, hija li dan ikompli jespandi lokalment, biex Malta tkun iċ-Ċentru ta’ eċċellenza fir-reġjun. Dr. Gatt sostna li dan l-argument jkompli jiġi msaħħaħ ukoll, mill-fatt li m’hawnx pajjiż ieħor fir-reġjun li għandu l-ingredjenti kollha biex jkun ċentru ta’ eċċellenza. Dawn jinkludu, l-kapaċita tal-lingwa Ingliża, l-ħila u d-dedikazzjoni tal-Maltin kif ukoll l-impenn tal-Gvern li qed jimxi bi pjan ċar u strateġiku.

Il-Ministru Gatt, spjega li llum huma dawk il-kumpaniji li huma knowledge based li qed ikollhom suċċess. Crimson Wing hija waħda mill-kumpaniji li għarrfet dan u llum tista’ titqies bħala waħda mill-kumpaniji ewlenin madwar id-dinja fl-iżvillupp ta’ soluzzjonijiet ta` l-informatika. F’dan il-kuntest, kompla Dr. Gatt, huwa importanti, li nkomplu bil-ħidma tagħna biex inkomplu ninvestu fir-riżorsi tagħna jekk tassew irridu nkomplu nsaħħu pajjiżna. Huwa spjega li s-suċċess ta’ Crimson Wing tikkonferma li l-ħiliet u l-kapaċitajiet tal-Maltin huma eżistenti.

Dr. Gatt, kompla li biex nilħqu l-miri tagħna, li pajjiżna jkun tassew ċentru reġjonali ta’ eċċellenza, jrid jkollna l-kuraġġ li nieħdu deċiżjonijiet u nissieħbu ma’ kumpaniji multinazzjonali bħal ma għamilna ma’ Microsoft u Cisco.

Il-Ministru Gatt tkellem ukoll dwar il-fiduċja tal-Gvern fis-settur privat. Konformi mal-politika ta’ outsourcing li qed iħaddan, il-maġġoranza ta` l-applikazzjonijiet ta` l-e-Government qed jiġu żviluppati mis-settur privat lokali.

Dr. Austin Gatt għamel ukoll referenza dwar l-importanza li pajjiżna jissieħeb fl-Unjoni Ewropea. Huwa kompla li l-fondi li jeżistu fl-Unjoni Ewropeja għall-iżvilupp ta’ proġetti f’dan il-qasam, għall-pajjiżi li huma membri, huma kbar. Bi sħubija fl-Unjoni Ewropea, is-settur privat lokali jkun jista` jibbenefika minn dawn il-fondi, u jkun jista` jiżviluppa iktar.

Dr. Austin Gatt temm jgħid li l-futur huwa sabiħ kemm għax il-Maltin huma kapaċi kif ukoll għax il-Gvern preżenti jaf fejn irid imur. Qed jimxi bi pjan ċar, u qed jiżviluppa lil Malta bħala Ċentru ta’ eċċellenza, u qed jattira lejn pajjiżna l-aħjar kumpaniji.

Tkellem ukoll Dave Walsh, ic-CEO tal-kumpanija, li filwaqt li faħħar il-ħiliet tal-Maltin, ħabbar, li l-kumpanija qed toffri l-ishma tagħħa għall-ħaddiema tagħha Maltin. Dan jixhed, kompla Walsh, il-fiduċja li Crimson Wing għandha fil-ħaddiem Malti. Huwa fisser li Crimson Wing, tirrikonoxxi l-viżjoni tal-Gvern Malti u temmen li pajjiżna jinsab fid-direzzjoni li jsir iċ-Ċentru Reġjonali ta’ eċċellenza fil-qasam ta` l-Informatika.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozzi leġiżlattivi biex tkompli tissaħħaħ il-ġlieda kontra l-vjolenza fuq in-nisa u l-vjolenza domestika

PR261931

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

More Press Releases Right arrow