Left arrow Go Back

731 talba għal għajnuna fuq it-tkabbir tal-patata

PR1652
Date Icon 25/11/2002

Il-Ministru għall-Agrikultura u Sajd, l-Onor. Ninu Zammit qal li l-Gvern s’issa irċieva 731 talba mingħand bdiewa għal għajnuna permanenti li l-Gvern se jibda jagħti fuq it-tkabbir tal-patata tas-sajf. Din l-għajnuna, li se tibda tingħata b’seħħ minn din is-sena, jiġifieri għall-patata li nqalgħet fir-rebbiegħa u l-bidu tas-sajf, tammonta għal Lm10 kull tomna raba’ miżrugħa.

Il-Ministru Zammit kien qed jitkellem f’żewġ laqgħat li kellu ma’ bdiewa, waħda fl-Imġarr u oħra fil-Pitkalija, dwar l-għajnuna li bdiet tingħata lill-bdiewa kif ukoll dwar l-introduzzjoni taċ-ċertifikat tal-Eurepgap, għalissa fir-rigward tat-tkabbir tal-patata għall-esportazzjoni. Hu qal li t-talbiet li saru għal għajnuna jkopru mal-5,886 tomna raba’, li jfisser għajnuna ta’ Lm58,886.

Hu semma wkoll li din m’hix se tkun l-unika għajnuna li se tingħata lil min ikabbar il-patata, għaliex dawn se jingħataw ukoll sussidju fuq patata li jkabbru għas-suq lokali u li tinbiegħ mill-pitkalija.

Hawnhekk, il-Ministru Zammit svela li f’dawn il-jiem beda jsir l-ewwel pagament ta’ sussidju lill-bdiewa fuq frott, ħaxix, u patata li twasslu fil-Pitkaliji bejn l-1 ta’ Lulju u t-30 ta’ Settembru li għaddew.

Hu qal li din l-għajnuna hi maħsuba biex tagħmel tajjeb għall-effetti ta’ tnaqqis fil-levy li titħallas fuq dawn il-prodotti meta jiġu impurtati minn barra. Fl-1 ta’ Lulju li għadda, il-levy fuq dawn il-prodotti tnaqqset b’14 fil-mija. Il-Ministru Zammit stqarr li għalkemm dan it-tnaqqis m’affettwax il-prezzijiet fis-suq tal-frott, ħaxix u patata mkabbrin lokalment, xorta waħda kien maħsub li jsir pagament ta’ sussidju lill-bdiewa, fuq skala relatata ma’ l-ammont ta’ tnaqqis fil-levy. L-ammont ta’ sussidju se jiżdied fix-xhur li ġejjin.

Qal ukoll li din l-għajnuna qed titħallas kemm lill-bdiewa full-time kif ukoll part-time.

Dwar l-introduzzjoni taċ-ċertifikat tal-Eurepgap, il-Ministru Zammit qal li l-impenn tal-Gvern hu li jtejjeb il-kwalità tal-prodott Malti miż-żrigħ sa meta jittiekel u li dan bl-ebda mod ma jagħmel ħsara lis-saħħa tal-konsumatur. Hu qal li ċ-ċertifikat tal-Eurepgap hu ċertifikat ta’ livell ta’ kwalità li qed jintalab minn kumpanniji kbar Ewropej tas-supermarkets u allura, jekk irridu li l-prodott Malti u b’mod partikolari l-patata, jibqa’ jikkompeti fis-suq barrani, irid ikun aċċertat li l-bdiewa Maltin jingħataw it-taħriġ meħtieġ biex jilħqu dawn l-istandards.

Il-Ministru Zammit qal li diġà numru ta’ uffiċjali mid-Dipartiment ta’ l-Agrikultura temmew b’suċċess kors ta’ taħriġ; u issa ġew assenjati lokalitajiet fejn titkabbar il-patata għall-esportazzjoni biex iħarrġu numru ta’ bdiewa matul l-istaġun li jmiss għat-tkabbir tal-patata tas-sajf, jiġifieri bejn ix-xahar li ġej u April tas-sena d-dieħla. Tul il-perijodu ta’ taħriġ irid ikun żgurat li l-bdiewa jkunu qegħdin jimxu mal-prinċipji u regolamenti tal-Protokoll tal-Eurepgap.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozzi leġiżlattivi biex tkompli tissaħħaħ il-ġlieda kontra l-vjolenza fuq in-nisa u l-vjolenza domestika

PR261931

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

More Press Releases Right arrow