DISKORS MILL-ONOR. GEORGE PULLICINO, SEGRETARJU PARLAMENTARI FIL-MINISTERU TA` L-INTERN U L-AMBJENT, TAL-PREMJIJIET GĦAT-TFAL REBBIEĦA TA’ TPINĠIJA U TA’ ESSEJS ORGANIZZATI MILL-KUNSILL NAZZJONALI TAN-NISA – AULA MAGNA, L-UNIVERSITA’ L-QADIMA, VALETTA
Għeziez, ġenituri u membri tal-Kunsill Nazzjonali tan-Nisa,
Huwa ta’ sodisfazzjon għalija li nkun preżenti għal din iċ-ċerimonja ta’ għoti ta’ premjijiet. Nieħu pjaċir nara organizzazjonijiet jieħdu inizjattivi li bihom inisslu sens tà responsabbiltà u apprezzament favur l-ambjent fost persuni tà età żgħira, u kien għalhekk li għamilna dak kollu possibli biex ngħinu biex din l-attività tirnexxi. Kien għalhekk li bl-għajnuna tal-Ministero dell’Ambiente Taljan, wasalna biex niksbu vjaġġi għall-Italja għar-rebbieħa.
Jiena wkoll missier u għalhekk hu importanti li nara li qed isir dak kollu possibbli biex id-dinja ta’ għada tkun waħda bl-inqas perikli possibbli ghal uliedna. U l-okkazjoni ta’ Jum it-Tfal hu mument opportun li naraw li qed isir dak kollu possibbli favur dinja aħjar għal ġenerazzjonijiet futuri.
Il-Gvern, li minnu nagħmel parti jien, hu konxju mill-bżonn ta’ ħarsien dejjem akbar ta’ l-ambjent tagħna u għalhekk dejjem kien lest li jieħu l-miżuri kollha possibbli biex jassigura dan.
Mill-bidu tas-sena d-dieħla se tidħol fis-seħħ liġi li tirregola l-Community Work, u jien nittama li l-Qrati tagħna jużaw din l-għodda, speċjalment meta jiġu biex jiddeċiedu dwar każijiet li għandhom x’jaqsmu ma’ l-ambjent.
Dan l-aħħar bdejna proġett ġdid imsejjaħ Eco-Schools li għandu l-għan li jinvolvi lit-tfal mill-iskejjel primarji biex jipparteċipaw, jaġixxu u jkunu responsabbli mill-ambjent ta’ l-iskejjel tagħhom. Dan il-proġett qed ikun imħaddem bi prova f’sitt skejjel differenti.
Din l-inizjattiva hi maħsuba fuq il-principji tal-Aġenda 21 tal-Ġnus Magħquda li tgħid li l-inizjattivi li jittieħdu għandhom ikunu ntiżi biex jinvolvu persuni ta’ kull età u jħeġġuhom ikunu responsabbli favur l-ambjent ta’ madwarhom.
Il-Gvern hu impenjat li jkun hawn ambjent aktar nadif u dan l-aħħar kont sodisfatt bil-parteċipazzjoni rekord, anke ta’ tfal, fil-kampanja ‘Clean Up the World’. Matulha, kelli okkazjoni nħabbar li fil-futur qrib se jitwaħħlu cameras f’postijiet magħrufa fejn jintrema’ skart bl-iskop li jonqos l-abbuż u li jinqabdu dawk ħatja.
Dawn l-eżempji ta’ inizjattivi jagħtu xhieda ta’ l-impenn tal-Gvern li jara li l-ambjent f’Malta jkun imħares u saħansitra mtejjeb.
Qabel nagħlaq, nixtieq nifraħ minn qalbi lit-tfal kollha, li pparteċipaw fiż-żewġ kompetizzjonijiet u nifirħilhom għall-impenn tagħhom. Nifraħ b’mod speċjali lir-rebbieħa, Luke Micallef u Janice Borg.
Prosit ukoll lill-Kunsill Nazzjonali tan-Nisa u j’Alla aktar organizzazzjonijiet jieħdu l-eżempju tagħkom u jorganizzaw attivitajiet bħal dawn.
Other Press Releases:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en