Left arrow Mur Lura

Programmi għall-Ġid ta' Uliedna

PR1577
Date Icon 08/11/2002

"Il-programm Comenius ta' l-Unjoni Ewropea qed ikun ta' benefiċċju kbir għall-iskejjel, l-għalliema u b'mod speċjali għat-tfal Maltin li jipparteċipaw f'dan il-programm". Dan qalu l-Ministru ta' l-Edukazzjoni, l-Onor. Louis Galea meta attenda għall-inawgurazzjoni tal-programm Comenius fl-iskola primarja Dun Karm Sant ta' Ħal Tarxien, li għandha bħala motto: "Bħal Familja Waħda Nitgħallmu Flimkien".

Il-Programm, bit-tema "Sharing and comparing teaching methods to meet the needs of all pupils in a Mainstream School" hu kkoordinat mill-iskola Maltija ta' Ħal Tarxien. L-iskejjel li ssieħbu huma l-iskola primarja Crook f'Durham fir-Renju Unit, l-iskola primarja St. Mary f'Culfadda fl-Irlanda u l-iskola primarja ta' Krodren fin-Norveġja.

L-iskop tal-proġett hu li fit-tlett snin li ġejjin it-tlett skejjel jaħdmu flimkien biex jiskopru aktar dwar il-qari, il-kitba u n-numri, dwar il-metodi tat-tagħlim u l-mod kif jitgħallmu t-tfal. Fl-ewwel sena (2002-3) l-iskejjel se jiffokaw fuq il-qari, fit-tieni sena (2003-4) fuq il-kitba, u fit-tielet sena (2004-5) fuq in-numri. Kull sena l-iskejjel se jippreżentaw rapporti dwar il-metodoloġija użata. Dawn ir-rapporti jinkludu wkoll filmati meħudin fuq video.

Se ssir ukoll riċerka dwar dawn il-metodoloġiji u r-riżultati se jiġu mqassma f’kull skola li qed tipparteċipa. Barra minhekk, l-iskejjel se jorganizzaw laqgħat għall-għalliema u għall-ġenituri dwar l-andament tal-proġett. L-ideat li jinġabru minn dawn il-laqgħat se jitniżżlu f’web page imħejjija apposta għall-proġett. Dan kollu hu parti mill-Pjan ta' Żvilupp ta' l-Iskola ta' Ħal-Tarxien.

Waqt it-tnedija tal-proġett fl-iskola ta' Ħal Tarxien rappreżentanti minn kull skola tkellmu dwar l-importanza ta' dan il-proġett għall-iskola u t-tfal tagħhom. Huma qalu li diġà saru jafu ħafna aktar dwar Malta u t-tfal Maltin diġà bdew jiskopru l-pajjiżi u l-kulturi tagħhom; u dan hu pass importanti biex tiżviluppa l-ħbiberija bejn il-pajjiżi ta' Ewropa. L-erba’ skejjel bejniethom ser iwettqu wkoll 'Correspondence Pen Pal Club' biex iħeġġu t-tfal jiktbu ittri lil xulxin. Ir-rappreżentant ta' l-iskola Irlandiża ġabet magħha 65 ittra mit-tfal ta' l-iskola St. Mary għat-tfal Maltin biex jibdew jikkorrespondu.

Il-Ministru Louis Galea tkellem dwar l-importanza tal-programmi Ewropej għall-iskejjel Maltin għax taghtihom l-opportunità jinfetħu għal ideat ġodda kif ukoll biex jiskopru aktar riżorsi u materjal edukattiv. Il-Ministru qal li jieħu gost jara li skola Maltija mhux biss qed tipparteċipa f'dawn il-programmi iżda qed tkun hi l-koordinatur tal-programm.

Dan, qal il-Ministru, hu wieħed mill-vantaġġi ewlenin ta' sħubija fl-UE, li pajjiżna jkun jista joħloq u jmexxi l-programmi li huma l-aktar ta' ġid għall-pajjiżna. Dan ma jkunx possibbli jekk Malta ma tkunx membru.

Il-Ministru rrefera wkoll għall-laqgħat li qed isiru bħalissa mill-Focus Groups fil-proċess ta' l-implimentazzjoni tal-Kurrikulu Nazzjonali. Hu rrefera b'mod partikolari għall-laqgħat li saru din il-ġimgħa mill-Focus Groups ta' l-Edukazzjoni Primarja u ta' l-użu tat-Teknoloġija ta' l-Informazzjoni u l-Kommunikazzjoni fl-iskejjel.

Hu qal li mill-ewwel laqgħa ħareġ ċar kemm hu importanti li noffru programm edukattiv individwalizzat biex nilħqu kull tifel u tifla fl-iskejjel tagħna u dan jorbot mat-tema li ntgħażlet mill-iskola ta' Ħal Tarxien, mit-tieni laqgħa ħareġ li f'pajjiżna għandna riżorsi teknoloġiċi ta' l-ogħla livell li għandhom ħafna potenzal li għadu mhux qed jiġi mmassimizzat, proġett bħal dan jista' jkun ta' katalist biex nużaw aktar it-teknoloġija ta' l-informatika.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow