Left arrow Mur Lura

Programm Edukattiv Individwali fil-Klassijiet Primarji

PR1561
Date Icon 07/11/2002

Bħala parti mill-proċess ta' implimentazzjoni tal-Kurrikulu Nazzjonali, il-Focus Group li jiffoka fuq l-Edukazzjoni Primarja organizza seminar għall-kapijiet ta' l-Iskejjel ta' l-Istat, tal-Knisja u Indipendenti bit-tema "Differentiation - Giving the Best to Each Child".

Fis-seminar ġie diskuss kif l-iskejjel Primarji jridu joffru programm edukattiv li jilħaq lit-tfal kollha billi jara x'inhuma l-kapaċitajiet tagħhom u l-metodu ta' kif it-tfal jitgħallmu. L-għalliema iridu jaraw li waqt il-lezzjonijiet fil-klassi kull student jingħata l-attenzjoni meħtieġa u eżerċizzji varjati li joħorġu l-aqwa kapaċitajiet ta' l-istudent.

Il-Kurrikulu Nazzjonali fl-ewwel prinċipju tiegħu jgħid li "L-iskop aħħari tal-Kurrikulu Nazzjonali huwa li joħloq kultura edukattiva li tiżviluppa l-potenzjal ta' l-istudenti individwali mingħajr ma jiddgħajfu l-prinċipji tas-solidarjeta' u l-kooperazzjoni". Il-Kurrikulu Nazzjonali jqis id-dritt għall-edukazzjoni ta' kwalita' għal kulħadd bħala l-iskop ewlieni tal-proċess ta' tiġdid li jrid iġib miegħu l-istess Kurrikulu. Biex dan ikun possibbli ma nistgħux nibqgħu noffru programm edukattiv uniku għal kulħadd imma programm edukattiv flessibbli u maħsub biex kull tifel u tifla fl-iskejjel tagħna jintlaħqu.

Il-Ministru ta' l-Edukazzjoni Louis Galea tkellem mal-kapijiet dwar l-importanza ta' dak li qed iseħħ bħalissa fl-edukazzjoni. Hu qal li dak li qed jagħmlu l-Focus Groups bħalissa flimkien mal-Kapijiet ta' l-Iskejjel u l-għalliema hu proċess li qed iġib bidla fil-prattika u b'mod konkret. Għalhekk l-iskejjel issa iridu jaraw kif dak li hemm fil-Kurrikulu jiġi imwettaq fl-iskejjel bl-għajnuna ta' l-istrutturi li twaqqfu.

Il-Ministru Galea qal li l-Gvern, f'dawn l-aħħar erba' snin ħadem biex joħloq u jsaħħaħ l-istrutturi kif ukoll biex jipprovdi l-finanzjament meħtieġ kemm biex jitwettaq il-Kurrikulu kif ukoll biex l-għalliema jingħataw taħriġ u aġġornamnet. Il-Ministru qal li l-allokazzjoni ta' flus għal din is-sena se tlaħħaq kważi il-100 miljun lira fl-edukazzjoni ta' ulied il-poplu. Il-vot għat-taħriġ ta' l-għalliema, fl-aħħar sentejn żdied għal Lm 300,000 fis-sena.

"Hu pożittiv ħafna li tara li f'pajjiżna l-klassijiet tal-Primarja huma fil-maġġoranza tagħhom klassijiet żgħar biżżejjed biex l-għalliema jkunu jafu lill-istudenti b'mod individwali u biex ikunu jistgħu joffrulhom programm edukattiv individwalizzat. Ftit aktar minn 50% tal-klassijiet għandhom anqas minn 20 tifel u tifla, u kważi 90% għandhom anqas minn 25".

Il-Ministru Louis Galea qal li l-iskejjel f'pajjiżna huma wkoll mogħnija b'riżorsi u b'teknoloġija li jpoġġuna minn ta' quddiem, fost il-pajjiżi l-aktar żviluppati. Dawn ir-riżorsi jridu jintużaw b'mod għaqli u b'mod li jiġi massimizzat il-potenzjal tagħhom b'mod partikolari biex noffru programmi differenzjati ta' tagħlim għall-istudenti.

Il-Ministru temm jgħid li l-għalliema jridu jgħarfu li l-fatt li jkun hemm id-diversita' fl-iskejjel hu ta' benefiċċju u mhux żvantaġġ. "Li aħna ngħallmu lit-tfal b'mod differenzjat u b'mod li kulħadd jingħata programm edukattiv individwali hi responsabbilta' morali li rridu nerfgħuha lkoll bħala edukaturi" qal Louis Galea.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow