Left arrow Go Back

Proġett ta’ restawr b’investiment ta’ Lm110,000

PR1552
Date Icon 05/11/2002

Il-Ministru għar-Riżorsi u l-Infrastruttura Francis Zammit Dimech qal li l-Unit għar-Restawr fi ħdan il-Ministeru tiegħu kien qed jieħu ħsieb ir-restawr ta’ fortifikazzjonijiet u swar. Il-Unit kellha Supretendent għall-Fortifikazzjonijiet li kien ukoll espert fl-arkitettura militari.

Francis Zammit Dimech qal dan meta kien qed izur xoghol ta’ restawr li qed isir fil-Fortizza Ricasoli. Huwa kompla jghid li f’dawn l-aħħar snin saret ħidma intensiva ta’ restawr u riabilitazzjoni ta’ swar u fortifikazzjonijiet. Hu qal li l-lista kienet waħda impressjonanti. Kienet tinkludi Couvre Porte, fil-Birgu; Notre Dame Gate u l-Mina ta’ Santa Liena f’Bormla; il-Mina ta’ Santa Anna fl-Isla; ir-restawr ta’ diversi swar fil-Kottonera fosthom dawk ħdejn Polverista Gate u ħdejn il-mina ta’ Santa Liena f’Bormla; il-bastjun ta’ San Ġwann fil-Birgu; is-sur ta’ San Mikiel fl-Isla; il-Mina ta’ Notre Dame u l-fortifikazzjonijiet tal-Floriana; il-Kavallier ta’ San Ġakbu fil-belt Valletta; il-batterija Vestreme fil-Mellieħa; it-torri tal-Ħamrija, fil-limiti tal-Qrendi; il-Guard House f’Rinella; il-batterija ta’ Pembroke u partijiet mill-Victoria Lines.

Il-Ministru għar-Riżorsi u l-Infrastruttura qal li kienu qed isiru preparazzjonijiet biex jiġu restawrati is-swar ta’ Santa Barbara, tal-bastjun ta’ San Kristoforu u s-swar fuq kull naħa tad-daħla tal-belt Valletta, u biex isir xogħol ta’ ħadid għal protection guard għall-amberżuni ta’ diversi zoni fis-swar tal-Birgu.

Il-Ministru Francis Zammit Dimech qal li erbgħa mill-bliet imdawwra bis-swar ta’ pajjiżna huma konċentrati fl-inħawi tal-Port il-Kbir fejn mijiet ta’ snin ilu nbena l-Forti Sant’Anġlu u wara bdew jinbnew fl-inħawi l-bliet fortifikati tal-Birgu, l-Isla u Bormla li ntrabtu flimkien permezz tas-swar tal-Kottonera. Fuq in-naħa l-oħra tal-port inbniet il-belt Valletta.

L-Ordni tal-Kavalieri ta’ San Ġwann dehrilha li kellha ssaħħaħ dawn il-bliet billi tibni diversi fortizzi. Waħda minn dawn kienet dik ta’ Ricasoli li taf il-bidu tagħha fl-1670 meta Fra Giovanni Francesco Ricasoli, kavallier mil-lingwa ta’ l-Italja ikkontribwixxa 20,000 skud biex jitwettaq dan il-proġett. Hu qal li l-fortizza ġiet iddisinjata mill-Inginier Valperga skond sistemi ta’ fortifikazzjonijiet Olandiżi u Taljani.

Francis Zammit Dimech qal li din il-fortizza sofriet ħsarat kbar fl-1807 meta kien hemm rewwixta li fiha ttajjar il-maħżen ewlieni tal-porvli li għamel ħsara kbira lil fortizza fuq in-naħa ta’ l-art. Aktar ħsara seħħet matul tempesta qawwija fl-1921. Il-fortizza sofriet ħsarat kbar oħra fit-Tieni Gwerra Dinjija. Hu qal li minħabba l-istat ħażin ta’ din il-fortizza l-Ingliżi investew fir-restawr tas-swar li nksew bil-ġebla. Minħabba xogħol ħażin u nuqqas ta’ manutenzjoni dan il-wiċċ ġdid bil-ġebla hu llum fi stat ħażin u qed iqiegħed fil-periklu l-istabbilita’ ta’ partijiet mis-swar.

Il-Ministru għar-Riżorsi u l-Infrastruttura qal li l-intervent ta’ konservazzjoni li qed isir hu essenzjalment maħsub biex jistabilizza dan il-kisi li sar bil-ġebla. Hu qal li x-xogħol kien qed isir minn kuntrattur privat wara sejħa għal offerti. Il-proġett hu stmat li jiswa Lm110,000.

Francis Zammit Dimech qal li l-ħidma li qed issir biex jiġu rrestawrati u kkonservati fortizzi, fortifikazzjonijiet u bini ieħor storiku turi l-impenn tal-Gvern preżenti favur il-ħarsien tal-wirt storiku ta’ pajjiżna li mhux biss jagħtina identita’, u għalhekk jagħmilna Maltin, iżda hu fattur importanti fil-ħidma kontinwa li titwettaq biex nattiraw lejn pajjiżna turisti li tinteressahom l-istorja li f’Malta tinfirex fuq medda ta’ aktar minn 7,000 sena.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

More Press Releases Right arrow