Left arrow Mur Lura

Skema ta’ kumpens għal min irabbi l-baqar

PR1546
Date Icon 05/11/2002

Il-Ministeru ta’ l-Agrikultura u Sajd u l-Kooperattiva tal-Produtturi tal-Ħalib illum iffirmaw ftehim li permezz tiegħu se tiddaħħal, bi prova għal sena, skema ġdida ta’ kumpens dirett lir-raħħala fuq il-ħalib li jipproduċu.

Il-ftehim kien iffirmat fil-preżenza tal-Ministru għall-Agrikultura u Sajd, l-Onor. Ninu Zammit, li qal li din l-iskema se tieħu post l-iskema magħrufa bħala Beef Intervention.

Hu spjega li taħt l-iskema l-qadima, il-Gvern kien qed joħroġ mijiet ta’ eluf ta’ Liri biex jissussidja dawk il-baqar li jinqatlu wara li jkunu għamlu numru ta’ snin jipproduċu l-ħalib u allura l-karkassa tagħhom tmur għall-ipproċessar. Peress li dawn il-baqar ma jġibux prezz tajjeb, il-Gvern kien jistabbilixxi l-prezz hu, u jissussidja lir-raħħala fejn ma jġibux dak il-prezz.

Hu fakkar li meta kienet introdotta l-iskema antika fl-1995, l-ammont ta’ laħam li kien imur għall-ipproċessar kien jammonta għal madwar 240 tunnellata b’sussidju ta’ Lm215,000 fis-sena, liema ammont tela’ għal 360 tunnellata b’sussidju ta’ madwar Lm480,000 fis-sena 2001. Din l-iskema għaldaqstant kellha tkun irranġata biex tiddaħħal iżjed effiċjenza u bl-iskop li tkun aktar ekonomika.

Il-Ministru Zammit qal ukoll li din l-iskema ma kinitx qed twassal għal inizjattivi li permezz tagħhom ir-raħħala jirristrutturaw l-operat tagħhom u jagħmlu dak it-tibdil meħtieġ anki fir-rigward ta’ kif jiddisponu mill-iskart fl-irziezet tagħhom.

Hu żied li permezz ta’ l-iskema l-ġdida, il-Gvern se jalloka madwar Lm500,000 għal perijodu ta’ sena u l-iskop hu li tiżdied l-effiċjenza fil-produzzjoni tal-ħalib, jiġifieri li l-baqar iżidu kemm fil-kwantità kif ukoll fil-kwalità tal-ħalib li jipproduċu.

Permezz ta’ l-iskema, kompla l-Ministru Zammit, kull raħħal se jirċievi 5ċ kull gallun fuq il-ħalib li jipproduċi skond il-kwota tiegħu, kemm dik li realment hi tiegħu kif ukoll dik mislufa. Peress li l-kwota m’hix imqassma kollha u peress li mhux ir-raħħala kollha jilħqu l-kwota, parti mill-kumpens se jgħaddi għand kumpannija li se titwaqqaf apposta mill-Kooperattiva bl-iskop li torganizza s-suq taċ-ċanga tal-produtturi membri u ta’ oħrajn interessati li jissieħbu f’din l-inizjattiva.

Il-Ministru Zammit esprima t-tama li din l-iskema tkun estiża fuq bażi permanenti u li l-introduzzjoni tagħha sservi biex tidħol aktar effiċjenza fis-settur tal-ħalib u biex il-produtturi għall-ewwel darba jibdew ikunu responsabbli mhux biss għall-produzzjoni tal-ħalib u ċ-ċanga iżda wkoll għall-marketing ta’ dawn il-prodotti.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow