Left arrow Mur Lura

"Minn Għandna Għalikom" - Attivitajiet fl-Iskola Primarja "A" ta' B'Kara

PR1521
Date Icon 31/10/2002

"Is-Sħubija bejn l-iskola u l-ġenituri hi essenzjali biex l-iskejjel tagħna jimxu l-quddiem u jwettqu r-riformi meħtieġa għat-twettieq tal-Kurrikulu Nazzjonali". Dan qalu l-Ministru ta' l-Edukazzjoni, l-Onor. Dr. Louis Galea meta żar l-iskola Primarja 'A' ta' B'Kara għall-ewwel 'Open Day' ta' din l-iskola; fejn l-istudenti u l-għalliema jistiednu lill-ġenituri biex iżuru l-iskola u jaraw x'qed jsir fl-iskola u x'qed jitgħallmu.

L-attivitajiet fl-iskola ta' B'Kara kienu jinkludu "Fun Run" madwar l-iskola, wirja fil-bitħa ta' l-iskola li kienet tinvolvi drama, danza, mużika u korjografija, sessjonijiet għall-ġenituri biex jifhmu aktar dwar is-suġġett tal- Personal and Social Development PSD, kif ukoll opportunita' biex il-ġenituri iduru ma' l-iskola u jaraw il-klassijiet u r-riżorsi li għandha l-iskola.

Il-Ministru Louis Galea tkellem ma' l-għalliema u l-ġenituri ta' l-iskola ta' B'Kara dwar l-importanza li l-iskola tkun miftuħa għall-ġenituri u li l-ġenituri jifhmu lill-iskola u l-għalliema. B'dan il-mod filwaqt li l-ġenituri ikunu jafu x'qed jiġri fl-iskola, l-għalliema jkunu jistgħu iwettqu l-programm edukattiv tagħhom bil-ħsieb li dak li jkunu qed jibnu fl-iskola ikompli jissaħħaħ id-dar.

Il-Ministru qal li l-ġenituri tat-tfal li jattendu din l-iskola se jaraw skola li dan is-sajf sar fiha xogħol estensiv ta' immodernizzar. Fl-iskejjel primarji ta' B'Kara sar investiment ta' madwar Lm25,000 mill-Fondazzjoni għall-Iskejjel ta' Għada (FTS). Hu qal li dan l-investiment sar biex it-tfal imorru l-iskola f'ambjent li jilqagħhom.

Il-Ministru faħħar l-inizjattiva ta' l-iskola biex tinforma lill-ġenituri dwar is-suġġett il-ġdid tal-PSD. Il-Ministru qal li dan is-suġġett hu żvilupp ġdid li għandu jgħin kemm lill-istudenti tas-sekondarji kif ukoll l-iskejjel primarji. Is-suġġett tal-PSD jgħin lill-istudenti biex jiksbu l-għarfien u l-ħiliet biex jgħixu b'kunfidenza u b'mod indipendenti u jieħdu ħsieb saħħithom. Il-Programm maħsub biex jiżviluppa cittadini informati, attivi u responsabbli. 

Il-Programm tal-PSD fil-primarji ikopri t-tfal ta' l-eta bejn 5 u 8 snin u jgħinhom biex:

  • Jieħdu responsabbilta'
  • Iħossuhom pożittivi dwarhom infushom
  • Jipparteċipaw aktar
  • Jagħmlu għażliet għall-ġid tagħhom infushom
  • Jiltaqgħu u jaħdmu ma' nies oħra
  • Jiżviluppaw relazzjonijiet tajba
  • Jikkunsidraw dilemmi soċjali u morali sempliċi
  • Ikunu kapaċi jistaqsu għall-għajnuna
  • Ikunu preparati għall-bidla
  • Jużaw il-ħsieb - Thinking Skills

Il-Ministru temm jgħid li l-programm tal-PSD hu essenzjali biex l-iżvilupp tat-tfal ikun verament sħiħ.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow