Left arrow Mur Lura

FTEHIM BEJN MICROSOFT U L-GVERN MALTI

PR1515
Date Icon 31/10/2002

Il-Ministeru għal-Ġustizzja u Gvern Lokali u l-Microsoft laħqu ftehim importanti biex jagħmlu minn Malta Hub Reġjonali tal-ICT

Dan il-ftehim intlaħaq bejn il-Ministeru tal-Ġustizzja u Gvern Lokali, għan-nom tal-Gvern Malti, u l-kumpanija Microsoft. Dan il-ftehim intlaħaq wara taħdidiet ta’ erba’ xhur u li ntensfikaw ruħhom din l-aħħar ġimgħa.

In-naħa Maltija kienet mmexxija mill-Ministru tal-Ġustizzja u Gvern Lokali Austin Gatt, filwaqt li d-delegazzjoni tal-Microsoft kienet mmexxija minn Jean Philipe Courtois, il-Viċi President tal-Korporazzjoni.

Il-ftehim li ntlaħaq bejn iż-żewġ naħat huwa wieħed li għandu jkopri perjodu ta’ bejn tlieta u ħames snin, u li għandu jwassal biex Malta tkun Hub tekniku ta’ eċċellenza għar-reġjun tal-Mediterran. Dan jinkludi l-ħolqien f’pajjiżna ta’ Ċentru Teknoloġiku ta’ eċċellenza.

Punti Ewlenin tal-Ftehim

Il-ftehim jista’ jinqasam fi tnejn. Fix-xahrejn li ġejjin ż-żewġ naħat ftehmu li l-Gvern Malti jimpenja ruħu fil-ġlieda kontra l-piraterija tas-software. Flimkien mal-Microsoft ser issir ħidma biex issir kampanja ta’ edukazzjoni fuq l-aspetti negattiv tal-piraterija, filwaqt li l-aġenziji ta’ l-infurzar jingħataw it-taħriġ relevanti għal dan il-għan.

Il-Microsoft ser tipprovdi lill-Gvern 4,000 kopja tal-Microsoft Encarta, il-pakkett edukattiv l-iktar użat madwar id-dinja. Il-Gvern ser jużhom fl-inzjattivi edukattivi tiegħu sabiex tiġi eliminata l-qasma diġitali.

Il-Microsoft impenjat ruħha wkoll biex sa Ġunju li ġej l-Windows XP jkun jinkludi l-Malti bħala lingwa uffiċjali. Fil-fatt Microsoft ser tipprovdi r-riżorsi neċessarji biex dan isir.

Fl-ewwel sitt xhur tas-sena ddieħla mistennija ukoll li tibda tiffunzjona l-Microsoft Regional IT Academy. Din l-akkademja ser tiġi kkordinata mill-Kummissjoni eMalta bħala parti mill-impenn tagħha biex tistabilixxi lil Malta bħala ċentru ta’ eċċellenza fil-qasam tar-riżorsi umani fil-qasam tal-ICT. L-akkademja għandha l-għan li tħarreġ u tiċċertifika lil Maltin u nies oħra fir-reġjun tal-Mediterran fit-tħaddim u l-iżvilupp tat-teknoloġiji tal-Microsoft. Fil-fatt din l-akkademja ser tkun waħda mill-ftit akkademji li l-Microsoft għandha madwar id-dinja.

Intant intlaħaq ftehim sabiex Malta issir il-Hub Reġjonali ta’ l-Informatika, fejn fost l-oħrajn, b’dan Malta jkollha ċentru reġjonali ta’l-ogħla livell f’dik li hija informatika. Dan iċ-Ċentru ser ikun ibbażat fuq l-fatt li fix-xhur li ġejjin nassistu għal-ħolqien ta’ sinerġija bejn il-Gvern u l-Microsoft. Microsoft ser jikkontribwixxu f’dan il-proġett l-Intellectual Property, taħriġ u tagħlim, żvilupp ta’ teknoloġiji ta’ l-ogħla livell, swieq ġodda, u support tekniku.

Dan iċ-Ċentru jista’ jitqies bħala opportunità għal riċerka u żvilupp għas-settur privat lokali. Dan iċ-ċentru ser ikun qed iservi wkoll ta’ bażi; biex l-industrija lokali jkollha aċċess għall-aħħar teknoloġiji tal-Microsoft, biex b’hekk jkunu jistgħu jinbnew applikazzjonijiet u programmi fuq il-qafas ta’ l-applikazzjonijiet tal-Microsoft. Iċ-ċentru għandu jattira kumpaniji kbar oħra fil-qasam tal-ICT fir-reġjun sabiex ir-relevanza reġjonali ta’ dan iċ-ċentru u ta’ Malta tissaħħaħ.

Sadanittant kien hemm ukoll qbil li l-Microsoft u l-Ministeru tal-Ġustizzja u Gvern Lokali jaħdmu flimkien biex jaraw kif l-użu tat-teknoloġiji Microsoft jistgħa jgħin fl-iżvilupp tal-eGovernment f’Malta.

Il-Ministru Gatt fisser dan il-ftehim bħala opportunità kbira għaż-żgħażagħ u l-ħaddiema Maltin biex jingħataw l-aħjar taħriġ possibbli fil-qasam tal-ICT. Dr. Gatt fisser li dan il-ftehim ser jiftaħ beraħ il-bibien biex f’Malta jkollna opportunitajiet reali ta’ l-ogħla kwalità. Iktar minn hekk, kompla l-Ministru Gatt dan hu ftehim, li fih Malta tisfrutta l-vantaġġi kollha tagħha biex issaħħaħ r-relevanza tagħħa f’dan ir-reġjun.

Jean Philippe Courtois qal li fix-xhur li għaddew Microsoft Corporation għamlu analiżi tas-sitwazzjoni fl-għaxar pajjiżi kandidati għal sħubija, u baqghu impressjonati bl-inizjattiva tal-Gvern Malti biex il-qasam tal-ICT jiżviluppa. Jean Philippe Courtois qal l-Microsoft tagħraf li Malta hija fuq quddiem f’dan il-qasam, u tapprezza l-fatt li l-Gvern huwa impenjat li jkompli jżomm postu fuq quddiem f’dan ir-rigward.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow