Left arrow Go Back

Għajnuna mill-F.A.O. dwar l-immaniġġjar tar-riżorsi ta’ l-ilma

PR1493
Date Icon 28/10/2002

Għadu kemm gie ffirmat ftehim li permezz tiegħu l-Organizzazzjoni ta’ l-Agrikultura u l-Ikel ser tgħin lill-Gvern Malti fit-tfassil ta’ politika ġdida li għandha twassal għall-immaniġġjar sostenibbli tar-riservi ta’ l-ilma li pajjiżna għandu taħt l-art.

Dan ħabbru l-Ministru għall-Agrikultura u Sajd Ninu Zammit, f’Birżebbuġa il-bierah, meta tkellem waqt l-attività annwali biex jitfakkar il-Jum Dinji ta’ l-Ikel.

L-attività bdiet b’Quddiesa ta’ Radd il-Ħajr fil-knisja parrokkjali ta’ Birżebbuġa. Wara, fl-Iskola Primarja, saret il-preżentazzjoni ta’ midalji lil persuni u għaqdiet li ddistingwew ruħhom fil-produzzjoni ta’ l-ikel u fil-produzzjoni ta’ l-ilma, kif ukoll ta’ vouchers lill-istituzzjonijiet filantropiċi.

Il-Ministru Ninu Zammit fakkar li t-tema li ntagħżlet mill-FAO fl-okkażjoni tal-Jum Dinji ta’ l-Ikel hi: L-ilma: għajn biex ikun assigurat l-ikel. Hu qal li ntagħżlet din it-tema għax l-ilma għandu rabta sħiħa mal-produzzjoni ta’ l-ikel. Dan għaliex mingħajr ilma ma tistax issir produzzjoni agrikola.

Hu fakkar li aktar ma qed tiżdied il-popolazzjoni aktar qed tiżdied id-domanda għall-ikel u allura aktar qed jiżdied l-użu ta’ l-ilma għat-tisqija. Dan il-fatt allura jesigi kull prekawzjoni biex l-istess ilma tal-pjan ma jiġix kontaminat.

Għaldaqstant, stqarr il-Ministru Zammit, trid tibda tittieħed azzjoni b’mod li mhux biss ikun kontrollat l-użu ta’ dan l-ilma prezzjuż, permezz ta’ immaniġġjar aħjar ta’ dawn ir-riżorsi, iżda wkoll li jibda jinġabar u jinħażen aktar ilma tax-xita.

Barra minn hekk, u bl-iskop li l-ilma li jinġabar f’kull forma ta’ ħażna ikun ilma tat-tisqija ta’ kwalità, il-bdiewa u r-raħħala kollha se jkunu megħjuna f’inizjattivi li jassiguraw li l-istess ħażniet ta’ l-ilma ma jiġux kontaminati b’fertilizzanti, pestiċidi jew b’xi forma ta’ skart mill-irziezet.

Hu qal li l-ftehim li sar mal-FAO għandu l-iskop li, bl-għajnuna ta’ nies tekniċi, titfassal policy gdida u ssir il-leġislazzjoni meħtieġa biex ikun assigurat l-użu sostenibbli ta’ dan l-ilma u biex dan ir-riżors ma jibqax jintilef.

Il-Ministru Zammit qal li fir-rigward tal-ġbir u l-ħażna ta’ ilma tax-xita, qed ikunu proposti diversi inizjattivi permezz tal-Pjan ta’ l-Iżvilupp Rurali għall-gżejjer Maltin. Dawn jinkludu l-bini ta’ aktar ġibjnu għall-ġbir ta’ l-ilma, il-kostruzzjoni ta’ sistemi ġodda ta’ distribuzzjoni kemm għall-ilma tax-xita kif ukoll dak imsaffi mid-drenaġġ, il-bini u r-restawr ta’ diegi fil-widien, u l-użu ta’ teknoliġji ġodda għall-immaniġġjar u l-konservazzjoni tar-riżorsi ta’ l-ilma. Hu qal li dawn l-inizjattivi jkunu jistgħu jiġu finanzjati mill-Unjoni Ewropea.

Fl-aħħarnett, il-Ministru Zammit appella biex kulħadd jibża’ għar-riżorsi naturali li għandna ta’ l-ilma kemm f’dik li hi kwantità kif ukoll kwalità.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

More Press Releases Right arrow