Left arrow Mur Lura

Miljun student jibbenefikaw mill-programm Erasmus

PR1452
Date Icon 18/10/2002

Matul is-sena akkademika 2002/2003, se jkun skambjat il-miljun student li ipparteċipa fil-programm Erasmus ta' l-Unjoni Ewropea. Il-Programm Erasmus hu parti mill-programm Socrates. Il-Programm Socrates hu maħsub biex jippromwovi l-iżvilupp fil-qasam edukattiv fil-pajjiżi imsieħba fl-UE u pajjiżi li resqin lejn sħubija bħal Malta. Il-Programm Erasmus hu programm edukattiv iżda li jiffoka fuq l-istudenti ta' l-Universita'.

Bl-appoġġ tal-Kummissjoni Ewropea, l-Organizzazjoni Ewropeja Associationdes Etats Generaux des Etudients de l’Europe (AEGEE) (European Student's Forum) flimkien ma organizzazjonijiet oħra ta' l-istudenti bħall-National Union of Students in Europe (ESIB) u l-Erasmus Student Network (ESN) qed jorganizzaw l-Erasmus Action Week bejn it-18 u l-25 ta' Ottubru. L-Ersamus Action Week se tkun ġimgħa mimlija attivita' f'madwar 150 lokalita' madwar l-Ewropa. Hawn Malta l-attivitajiet se jkunu organizzati mill-AEGEE Valletta bil-kollaborazzjoni ta' l-Uffiċju tas-Socrates fl-Universita'.

L-attivitajiet li se jkunu organizzati matul din il-ġimgħa jinkludu diskussjoni dwar l-iskambji ta' l-istudenti u l-mobilita', sessjonijiet ta' informazzjoni għall-istudenti u l-lecturers u ċelebrazzjoni uffiċjali. L-AEGEE se jtellgħu wkoll dak li qed jissejjaħ il-Villaġġ ta' l-Erasmus - wirja viżiva tal-lokalitajiet kollha li jipparteċipaw fil-programm Erasmus. Se jkun hemm ukoll stands ta' informazzjoni mill-MIC u mill-AEGEE stess biex jagħtu aktar tagħrif dwar il-programmi edukattivi ta' l-Unjoni Ewropea.

"Il-benefiċċji li qed jieħdu l-istudenti ta' llum u li finalment qed tieħu Malta mill-parteċipazzjoni tagħna fil-programmi edukattivi ta' l-UE huma ta' valur inestimabbli" sostna l-Ministru ta' l-Edukazzjoni Louis Galea waqt il-ftuħ uffiċjali tal-Erasmus Action Week. Il-Ministru qal wara li Malta irnexxiela terġa tirriattiva l-applikazzjoni tagħha għall-sħubija fl-UE bdiet il-ħidma biex pajjiżna jibda jipparteċipa f'dawn il-programmi. "Għalkemm fil-bidu Malta kienet aktar qed timmira biex tkun parteċipant, illum Malta bdiet tieħu sehem aktar attiv u f'xi każi qed tmexxi u tikkoordina l-programmi hi stess" qal il-Ministru Louis Galea.

Il-Ministru tkellem ukoll dwar l-opportunitajiet u l-isfidi li għandhom quddiemhom l-istudenti ta' l-Universita'. Hu qal li d-deċiżjoni li se jieħu l-pajjiż fix-xhur li ġejjin se tkun waħda li se tfisser ħafna għall-ġejjieni tal-ġenerazzjoni żagħżugħa għaliex se jkunu huma li se jaħsdu l-frott jew jiffaċċjaw il-konsegwenzi ta' din id-deċiżjoni. Hu għalhekk meħtieġ li l-istudenti u ż-żgħażagħ b'mod ġenerali jieħdu sehem akbar fid-diskussjoni li għaddejja bħalissa, u mhux biss dwar l-affarijiet li jaffettwawhom direttament iżda dwar l-oqsma kollha. Din id-diskussjoni trid tkun il-fuq mill-politika partiġġjana u trid tara x'inhu fil-verita' ta' ġid għall-pajjiżna. Trid ukoll tara x'inhuma l-isfidi li irridu niffaċċjaw u kif se nagħmlu biex kulħadd jimxi l-quddiem u ma jkunx hawn minn javvanza ghas-skapitu ta' ħaddieħor.

Il-Ministru qal li l-istudenti li bħalissa qegħdin fl-Universita' għandhom iħarsu lejn l-isħubija ta' Malta fl-UE bħala opportunita biex pajjiżna ikun parteċipant ewlieni fl-iżviluppi li qed iseħħu fl-Ewropa. “Opportunita` biex jimirħu f'suq ta' aktar minn 400 miljun ruħ. Opportunita` għal aktar taħriġ fil-livelli ogħla ta' l-Edukazzjoni fejn il-Maltin ikunu jistgħu ikomplu jistudjaw f'Universitajiet u istituzzjonijiet edukattivi oħra bl-istess kundizzjonijiet bħal sħabhom l-Ewropej u mhux ikollhom iħallsu eluf ta' liri aktar għall-istess kors. Opportunita` biex ngħixu f'ambjent aktar san. Opportunita` biex insaħħu l-ekonomija ta' pajjiżna. Opportunita` ukoll biex naraw lill-Ewropa tingħaqad u tgħix fil-paċi u fil-prosperita`,” sostna Louis Galea

Il-Ministru temm jawgura l-ġimgħa ta' attivitajiet ta’ l-AEGEE Valletta tkun suċċess u li jkun hemm aktar studenti li jifhmu x'inhuma dawn il-programmi u kif jistgħu jibbenefikaw minnhom biex b'hekk ikollna dejjem aktar studenti li qed jipparteċipaw b’gid ghalihom u ghal pajjizna.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow