TISBIĦ TAL-PROMENADE TAX-XEMXIJA
Il-Ministru għar-Riżorsi u l-Infrastruttura Francis Zammit Dimech qal li bħalissa l-Gvern kien qed iwettaq diversi proġetti ta’ tisbiħ mal-pajjiż kollu. Dalgħodu l-Ministru żar proġett ta’ tisbiħ li qed isir tul il-promenade tax-Xemxija, f’San Pawl il-Baħar. Hu qal li x-xogħol fuq dawn il-proġetti kien f’diversi stadji, f’uħud ix-xogħol kien fi stadju avvanzat u mistenni li jintemm fix-xhur li ġejjin, filwaqt li proġetti oħrajn kienu jew fi stadju ta’ ippjanar jew jistennew il-permessi meħtieġa biex jinbdew.
Francis Zammit Dimech qal li fost il-proġetti li qed jitwettqu hemm l-aħħar fażi tal-proġett ta’ tisbiħ ta’ San Ġiljan, l-ewwel fażi tal-proġett ta’ tisbiħ fi Triq Wilġa/il-Bajja ta’ San Ġorġ, Misraħ Spinola, Triq Santu Wistin f’Paceville, il-promenade tul triq Zonqor f’Marsaskala, il-bajja ta’ San Tumas, il-promenade tax-Xgħajra u l-promenade tal-Qajjenza f’Birżebbuġa.
Il-Ministru għar-Riżorsi u l-Infrastruttura qal li żewġ proġetti oħra ta’ tisbiħ kienu qegħdin isiru fl-inħawi ta’ San Pawl il-Baħar. Hu qal li f’Buġibba kien qed isir it-tisbiħ tal-blat għoli li hemm ħdejn il-kappella dedikata lin-Nawfraġju ta’ San Pawl. Francis Zammit Dimech qal li bħalissa qed isir xogħol fuq in-naħa tax-xellug tal-proġett, qed jinbnew żewġ ġibjuni għall-ħażna ta’ l-ilma biex jintuża għat-tisqija tas-siġar li jridu jitħawwlu fl-inħawi filwaqt li qed jitħejjew l-offerti għall-bini tat-taraġ tan-nofs, għall-pavimentar, għad-disinn u l-provista ta’ servizzi mekkaniċi u elettriċi. Hu qal li x-xogħol ewlieni tal-ġebel mistenni jitlesta sal-bidu tas-sena d-dieħla.
Francis Zammit Dimech qal li proġett ieħor li kien qed jitwettaq kien dak tat-tisbiħ tal-promenade tax-Xemxija. Dan il-proġett kien qed isir minn ħaddiema tal-Ministeru tar-Riżorsi u l-Infrastruttura bi sħab mal-Kunsill Lokali ta’ San Pawl il-Baħar li kien qed jipprovdi l-materjal.
Il-Ministru għar-Riżorsi u l-Infrastruttura qal li dan il-proġett kien jiġbor it-tisbiħ ta’ 1.5 kilometri ta’ promenade li se jitwettaq fi tliet fażijiet differenti. Hu fakkar li x-xogħol fuq l-ewwel fażi tal-proġett, parti mill-promenade twila 600 metru, beda f’Ġunju ta’din is-sena u mistenni jitlesta sa April tas-sena d-dieħla.
Francis Zammit Dimech qal li x-xogħol li qed isir jikkonsisti fil-qlugħ tar-railings eżistenti, bollards u bankina. Wara ġie iffurmat sottobank ġdid u tqiegħdu bollards ġodda. Dan ix-xogħol tlesta f’Awissu li għadda. Il-Ministru Zammit Dimech qal li bħalissa qed issir kurduna ġdida tal-bankina u qed jinbnew il-konok madwar is-siġar eżistenti. Hu qal li kien beda ukoll ix-xogħol fuq il-galleriji li jagħtu fuq in-naħa tal-baħar.
Il-Ministru għar-Riżorsi u l-Infrastruttura qal li hu maħsub li l-pavimentar bil-madum u l-landscaping jsir fil-jiem li ġejjin biex il-promenade ikun jista’ jerġa’ jinfetaħ għall-pubbliku. Wara titqiegħed l-għamara tal-promenade u lampi dekorattivi. Francis Zammit Dimech qal li sadattant kienu qed jitħejjew t-tenders għall-provista u twaħħil tar-railings tal-ħadid.
Il-Ministru Francis Zammit Dimech qal li l-proġett għat-tisbiħ tal-promenade tax-Xemxija kien prova oħra tar-relazzjonijiet tajba li kien hemm bejn il-Kunsill Lokali San Pawl il-Baħar u l-Ministeru għar-Riżorsi u l-Infrastruttura. Francis Zammit Dimech qal li l-ħidma bi sħab bejn il-Gvern u l-Kunsilli Lokali kienet qed tagħti riżultati mill-aktar pożittivi li qed iwasslu biex igawdu l-lokalitajiet u r-residenti.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928