Left arrow Mur Lura

FAŻI ĠDIDA FIR-RIFORMA TAL-KURRIKULU

PR1430
Date Icon 16/10/2002

Il-Ministru ta’ l-Edukazzjoni, Dr Louis Galea, illum nieda fazi ġdida fit-twettiq tar-riforma fl-edukazzjoni permezz tal-Kurrikulu Nazzjonali l-ġdid.

Kapijiet ta’ skejjel tal-Gvern, tal-Knisja u dawk Privati flimkien ma’ għalliema u esperti qed jiltaqgħu fil-ġimgħat li ġejjin biex jiftiehmu dwar it-twettiq ta’ bidliet fis-sistemi, sillabi, u metodi li jridu jiġu applikati fil-klassi ma’ l-istudenti Maltin.

L-iskop hu li nersqu aktar lejn il-mira ta’ edukazzjoni bażika ta’ kwalita' għal kulħadd u rilevanti għall-ħajja tal-lum. It-twettiq ta’ din il-fażi qed issir minn diversi Focus Groups taħt it-tmexxija tal-Kunsill Nazzjonali tal-Kurrikulu mmexxi miċ-Chairperson Mary Vella, id-Direttur ta’ l-Edukazzjoni għall-Kurrikulu.

L-ewwel qasam li beda jiġi trattat din il-ġimgħa huwa l-evoluzzjoni tar-riforma fl-edukazzjoni tax-xjenza fil-livell sekondarju. Il-Kurrikulu Nazzjonali jitlob lill-iskejjel jikkonċentraw fuq il-bżonnijiet tal-bniedem fid-dinja tal-lum u jħejjuh għalihom. Qasam essenzjali hu dak tax-xjenza fejn ir-riforma ser timxi minn sistema ta’ tagħlim speċjalizzat ta’ suġġetti singoli (Fiżika, Kimika u Bijoloġija) għal sistema ta’ tagħlim tax-Xjenza Ko-ordinata (Co-ordinated Science). Is-sistema il-ġdida timmira li t-tfal kollha jingħataw bażi ġenerali b’saħħitha u ta’ kwalita' fir-rabta tax-xjenzi differenti fl-istess ħin li toffri spazju għal doża aktar qawwija ta’ tagħlim fis-suġġetti singoli tal-Fiżika, Bijoloġija u Kimika lil dawk l-istudenti li jkunu miġbudin aktar lejn dawn is-suġġetti.

Il-Ministru Louis Galea fisser il-bżonn li l-Kurrikulu tax-Xjenza illum għandu jemfasizza is-sehem kbir tax-xjenza fis-soċjeta` tal-lum. “Iċ-ċittadini kollha għandhom bżonn jiġu mgħallma biex jaffaċċjaw b’mod informat il-problemi ambjentali u esistenzjali tad-dinja illum. Dan ma jistax jibqa` il-privileġġ tal-ftit. Hu għalhekk li mill-bidunett il-Kurrikulu tax-Xjenza għandu jippromwovi ir-rabta intima li hemm bejn ix-Xjenza, it-Teknoloġija u s-Soċjeta`," sostna il-Ministru.

Il-Focus Group tax-Xjenza Ko-ordinata qed iħejji riforma mibnija fuq sistema fejn it-tagħlim separat tas-suġġetti singoli isir permezz ta’ moduli f’qafas ta’ tagħlim tax-Xjenza Ko-ordinata li jridu jagħmluh l-istudenti kollha, subien u bniet, mill-Form 1 sal-Form 5. Taħt is-sistema tal-lum il-biċċa l-kbira ta’ l-istudenti jinqatgħu mit-tagħlim tax-xjenza fl-aħħar tal-Form 2, u mill-Form 3 ‘l fuq ma jieħdu l-ebda taghlim fuq ir-rabta tax-xjenzi filwaqt li huma obbligati jagħżlu suġġett wieħed minn fost il-Fiżika, il-Kimika u Bijolġija. Dan qed iwassal biex in-numru ta’ dawk li jiksbu Certifikat tas-SEC f’xi wieħed minn dawn is-suġġetti huwa ftit. Xogħol ieħor f’dan il-qasam qed isir mill-Focus Group ta’ l-Edukazzjoni Primarja li qed jaħseb ukoll biex jintensifika l-espożizzjoni għax-xjenza sa minn eta` bikrija tat-tfal.

Iċ-Chairperson tal-Focus Group tax-Xjenza Ko-ordinata, s-sur Philip Bonanno, għalliem speċjalizzat fix-xjenza fil-livell sekondarju u post-sekondarju, qal li din il-ġimgħa u l-gimgha d-dieħla, l-Focus Group qed ilaqqa` l-Kapijiet kollha ta’ l-iskejjel u l-għalliema kollha f’dan il-qasam flimkien biex jidħlu fid-dettal u biex it-twettiq ta’ din ir-riforma issir il-ħin kollu b’konsultazzjoni u bl-involviment sħiħ ta’ l-għalliema involuti.

“B’hekk il-problemi u l-isfidi fuq il-bank ta’ l-iskola jinftiehmu aktar u jkunu jistgħu jiġu mgħeluba aħjar. Irridu li kulhadd japprezza l-bżonn li nipprovdu kurrikulu tax-xjenza rilevanti għas-seklu 21. Irridu nikkonvinċu lil kulħadd iħaddan il-proċess tar-riforma. Il-mira tagħna hi li niżviluppaw kurrikulu tax-xjenza flessibbli li jirrispondi għall-bżonnijiet differenti ta’ l-istudenti. Il-kurrikulu tax-xjenza fil-livell sekondarju għandu jkollu żewġ miri speċifiċi. Waħda li kulħadd ikollu bażi tajba ta’ litteriżmu fix-xjenza biex kulħadd ikun jaf jassumi ċertu responsabbilita` f’dinja mimlija xjenza u teknoloġija. U l-oħra li nattiraw ħafna aktar studenti li jsegwu karrieri fix-xjenza u t-teknoloġija. Litterizmu fix-xjenza jfisser li nesponu lill-istudenti għall-oqsma ewlenin u l-mistoqsijiet differenti li tqanqal ix-xjenza," spjega is-sur Bonnano.

Fil-ġimgħat li ġejjin Focus Groups oħra ser ikunu qed iwettqu ħidma simili bħal din f’oqsma differenti tal-Kurrikulu.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow