Messaġġ mill-Ministru ghall-Agrikultura u s-Sajd, l-Onor. Ninu Zammit, fl-okkażjoni tal-Jum Dinji ta’ l-Ikel, nhar l-Erbgha, 16 ta’ Ottubru 2002
L-ilma hu indispensabbli għall-ħajja tal-bniedem u għal dak kollu li jgħix fuq wiċċ din l-art. Dan għaliex l-ilma jagħti l-ħajja, u jmantni l-ħajja. L-ilma hu l-għajn għall-għajxien tagħna, mhux biss għaliex mingħajru ma ngħixux, iżda wkoll għaliex mingħajru ma nipproduċux l-ikel li għandna bżonn. Għaldaqstant, l-ilma hu l-għajn li tassigura l-ikel li għandna bżonn.
Din hi, fil-fatt, it-tema li ntagħżlet mill-Organizzazzjoni Dinjija ta’ l-Ikel, il-FAO, fl-okkażjoni tal-Jum Dinji ta’ l-Ikel li qed ikun osservat illum, is-16 ta’ Ottubru. L-Ilma: għajn biex ikun assigurat l-ikel.
Dan hu l-messaġġ li l-FAO trid twassal lill-popli kollha. Nafu kemm miljuni kbar għad hawn fid-dinja li għadhom ibatu l-ġuħ. Il-ġuħ li jwassal għall-faqar, għall-mard u għall-mewt. Tant hi kbira din il-problema li, sitt snin ilu, f’laqgħa dinjija dwar l-ikel organizzata mill-FAO, il-mexxejja tad-dinja taw il-kelma li jagħmlu minn kollox biex sas-sena 2015, il-miljuni kbar li għadhom ibatu l-ġuħ jonqsu bin-nofs. Dan ifisser li n-numru ta’ persuni li jsofru mill-ġuħ jinżel għal madwar 400 miljun. Din iċ-ċifra ta’ 400 miljun tindika kemm għadu kbir dan il-flaġell.
Għaliex intagħżel l-ilma bħala t-tema għal din is-sena? Dan għaliex l-ilma għandu rwol essenzjali fil-produzzjoni ta’ l-ikel li teħtieġ il-popolazzjoni fid-dinja biex tkun tista’ tgħix ħajja attiva u b’saħħitha. Popolazzjoni li kulma tmur qed dejjem tiżdied, u aktar ma tiżdied il-popolazzjoni aktar tikber id-domanda għall-ikel, u aktar ma tikber id-domanda għall-ikel, aktar tiżdied il-ħtieġa għall-ilma biex nipproduċu dan l-ikel. Hu ikkalkulat li sas-sena 2030, jiġifieri sa 28 sena oħra, id-dinja tkun teħtieġ 60 fil-mija aktar ikel milli teħtieġ illum. Madwar 80 fil-mija ta’ din iż-żieda trid tiġi minn ħidma agrikola b’użu ta’ ilma għat-tisqija.
Għalkemm hu minnu li tliet kwarti mill-pjaneta li fuqha ngħixu hi miksija bl-ilma, nitfa biss minn dan l-ilma hi aċċessibbli għall-konsum. Hu kkalkulat li madwar 70 fil-mija minn dan l-ammont imur għall-produzzjoni ta’ l-ikel minn attività agrikola. F’ħafna pajjiżi, speċjalment fil-kontinent Afrikan, l-ilma hu skars u ħafna pajjiżi li qed jiżviluppaw qed jużaw ħafna ilma b’mod li m’hux sostenibbli. Il-problema m’hix biss waħda ta’ nuqqas ta’ ilma, iżda wkoll waħda ta’ kontaminazzjoni ta’ l-ilma. Tajjeb li jingħad ukoll li f’dawn l-aħħar ħamsin sena, id-domanda għall-ilma fid-dinja aktar milli ttriplat.
Għall-grazzja t’Alla, f’pajjiżna ma nafux x’inhu l-ġuħ. Anzi m’aħniex neqsin mill-ikel. Ħafna mill-ikel nipproduċuh aħna stess. U biex nipproduċu dan l-ikel, nużaw l-ilma. Aħna gżira żgħira, bla għejjun naturali ta’ ilma. La għandna xmajjar u lanqas għadajjar. Kulħadd hu konxju li b’mod partikolari fl-aħħar sentejn iffaċċjajna problema ta’ nuqqas kbir ta’ xita.
L-ilma hu indipensabbli. Tkun taf aktar kemm hu indispensabbli meta ma ssibux. Kien hemm żminijiet fejn anki aħna kellna problema akuta ta’ nuqqas ta’ ilma, saħansitra ilma tax-xorb. Illum nistgħu nipproduċu aktar milli għandna bżonn. Iżda qed inħallsu wkoll prezz għal din il-produzzjoni. Għax parti sostanzjali mill-ilma li nużaw hi ilma baħar dessallinat permezz ta’ l-impjanti tar-reverse osmosis, liema impjanti jużaw ħafna enerġija biex jitħaddmu.
Qed nipproduċu wkoll ilma għat-tisqija tal-prodotti agrikoli u għall-industrija. Dan qed nagħmluh permezz tat-tisfija ta’ parti tad-drenaġġ li nipproduċu. Marbutin issa li sas-sena 2007 ma nibqgħux nitfgħu aktar drenaġġ mhux imsaffi fil-baħar, u allura rridu nibnu aktar impjanti biex sa dak iż-żmien inkunu f’pożizzjoni li nsaffu d-drenaġġ kollu.
Naturalment f’pajjiża għad għandna problema ta’ ħażna ta’ ilma minħabba l-fatt li ħafna mill-ilma tax-xita li jinżel fuq pajjiżna jispiċċa jgelgell għal ġol-baħar. F’dan ir-rigward qed jitħejja pjan fit-tul biex din il-problema titrażżan. Dan il-pjan nirriferu għalih bħala l-programm ta’ run off water.
Għandna mbagħad l-ilma fir-riservi ta’ taħt l-art. B’dispjaċir ninnota li dawn ir-riservi ta’ ilma qed jintużaw bla kontroll b’mod partikolari mis-settur agrikolu. Hemm bżonn li kulħadd jifhem li jekk se jibqa’ jsir użu bla rażan se nitilfu din il-ħażna ta’ ilma naturali li għandna f’pajjiżna. Diġà f’diversi lokalitajiet il-kwalità ta’ l-ilma f’dawn il-ħażniet ta’ taħt l-art qed teħżien. Dan ifisser ukoll theddida għall-produzzjoni ta’ l-ikel permezz tal-biedja.
Minkejja l-problemi li għandni kif semmejt, l-ilma f’pajjiżna għadna nsibuh kemm għall-użu personali tagħna kif ukoll għas-settur agrikolu u dak industrijali. Għaldaqstant jeħtieġ li flimkien naħdmu biex inħarsu dak li għandna u nimmaniġġjaw ir-riżorsi kollha ta’ l-ilma bl-aktar mod effiċjenti u b’mod integrat. Kulħadd jaf li mingħajr ilma, u speċjalment mingħajr ilma tajjeb, la nkunu nistgħu ngħixu aħna u lanqas inkunu nistgħu nipproduċu l-ikel li neħtieġu.
F’dan il-jum li fih qed infakkru l-Jum Dinji ta’ l-Ikel għandna naħsbu wkoll f’dawk il-miljuni li qed imutu bil-ġuħ għax ma jsibux x’jieklu. Flimkien irridu nkomplu naħdmu biex jonqsu l-konflitti li ħafna drabi qed iwasslu biex ikomplu jkabbru dan il-flaġell. Hu dover tagħna lkoll li b’mod tanġibbli nuru s-solidarjetà tagħna ma’ min qed ibati l-ġuħ, u bil-fatti nagħtu s-sehem tagħna ħalli tintrebaħ il-battalja kontra l-faqar u l-ġuħ.
Nieħu din l-opportunità biex insemmi li fl-okkażjoni tal-Jum Dinji ta’ l-Ikel għal din is-sena, fl-iskejjel qed isir ġbir biex tkun megħjuna il-missjoni li qed twettaq is-Soċjetà Missjunarja ta’ San Pawl fil-Perù. Din is-soċjetà qed tagħmel ħafna ġid partikularment fost il-fqar fil-periferiji ta’ l-ibliet ta’ Arequipa u Lima.
Bħal nhar il-Ħadd ġimgħa se nfakkru dan il-Jum b’quddiesa ta’ radd il-ħajr f’Birżebbuġa, u b’ċerimonja li magħtulha jingħata ġieħ lil dawk l-individwi li ħadmu jew għadhom jaħdmu għall-ġid tal-produzzjoni ta’ l-ikel f’pajjiżna. Isiru wkoll għotjiet ta’ prodotti agrikoli lill-istituti Maltin li jaħdmu fil-qasam filantropiku.
Insellem lil kulħadd u nixtieqilkom ġid u saħħa lilkom u lill-familji tagħkom.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928